داعىستانداعى پراۆوسلاۆيە شىركەۋى مەن سيناگوگاعا لاڭكەستىك ارەكەتتەر جاسالدى. ءسالدارىنان دىن جانە قۇقىق قورعاۋ ورگاندارى قىزمەتكەرلەرى قازا بولدى. وسىعان بايلانىستى داعىستان اۋماعىندا ءۇش كۇن ازا تۇتۋ كۇنى بولىپ جاريالاندى, دەپ جازادى Egemen.kz.
بۇل تۋرالى داعىستان رەسپۋبليكاسىنىڭ باسشىسى سەرگەي مەليكوۆتىڭ اكىمشىلىگى Telegram ارناسىندا حابارلادى.
«24, 25, 26 ماۋسىم كۇندەرى داعىستاندا ازا تۇتۋ كۇنى دەپ جاريالاندى. جارلىققا سەرگەي مەليكوۆ قول قويدى», دەلىنگەن حابارلامادا.
بۇل كۇندەرى رەسپۋبليكا اۋماعىنداعى تۋلار جارتىلاي تومەن تۇسىرىلەدى. سونداي-اق وڭىردە ورنالاسقان مادەنيەت مەكەمەلەرى مەن تەلەراديوكومپانيالار ويىن-ساۋىقتىق باعدارلامالاردى كورسەتۋدى توقتاتادى.
داعىستان بيلىگى قازا بولعاندار مەن زارداپ شەككەندەردىڭ وتباسىنا كومەك كورسەتىلەتىنىن مالىمدەدى.
روسسيا داگەستان پورتالىنىڭ مالىمەتىنشە, سودىرلاردىڭ دەربەنت پەن ماحاچكالاعا جاساعان شابۋىلى سالدارىنان 10 ادام قازا تاپقان, ونىڭ سەگىزى قۇقىق قورعاۋ ورگانىنىڭ قىزمەتكەرى. سونىمەن بىرگە, 16 ادام جاراقات العانى بەلگىلى بولدى. ونىڭ ۇشەۋى بەيبىت تۇرعىندار.