قازاقستاننىڭ سىرتقى ىستەر مينيسترلىگى گرەكيانىڭ گيدرا ارالىنداعى ورماندى ورتەۋ وقيعاسىنا قاتىستى پىكىر ءبىلدىردى, دەپ حابارلايدى Egemen.kz.
سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا, قازاقستان كونسۋلى بۇل وقيعاعا باق-تا جاريالانعاننان كەيىن بىردەن جاۋاپ بەرگەن.
«بۇل اقپارات جاريالانعاننان كەيىن قازاقستان كونسۋلى وسى وقيعا بويىنشا گرەكيا بيلىگىنە حابارلاستى. پوليتسيا ۇستالعاندار اراسىندا قازاقستان ازاماتتارى جوق ەكەنىن جانە ولارعا ەشقانداي شاعىم تۇسپەگەنىن حابارلادى», دەدى ا.سمادياروۆ.
ەستەرىڭىزگە سالا كەتەيىك, بۇعان دەيىن گرەكيا بۇقارالىق اقپارات قۇرالدارى قازاقستاننان كەلگەن تۋريستەر گرەكيانىڭ گيدرا ارالىندا ورمان ءورتىن شىعارعانىن حابارلاعان ەدى.
ماۋسىمنىڭ 21-ءى كۇنى كەشكە دەمالۋشىلار جالعا العان ياحتادان وتشاشۋ ۇيىمداستىرعان. سالدارىنان قاراعايلى ورماندا ءورت تۇتانعان. ءورتتى سوندىرۋگە ءورت سوندىرۋشىلەر مەن ەرىكتىلەر قاتىستى. وعان تىكۇشاق تا تارتىلدى.
بۇقارالىق اقپارات قۇرالدارىنىڭ حابارلاۋىنشا, گيدرا مەرى دجورگوس كوۋكۋداكيس اكىمشىلىك ءورتتى تۋدىرعان شەتەلدىكتەردى سوتقا بەرمەك نيەتتە ەكەنىن ايتتى. ءورت كەزىندە كەمەدە بولعانداردىڭ بارلىعى, ونىڭ ىشىندە ەكيپاج مۇشەلەرى دە ۇستالدى.