وتكەن جەكسەنبىدە مەديتسينا قىزمەتكەرىنىڭ كاسىبي مەرەكەسىن اتاپ وتتىك. ەل ازاماتتارىنىڭ ءومىرى مەن دەنساۋلىعىن ساقتاۋ مەديتسينا سالاسىندا ەڭبەك ەتىپ جۇرگەن ءار ماماننىڭ باستى ميسسياسى دەپ بىلەمىز. بۇل مىندەتتى ورىنداۋ اسقان جاۋاپكەرشىلىكتى, ادالدىقتى, ادامگەرشىلىك پەن قايىرىمدىلىقتى, ەسىل ەڭبەكتى قاجەت ەتەدى. سول ءۇشىن دە ەل-جۇرت مەديتسينا قىزمەتكەرلەرىنىڭ ەڭبەگىن جوعارى باعالايدى.
باسقارۋ ىسىنە وزگەرىس ەنگىزىلەدى
دەنساۋلىق ساقتاۋ سالاسىنىڭ دامۋى – پرەزيدەنت قاسىم-جومارت توقاەۆتىڭ نازارىندا. مىسالى, جاقىندا مەملەكەت باسشىسى ەكى ماڭىزدى مەديتسينالىق نىساندى ارالادى. سونىڭ ءبىرى – بيىلعى تامىز ايىندا اشىلادى دەپ جوسپارلانعان ۇلتتىق عىلىمي ونكولوگيا ورتالىعىنىڭ جاڭا كورپۋسى بولسا, ەكىنشىسى – ۇلتتىق شۇعىل مەديتسينانى ۇيلەستىرۋ ورتالىعى. ەكى ورتالىق تا مەديتسينالىق قىزمەتتەردىڭ ساپاسىن ارتتىرۋعا جانە ازاماتتاردىڭ دەنساۋلىعىن نىعايتۋعا دايىن ەكەنىن كورسەتتى.
ەلدەگى 3 323 امبۋلاتوريالىق-ەمحانالىق ۇيىمدا جانە 872 ستاتسيوناردا 81,3 مىڭ دارىگەر, جوعارى مەديتسينالىق ءبىلىمى بار 5,2 مىڭ مەيىرگەر جانە 190,6 مىڭ ورتا مەديتسينا قىزمەتكەرى جۇمىس ىستەيدى. ءدال وسىنداي ۇيىمدارمەن قوسا تاجىريبەسى تولىسقان مەديتسينا ماماندارى وتانداستارىمىزدىڭ ءومىر ءسۇرۋ ۇزاقتىعىن ارتتىرىپ, اۋرۋ-سىرقاۋدان بولاتىن ءولىمدى ازايتۋعا ۇلەس قوسادى.
كەيىنگى 5 جىلدىڭ شاماسىندا ەلدە ءومىر ءسۇرۋ ۇزاقتىعى 2 جاسقا (73-تەن 75 جاسقا دەيىن) ارتىپ, جالپى ءولىم – 9%-عا, انا ءولىمى – 16,8%-عا, نارەستە ءولىمى – 8,5%-عا, قاناينالىم جۇيەسىنىڭ اۋرۋلارىنان بولاتىن ءولىم – 11,9%-عا جانە قاتەرلى ىسىكتەردەن بولاتىن ءولىم 15,3%-عا تومەندەدى. سالانى قارجىلاندىرۋ كولەمى دە جوسپارلى تۇردە ءوسىپ كەلەدى. بىلتىر ءبىز 4,7 ترلن تەڭگە ناقتى بەلگىگە نەمەسە ىشكى جالپى ءونىمنىڭ 4%-ىنا جەتتىك. بۇل سومانىڭ 67%-ى مەملەكەتكە, 33%-ى جەكە شىعىستارعا تيەسىلى.
دەنساۋلىق ساقتاۋ مينيسترلىگى مەن بۇكىل مەملەكەتتىك اپپارات مەملەكەتتىك كوزدەردەن بولىنەتىن قاراجاتتىڭ ەسەسىنە ازاماتتاردىڭ ەم-شاراعا جۇمسايتىن شىعىنىن ازايتىپ, مەديتسينالىق كومەكتى بارىنشا قولجەتىمدى ەتۋگە كۇش سالادى. وسىلايشا, نەگىزگى باسىمدىق مەديتسينالىق كومەكتە جانە اۋرۋلار پروفيلاكتيكاسىنىڭ بارلىق دەڭگەيىندە قاراجاتتى ءتيىمدى پايدالانىپ, اشىقتىقتى ارتتىرۋعا باعىتتالادى.
