جەتىساي اۋدانىنىڭ ءبىلىم ءبولىمىنىڭ قىزمەتكەرلەرىنە قاتىستى مەملەكەتتىك قاراجاتتى اسا ءىرى مولشەردە جىمقىرۋ فاكتىسى بويىنشا سوتقا دەيىنگى تەرگەپ-تەكسەرۋدى جالعاستىرۋدا, دەپ حابارلايدى Egemen.kz اقپارات اگەنتتىگى.
ءبىلىم ءبولىمى باسشىلىعى مەن ەسەپشىلەردى قوسا ەسەپتەگەندە, 41 ادام كۇدىككە ءىلىنىپ وتىر. وبلىستىق پروكۋراتۋرانىڭ حابارلاۋىنشا, قىلمىستىق ارەكەتتەر 2021-2023 جىلدار ارالىعىندا جاسالعان.
- تەرگەۋ بارىسىندا اۋداندىق ءبىلىم ءبولىمىنىڭ باسشىلىعى مەن ەسەپشىلەرى وزدەرىنىڭ, سونداي-اق تۋىستارى مەن تانىستارىنىڭ ەسەپ شوتتارىنا بەلگىلەنگەن جالاقىدان جوعارى اقشا اۋدارۋ ارقىلى بيۋدجەت قاراجاتىن جىمقىرۋدىڭ قىلمىستىق سحەماسىن جاساعانى انىقتالدى. 2021-2023 جىلدار ارالىعىندا مەملەكەتكە 4 ملرد تەڭگەدەن استام زالال كەلتىرىلگەن, - دەپ جازدى تۇركىستان وبلىستىق پروكۋراتۋراسى.
وبلىس پروكۋراتۋراسىنىڭ ارنايى پروكۋرورلارى 41 قىزمەتكەردى, ونىڭ ىشىندە ەكى ءبىلىم ءبولىمىنىڭ باسشىسىن, ءبىر باس ەسەپشى, ەكى ورىنباساردى جانە 36 ەسەپشىنى كۇدىكتى رەتىندە تانىدى.
- اۋداننىڭ بۇرىنعى جانە قازىرگى ءبىلىم ءبولىمىنىڭ باسشىلارى ۇستاۋ يزولياتورىنا جابىلىپ, سوتتىڭ سانكتسياسىمەن قاماۋعا الىندى. قازىرگى ۋاقىتتا قىلمىستىق جولمەن الىنعان اقشانى جانە وزگە دە م ۇلىكتى زاڭداستىرۋدىڭ بارلىق ءمان-جايلارى مەن فاكتىسىن انىقتاۋعا باعىتتالعان تەرگەۋ ارەكەتتەرى جۇرگىزىلۋدە. وزگە اقپاراتتار قپك 201-بابىنىڭ تالاپتارىنا سايكەس جاريالانۋعا جاتپايدى, - دەلىنگەن ۆەدومستۆو حابارلاماسىندا.