اتىراۋ قالاسىنىڭ №2 سوتىندا ماقات اۋداننىڭ بۇرىنعى اكىمى رينات يبراگيموۆكە قاتىستى ماتەريالدىق نەمەسە وزگە دە تاۋەلدىلىكتە بولعان ايەلىنە قاتىستى دەنساۋلىققا قاساقانا اۋىرلىعى ورتاشا زيان كەلتىرۋ فاكتىسى بويىنشا قىلمىستىق ءىس قارالدى, دەپ جازادى Egemen.kz.
سوتتاعى تەرگەۋ بارىسىندا ەكس-اكىم 2023 جىلعى 31 مامىردا ايەلىمەن جانجالداسىپ, ۋ.ا.-نى ەدەنگە قۇلاتقان جانە سول جاق سانىنان بىرنەشە رەت تەپكىلەگەن. سالدارىنان جابىرلەنۋشىنىڭ 5-ءشى ومىرتقاسىنىڭ سىنعانى ساراپتاما نەگىزىندە دالەلدەندى.
«بۇل قىلمىس زاڭ بويىنشا ورتاشا اۋىرلىق دارەجەسىنە جاتقىزىلادى. سوتپەن جازا ءتۇرىن تاڭداۋ كەزىندە ي.ر.-نىڭ بۇرىن سوتتىلىعى جوقتىعى, مىنەزى وڭ سيپاتتالعانى ەسكەرىلدى. سوت ۇكىمىمەن ي.ر.-عا 2 جىلعا باس بوستاندىعىن شەكتەۋ جازاسى تاعايىندالدى», دەلىنگەن جوعارعى سوت حابارلاماسىندا.
ال جابىرلەنۋشىنىڭ 20 ملن تەڭگە مورالدىق شىعىن ءوندىرۋ تۋرالى ازاماتتىق تالابىن سوت ءىشىنارا شەشتى. ي.ر. جابىرلەنۋشى ۋ.ا-عا 2 ملن تەڭگە مورالدىق شىعىندى وتەيدى.سوتتىڭ ۇكىمى زاڭدى كۇشىنە ەنگەن جوق.