دەنساۋلىق ساقتاۋ – مەملەكەت كوپ كوڭىل بولەتىن الەۋمەتتىك ماڭىزدى سالانىڭ ءبىرى. كەيىنگى جىلدارى سالادا كوپتەگەن رەفورما ىسكە استى. الايدا الەۋمەتتىك مىندەتتى مەديتسينالىق ساقتاندىرۋ جۇيەسىنە قاتىستى بىرنەشە سۇراق الاڭداتتى. «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس بارلىق تاراپتا تەپە-تەڭدىكتى ساقتاۋدى ەسكەرە وتىرىپ, ءبىز قوعامنىڭ سۇرانىستارى مەن ازاماتتاردىڭ مۇددەلەرىنە ۋاقتىلى جاۋاپ بەرۋگە تىرىسامىز. سوندىقتان ءاربىر ارىز-شاعىم ءبىز ءۇشىن وتە ماڭىزدى.
سۋرەتتى تۇسىرگەن – ەرلان ومار, «EQ»
مەملەكەت باسشىسى بيىل 7 اقپاندا جاڭا ۇكىمەتتىڭ الدىنا مەملەكەتتىك قاراجاتتىڭ جۇمسالۋىنا ءتيىستى باقىلاۋدى, اشىقتىقتى قامتاماسىز ەتىپ, مەديتسينالىق كومەك ساپاسىن ارتتىرۋدى تاپسىردى. سونداي-اق مەديتسينالىق كومەكتىڭ بىرىڭعاي پاكەتىن ەنگىزىپ, ازاماتتاردىڭ جەكەلەگەن الەۋمەتتىك ءالسىز ساناتتارىن, اسىرەسە اۋىلدىق جەرلەردە مەديتسينالىق ساقتاندىرۋمەن قامتۋدى كەڭەيتۋ جايىن باسشىلىققا العانى بەلگىلى.
دەنساۋلىق ساقتاۋ مينيسترلىگى جۇيەلى دياگنوستيكا جۇرگىزىپ, مىندەتتى مەديتسينالىق ساقتاندىرۋ جۇيەسىندەگى جانە جالپى سالاداعى ماسەلەلەردىڭ سەبەپ-سالدارىن انىقتادى. بۇگىندە ءبىز دەنساۋلىق ساقتاۋ جۇيەسىنىڭ بارلىق باسقارۋ بۋىندارىندا ىركىلىستى جويۋ بويىنشا جۇمىس ىستەپ جاتىرمىز. ماتەريالدىق جانە قارجىلىق رەسۋرستاردى باسقارۋ بويىنشا ينستيتۋتسيونالدىق نەگىز قۇرۋدامىز. ناتيجەگە قول جەتكىزۋ ءۇشىن باسقارۋدىڭ بارلىق دەڭگەيلەرىندە دەربەس جاۋاپكەرشىلىكتى ارتتىردىق.
ساقتاندىرۋ جۇيەسىنىڭ ماڭىزى
ەندى مەديتسينالىق كومەك كورسەتۋدىڭ بارلىق جۇيەسىن قايتا قۇرىپ, بولىنەتىن قاراجاتتىڭ اشىقتىعى مەن تيىمدىلىگىن قامتاماسىز ەتۋ قاجەت. دەنساۋلىق ساقتاۋ جۇيەسىن مەملەكەتتىك باسقارۋ ساپاسىن ارتتىرۋمەن قاتار بىرىڭعاي پاكەتتى قالىپتاستىرىپ, قارجىلاندىرۋدىڭ ارالاس مودەلىنەن ساقتاندىرۋ مودەلىنە ءوتۋ وزەكتى بولىپ وتىر. الدا مىندەت كوپ. مىسالى, دەنساۋلىق ساقتاۋ جۇيەسىنىڭ ازاماتتاردىڭ قاجەتتىلىكتەرى مەن مۇددەلەرىنە جاۋاپتىلىعىن قامتاماسىز ەتۋ كەرەك. ساقتاندىرىلماعان ازاماتتار ءۇشىن دياگنوستيكا مەن ەمدەۋدىڭ جەكەلەگەن تۇرلەرىنىڭ قولجەتىمدىلىگىن جانە مەديتسينالىق ساقتاندىرۋ قورى قىزمەتىنىڭ اشىقتىعىن ارتتىرۋ مىندەتى تۇر.
