بيىل ماڭعىستاۋ وبلىسىندا رەسپۋبليكالىق «تازا قازاقستان» ەكولوگيالىق اكتسياسى اياسىندا 25 مىڭ تونناعا جۋىق قوقىس شىعارىلدى, سونداي-اق اقتاۋ قالاسى ماڭىنداعى «وندىرىستىك ايماقتا» 35 گەكتار قوقىس ءۇيىندىسى تازالانادى. اكتسياعا اتسالىسپاعان ۇجىم جوق, قانشاما كۇش-قۋات جۇمىلدىرىلدى, الايدا اراعا اپتا سالماي جاتىپ تازالانعان جەرگە تاستالعان قوقىستى كورگەندە كوڭىلىڭ قۇلازىپ سالا بەرەدى...
مىسالى, اتالعان اكتسيا اياسىندا «وتپانتاۋ» تاريحي-مادەني كەشەنىندەگى تازالىق جۇمىستارىنا «تانىم» تابيعي رەسۋرستار باسقارماسىنىڭ ۇيىمداستىرۋىمەن «جاسىل ەل» جاساعى ارالاسىپ, جاستار تازالىق جۇمىسىنا بەلسەنە كىرىستى.
«تازالىق جۇمىسى قارقىندى ءجۇرىپ جاتىر. العاشقى ايالداما — «وندىرىستىك ايماق-3». تازالىق جۇمىسى ەكى ساناتتا جۇرگىزىلەدى. ءبىرىنشىسى, ارنايى تەحنيكانىڭ كۇشىمەن جانە ارنايى كوممۋنالدىق قىزمەتكەرلەردىڭ قولداۋىمەن جۇزەگە اسىرىلادى. بۇل جۇمىستارعا 13 ارنايى تەحنيكا مەن 10 قىزمەتكەر جۇمىلدىرىلىپ, ورتا ەسەپپەن, 25 مىڭ توننا قوقىس شىعارىلدى. «وندىرىستىك ايماق – 3», «اۆتو بيپەك» ماڭىندا جانە «وندىرىستىك ايماق - 3,23», «ۇلكەن ويماشا», «پك ۋروجاي» ماڭىندا زاڭسىز تاستالعان قوقىس ۇيىندىلەرىن تازالاۋ جۇمىستارى جۇرگىزىلدى», دەيدى اقتاۋ قالالىق تكش ءبولىمىنىڭ باسشىسى جانبولات جاقىپوۆ.
جۇمىس ءجۇرىپ جاتىر, الايدا تازالىقتىڭ ساقتالۋى قيىندىق تۋعىزىپ تۇرعانىن جاسىرىپ قاجەتى جوق. بۇل تۇرعىنداردىڭ, قوناقتاردىڭ, تۋريستەردىڭ, جالپى دەمالۋشىلاردىڭ جەكە مادەنيەتىنە قاتىستى جاعداي. ال ماڭعىستاۋ وبلىسى اتالعان اكتسيا اياسىندا العاش رەت قورشاعان ورتانى قورعاۋعا ءوز ۇلەسىن قوسۋشىلار اراسىندا «تانىم» سىيلىعىن تاعايىندادى.
ماڭعىستاۋ وبلىسى