قۇرىلعانىنا ەكى جىلدان ءسال اسقان جاڭا وبلىسقا ىشتەن دە, سىرتتان دا سىن كوزبەن قارايتىندار بارشىلىق. كەمشىن تۇسقا كوڭىل تولماي, جاقسىلىققا جۇرەك جارىلا قۋانۋ ادامي سەزىمگە بايلانىستى بولسا, وبلىس ەكونوميكاسىنىڭ العا باسۋى, دامۋى ناقتى قادامدارعا, سونىڭ ىشىندە ينۆەستيتسيالىق جوبالارعا بايلانىستى ەكەنى بەلگىلى.
مەملەكەت باسشىسىنىڭ 50 ميلليون دوللاردان كوپ قارجى سالۋعا دايىن ءىرى كومپانيالارعا ء«بىر تەرەزە» قاعيداتىمەن جان-جاقتى قولداۋ كورسەتۋ تۋرالى تاپسىرماسى بار. جاڭا ءتارتىپتىڭ ارتىقشىلىعى – ينۆەستورلاردىڭ قۇجاتتى جيناۋ مەن دايىنداۋعا قاتىسۋىن بارىنشا ازايتادى جانە ولاردىڭ مەملەكەتتىك ورگاندارمەن تىكەلەي بايلانىسىن شەكتەۋدى كوزدەيدى. قاجەتتى ۇيىمداردىڭ قىزمەتكەرلەرى ءبىر جەردە وتىرعاندىقتان, ينۆەستورلار ءتيىستى رۇقسات قاعازدارىن ءبىر جەردەن الا الادى. ۇلىتاۋ وبلىسىندا ء«بىر تەرەزە» قاعيداتىمەن « ۇلىتاۋ» الەۋمەتتىك-كاسىپكەرلىك كورپوراتسياسى بازاسىندا ينۆەستورلارمەن جۇمىس جونىندەگى فرونت-وفيس اشۋ جۇمىستارى جۇرگىزىلىپ جاتىر.
ءوز كەزەگىندە وتاندىق جانە شەتەلدىك ينۆەستورلارعا ەكولوگيالىق نورمالاردى ساقتاۋ, جاڭا جۇمىس ورىندارىن قۇرۋ, وبلىسقا ينۆەستيتسيا قۇيۋ جانە الەۋمەتتىك مىندەتتەمەلەردى ورىنداۋ سياقتى تالاپتار قويىلادى. ەگەر ينۆەستورلار قانداي دا ءبىر زاڭسىز كەدەرگىگە تاپ بولسا, پروكۋراتۋرا ورىندارىنا شاعىمدانا الادى. وڭىردە باس پروكۋروردىڭ بۇيرىعىمەن «ينۆەستورلاردى قورعاۋ بويىنشا پروكۋرورلىق فيلتر» جوباسى ەنگىزىلىپ, جۇمىس ىستەپ تۇر. ينۆەستيتسيا سالاسىنداعى زاڭنامانىڭ ساقتالۋىن قامتاماسىز ەتۋگە جانە زاڭسىز ارەكەتتەردىڭ الدىن الۋعا باعىتتالعان جوبا جەمىسىن بەرىپ كەلەدى. ويتكەنى بۇل ينۆەستورلار مەن مەملەكەت اراسىندا تىعىز بايلانىس ورناتۋدىڭ ءبىر تەتىگىنە اينالدى. وسىنداي ناقتى قادامداردىڭ ناتيجەسىندە ايماققا شەتەلدىك ينۆەستورلار كەلىپ, العاشقى جوبالارىن باستاپ تا كەتتى.
«جالپى, وبلىستا شەتەل ينۆەستورلارىمەن بايلانىس ورناتۋعا جۇيەلى جۇمىس جۇرگىزىلىپ جاتىر. قازىر جالپى قۇنى 560 ملرد تەڭگە بولاتىن تىكەلەي شەتەلدىك (قىتاي) ينۆەستيتسيا كومەگىمەن جاڭارتىلاتىن ەنەرگيا كوزدەرى سالاسىنداعى جوبالار ىسكە اسىرىلىپ جاتىر. ولاردىڭ اراسىندا بيىل جەلتوقسان ايىندا پايدالانۋعا بەرىلەتىن قۇنى 35 ملرد تەڭگە تۇراتىن جەزقازعان جانە ساتباەۆ قالالارىنداعى جەل ەلەكتر ستانساسى, جاڭاارقا اۋدانىنداعى قۋاتى 3,4 ملرد كيلوۆاتت/ساع بولاتىن جەل ەنەرگەتيكالىق ستانساسىنىڭ قۇرىلىسى مەن جەزقازعان قالاسىنداعى جەل ەنەرگەتيكالىق ستانساسى مۇنارالارىنىڭ مەتالل كونسترۋكتسيالارىن وندىرەتىن زاۋىت سەكىلدى جوبالار بار», دەيدى ۇلىتاۋ وبلىسى كاسىپكەرلىك جانە ونەركاسىپ باسقارماسىنىڭ باسشىسى دانيار ارىنعازين.
ايتۋىنشا, وبلىسقا ينۆەستيتسيا تارتۋ كولەمى وسكەن. 2023 جىلدىڭ قورىتىندىسىندا نەگىزگى كاپيتالعا 210 ملرد تەڭگە كولەمىندە ينۆەستيتسيا سالىندى. 2022 جىلمەن سالىستىرعاندا ءوسىم 35%-عا ۇلعايدى (2022 جىلى 155,6 ملرد تەڭگە ينۆەستيتسيا سالىنعان).
بيىل 280 ملرد تەڭگە كولەمىندە ينۆەستيتسيا سالۋ جوسپارلانىپ وتىر. وبلىس كولەمىندە 2023–2027 جىلدارعا ارنالعان 1 955 جۇمىس ورنىن قۇرۋ ءۇشىن جالپى قۇنى 741 ملرد تەڭگەگە 27 ينۆەستيتسيالىق جوبانىڭ پۋلى قالىپتاستىرىلعان.
ينۆەستيتسيا تارتۋ ارقىلى ەكونوميكا العا جىلجيدى. جۇمىس ورىندارى اشىلادى. جاڭا قىزمەت تۇرلەرى پايدا بولىپ, ءونىم وندىرىلەدى. ايماقتا ينۆەستيتسيالىق جوبالاردىڭ قارقىن الىپ كەلە جاتقانى قۋانتادى. بۇل جاڭا وبلىستىڭ كەمەل كەلەشەگىنىڭ كەپىلى ىسپەتتى.
ۇلىتاۋ وبلىسى