دەنساۋلىق ساقتاۋ مينيسترلىگى تولىققاندى ۆەدومستۆولىق ستاتيستيكانى جەتىلدىرۋ بويىنشا جۇمىس ىستەپ كەلەدى. بۇل – ەلىمىزدىڭ دەنساۋلىق ساقتاۋ جۇيەسىن دامىتۋداعى ترەندتەردى جانە مەملەكەتتىك كىرىستەردىڭ ەلەۋلى كولەمىنىڭ تۇپكىلىكتى ناتيجەسىن سەنىمدى باعالاۋعا مۇمكىندىك بەرەدى.
مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىستى ايتىلعان سىن-پىكىرلەرگە قاراماستان, بۇل جۇيەنى ساقتاۋ قاجەت. ويتكەنى بۇل سالاعا جىلىنا 1,4 ترلن تەڭگەدەن استام, ونىڭ ىشىندە رەسپۋبليكالىق بيۋدجەتتەن تىس 1 ترلن تەڭگە تابىس اكەلەدى. مەملەكەتكە سالانى قارجىلاندىرۋدىڭ وسى كوزىنىڭ شىعىندارىن وتەۋ قيىنعا سوعادى. قوعامنىڭ سالا قاراجاتىن پايدالانۋدىڭ اشىقتىعى مەن تيىمدىلىگىنە قاتىستى سىنى نەگىزدى. ەكونوميكالىق جانە قارجىلىق مەنەدجمەنت پەن ۇيلەستىرۋ دەڭگەيىن ارتتىرۋ ءۇشىن دەنساۋلىق ساقتاۋ مينيسترلىگىنىڭ وزىندە باسقارۋ قۇرىلىمى جەتىلدىرىلدى.
مەديتسينالىق كومەكتىڭ بىرىڭعاي پاكەتىن ازىرلەۋ بويىنشا جۇمىس باستالدى. ول – مەملەكەت كەپىلدىك بەرگەن بازالىق بولىكتەن جانە سالانىڭ قولدا بار رەسۋرستارىن ەسكەرە وتىرىپ, جۇمىس بەرۋشىلەر مەن ازاماتتاردىڭ ءوز اۋدارىمدارىنىڭ ەسەبىنەن قالىپتاساتىن ساقتاندىرۋ بولىگىنەن تۇرادى. بۇل مىندەت 2027 جىلعا دەيىن كەزەڭ-كەزەڭىمەن ىسكە اسادى.
ساپالى قىزمەتكە نە كەدەرگى؟
دارىگەرلەردىڭ مىندەتتەرىنە كوپتەگەن مەديتسينالىق اقپاراتتىق جۇيەلەرگە دەرەكتەردى ەنگىزۋ فۋنكتسياسى ەنىپ, بۇل دارىگەردىڭ پاتسيەنتتىڭ پروبلەمالارىن شەشۋدەگى باستى ميسسياسىنان ايىردى. بۇگىندە دارىگەر العاشقى قابىلداۋ كەزىندە پاتسيەنتتى قابىلداۋعا ارنالعان نورماتيۆ بويىنشا 15-20 مينۋتتان تۇراتىن اقپاراتتىق جۇيەلەرگە مالىمەتتەردى ەنگىزۋگە شامامەن 13 مينۋت جۇمسايدى. حالىقتىڭ نارازىلىعىن تۋدىراتىن ماسەلەلەردىڭ ءبىرى – وسى.
وسىعان بايلانىستى ستاندارتتاردى, كلينيكالىق حاتتامالاردى, پاتسيەنتتەردىڭ مارشرۋتتارىن جانە «الەۋمەتتىك مەديتسينالىق ساقتاندىرۋ قورى» كەاق-پەن ءوزارا ءىس-قيمىل ءتارتىبى مەن قاعيدالارىن قايتا قاراۋ بويىنشا جۇمىس باستالدى.
اۋىلدا مەديتسينالىق كومەكتىڭ قولجەتىمدىگى مەن ساپاسىن جاقسارتۋ ءۇشىن 2023 جىلدان باستاپ اۋىلدىق ەلدى مەكەندەردى 655 جاڭا مەديتسينالىق-سانيتاريالىق العاشقى كومەك نىسانىمەن قامتاماسىز ەتۋ ماسەلەسىن, 32 اۋداندىق ورتالىق اۋرۋحانانى جاڭعىرتۋ جولىمەن شۇعىل مەديتسينالىق كومەك ساپاسىن ارتتىرۋدى, اۋىلدىق جەرلەردە ەڭبەك ەتۋگە 1 100 مەديتسينا قىزمەتكەرىن دايارلاۋ جوسپارىن قامتيتىن «اۋىلدا دەنساۋلىق ساقتاۋدى جاڭعىرتۋ» قاناتقاقتى ۇلتتىق جوباسى ىسكە اسىپ جاتىر. مۇنداعى جوبا-جوسپارلار اۋرۋ-سىرقاۋدى ەرتە انىقتاۋعا, پروفيلاكتيكا مەن سكرينينگتىك باعدارلامالاردى جاقسارتۋعا, اۋىل تۇرعىندارىنا مەديتسينالىق كومەك كورسەتۋدىڭ جاڭا تاسىلدەرىن ەنگىزۋگە مۇمكىندىك بەرەدى.
