ماڭعىستاۋ وبلىسىندا «تازا قازاقستان» رەسپۋبليكالىق ەكولوگيالىق اكتسياسى تاريحي-مادەني ورىنداردا جالعاسىن تاۋىپ, اتالعان ورىنداردىڭ كەلىپ-كەتۋشىلەرگە قولايلى, تازا بولۋىنا ۇلەس قوستى.
ماڭعىستاۋ اۋدانىندا اكتسيا اياسىنداعى كەزەكتى تازالىق جۇمىستارى «جاسىل ەل» جاستار جاساعىنان 20 جاس بەلسەندىنىڭ قاتىسۋىمەن «وتپان تاۋ تاريحي-مادەني كەشەنىنىڭ» اۋماعىندا جۇرگىزىلدى. ەرىكتىلەر تۇرمىستىق قالدىقتاردى جيناپ, عيمارات ءىشىن جانە وعان ىرگەلەس اۋماقتى كۇل-قوقىستان تازالادى.
ەكولوگيالىق اكتسيا اياسىندا ماڭعىستاۋ اۋدانىندا «ىبىقتى ساي» شاتقالىنىڭ, توبىقتىداعى «بەكەت اتا» جەراستى مەشىتىنىڭ, «ماسات اتا» قورىمىنىڭ اۋماعىندا, سونداي-اق اقمىش پەن شەرقالادا سەنبىلىكتەر ۇيىمداستىرىلعان بولاتىن. سونداي-اق وڭدى اۋىلىندا 200 اعاش, جىڭعىلدى جانە جارمىش اۋىلدارىندا 100 اعاش جانە شەبىردە 30 اعاش وتىرعىزىلعان بولاتىن.
تۇپقاراعان اۋدانىنىڭ اقشۇقىر اۋىلىندا ورنالاسقان «قوشقار اتا» قورىمىندا م.وسكىنباەۆ اتىنداعى ماڭعىستاۋ وبلىستىق فيلارمونياسىنىڭ قىزمەتكەرلەرى مەن ق.سىديىقوۆ اتىنداعى ماڭعىستاۋ وبلىستىق امبەباپ كىتاپحاناسىنىڭ قىزمەتكەرلەرى تازالاۋ جۇمىستارىن جۇرگىزدى. جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە, سونداي-اق ماڭعىستاۋ وبلىسىنىڭ وڭىرلىك ماڭىزى بار كيەلى وبەكتىلەرىنىڭ تىزىمىنە ەنگىزىلگەن قورىمنان زەرتتەۋ جۇمىسىنىڭ ناتيجەسىندە 81 ەسكەرتكىش بەكىتىلگەن.
«تازا قازاقستان» اكتسياسىنا ۇلەس قوسۋدان مۇنايلى اۋدانى دا قالىس قالعان جوق. ن.ءجانتورين اتىنداعى ماڭعىستاۋ وبلىستىق مۋزىكالىق-دراما تەاترىنىڭ ارتىستەرى, ماڭعىستاۋ وبلىسى مەملەكەتتىك مۇراعاتىنىڭ ۇجىمى, سونداي-اق «ماڭعىستاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنا قاراستى «وتپان» مكقك ۇجىمىنىڭ قاتىسۋىمەن باياندى اۋىلىنىڭ ماڭىنداعى «بەردىبەك اۋليە» قورىمىنىڭ اۋماعىندا جالعاستى. جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزىلگەن «بەردىبەك اۋليە» قورىمىندا قۇلپىتاستار, تاس قورشاۋلار جانە تاستان جاسالعان ءارتۇرلى ءپىشىن بار. مۇنداعى باستى نىسان كۇمبەزتامنىڭ ەڭ ەجەلگىسىنىڭ قۇرىلىس تاستارى جارتىلاي وڭدەلگەن ۇلۋتاستاردان ساز بالشىق ارالاستىرىلىپ كولدەنەڭ قالانۋىمەن ەرەكشەلەنەدى.
«تازا قازاقستان» اكتسياسى قاراقيا اۋدانىنداعى «بوزجىرا» شاتقالىنىڭ اۋماعىندا «قىزىلساي مەملەكەتتىك وڭىرلىك پاركى» كمم ينسپەكتورلارى مەن بەلسەندى جاستاردىڭ قاتىسۋىمەن جالعاستى. جىل باسىنان بەرى «جابايۇشقان» مەملەكەتتىك قورىعىنىڭ اۋماعىندا ورنالاسقان «بوزجىرا» شاتقالىنا ءارتۇرلى ەلدەن جۇزدەگەن تۋريست كەلدى دەسەك, تۋريستەردىڭ كوپ بولۋىنا بايلانىستى ءارتۇرلى قالدىق تا كوپ جينالادى. اكتسيا بارىسىندا 20 قاپتان استام ءتۇرلى قوقىس جينالىپ, ارنايى پوليگونعا جونەلتىلدى. «جابايۇشقان» قورىعىنىڭ باسشىسى ج.ەسەنعاليەۆ تۋريستىك اۋماققا كەلەتىن جاستارعا اۋماقتى تازا ۇستاۋ, ءورت قاۋىپسىزدىگى ەرەجەلەرىنە قاتاڭ نازار اۋدارۋ, بيىك شىڭدارى بار جارتاستارعا جاقىنداماۋ, بارىنشا قاۋىپسىزدىك شارالارىن ساقتاۋ بويىنشا ءتۇسىندىرۋ جۇمىستارىن جۇرگىزدى.
ماڭعىستاۋ وبلىسىندا «تازا قازاقستان» ەكولوگيالىق اكتسياسىن جۇرگىزۋ بەلسەندى ىسكە اسىرىلىپ جاتىر. تۇرعىندار مەن قوناقتار تازالىق-ءتارتىپتى ساقتاپ, تازالانعان جەرلەردى ءتۇرلى قوقىس-قالدىقتارعا تولتىرماي, جان-جاعىن, دەمالعان ورىندارىن جيناپ ءجۇرۋدى ۇيرەنسە, اكتسياعا ۇلەس قوسقان ءاربىر جاننىڭ ەڭبەگىنىڭ اقتالعانى بولار ەدى.
ماڭعىستاۋ وبلىسى