پرەمەر-ءمينيستردىڭ ورىنباسارى تامارا دۇيسەنوۆا قازاقستاندا 4 كۇندىك جۇمىس اپتاسىنا قانداي سالالار كوشە الاتىنىن ايتتى, دەپ حابارلايدى Egemen.kz.
تامارا دۇيسەنوۆا قازاقستاندا 4 كۇندىك جۇمىس اپتاسىنىڭ نورماسى ەڭبەك كودەكسىندە رەسمي تۇردە بەكىتىلگەنىن ەسكە سالدى.
«بۇل ماسەلەنى قارادىق. ەڭبەك كودەكسىندە كورسەتىلگەن. بۇل – جۇمىس بەرۋشى مەن جۇمىسشىنىڭ اراسىنداعى كەلىسىم. مىسالى, قىستا قوناقۇي قىزمەتكەرلەرى 4 كۇن جۇمىس ىستەي الادى. بىراق تۋريستەر كوپ كەلگەن كەزدە جۇمىس اپتاسى 6 كۇنگە ۇزارتىلۋى مۇمكىن. الايدا 40 ساعاتتىق جۇمىس اپتاسى ساقتالۋى كەرەك», دەدى تامارا دۇيسەنوۆا.
پرەمەر-ءمينيستردىڭ ورىنباسارى جۇمىس اپتاسىنىڭ ۇزاقتىعى ءاربىر ازاماتتىڭ قىزمەت سالاسىنا بايلانىستى ەكەنىن اتاپ ءوتتى.
«مەنىڭ ويىمشا, قىزمەت كورسەتۋ مەن تۋريزم, قوناقۇي بيزنەسى سالاسى 4 كۇندىك جۇمىس اپتاسىمەن جۇمىس ىستەي الادى», دەپ قوستى ول.
ەسكە سالا كەتەيىك, قازاقستاندا 4 كۇندىك جۇمىس اپتاسى وتكەن جىلدىڭ شىلدە ايىندا ەنگىزىلگەن ەدى.