دەنساۋلىق ساقتاۋ ينفراقۇرىلىمىن دامىتۋدىڭ 2030 جىلعا دەيىنگى ۇزاقمەرزىمدى تۇجىرىمداماسى بەكىتىلدى. تۇجىرىمدامانى ىسكە اسىرۋدىڭ ءبىرىنشى كەزەڭى 34 باستى جوبادا كوزدەلگەن دەنساۋلىق ساقتاۋدىڭ نەگىزگى نىساندارىن جوبالاۋ مەن سالۋدى قامتيدى. سونداي-اق 2024-2026 جىلدارعا بولىنگەن قارجىلاندىرۋ شەگىندە مەديتسينالىق مەكەمەلەردى كۇردەلى جوندەۋ جانە جاراقتاندىرۋ جونىندەگى جۇمىس جالعاسادى. ەكىنشى كەزەڭدە جاڭا قۇرىلىس, جوندەۋ جانە تولىق جاراقتاندىرۋ جولىمەن 2,5 مىڭ مەديتسينالىق نىساندى جاڭعىرتۋ جوسپارلاندى.
بيىل 1 ماۋسىمنان باستاپ بوساندىرۋ, نەوناتولوگيا, بالالار نەۆرولوگياسى, بالالار اللەرگولوگياسى, رەۆماتولوگيا بويىنشا مەديتسينالىق كومەك كورسەتەتىن ۇيىمدار ءۇشىن تاريفتەردىڭ مولشەرى ارتىپ كەلەدى. قىركۇيەككە قاراي قاجەتتى راسىمدەردىڭ اياقتالۋىنا بايلانىستى ابدومينالدىق حيرۋرگيا, ينفەكتسيا, نەۆرولوگيا, گاستروەنتەرولوگيا, كارديولوگيا, تراۆماتولوگيا جانە ورتوپەديا, نەفرولوگيا, ەندوكرينولوگيا, ونكوگەماتولوگيا سياقتى باعىتتار بويىنشا تاريفتەردى كوتەرۋ جوسپارلانىپ جاتىر.
قابىلدانعان ءىس-شارالار حالىقتىڭ ساپالى مەديتسينالىق كومەككە قولجەتىمدىلىگىن قامتاماسىز ەتۋگە, ازاماتتاردىڭ شىعىستارىن ازايتۋعا, سونداي-اق مەديتسينالىق ۇيىمداردىڭ شىعىن قاۋپىنىڭ دەڭگەيىن تومەندەتۋگە ارنالعان. وسىعان قوسا ستاتيستيكانىڭ قولجەتىمدىگى مەن دۇرىستىعى, ونىڭ ىشىندە كادر جانە ماتەريالدىق-تەحنيكالىق رەسۋرستاردى باسقارۋ جۇيەسى بويىنشا پروبلەمالاردى شەشۋ تالاپ ەتىلەدى. بۇل سالانىڭ وسى باعىتتارىن ساپالى جوسپارلاۋعا جانە باسقارۋعا مۇمكىندىك بەرەدى.
بوساندىرۋ جانە بالالار قىزمەتىن جەتىلدىرۋگە ەرەكشە كوڭىل بولىنەدى. قازىر ەلىمىزدە ورتا ەسەپپەن ءبىر تاۋلىكتە مىڭعا جۋىق نارەستە دۇنيەگە كەلەدى. جىل سايىن 400 مىڭنان استام جۇكتى ايەل امبۋلاتوريالىق قىزمەت ماماندارىندا باقىلاۋدا بولادى. جۇكتى ايەلدەر مەن جاڭا تۋعان نارەستەلەردىڭ دەنساۋلىعىن ساقتاۋ جانە پاتولوگيالارىن ەرتە انىقتاۋ ءۇشىن 11 ميلليوننان استام نارەستەنى قامتيتىن سكرينينگتەر جۇرگىزىلەدى. ء«بىر كۇندىك كلينيكا» قاناتقاقتى جوباسى ەنگىزىلۋدە. جوبا بارلىق وڭىرلەردە كەزەڭ-كەزەڭىمەن ىسكە اسادى. بۇل پرەناتالدىق دياگنوستيكانىڭ يننوۆاتسيالىق ادىستەرىن قولدانۋعا جانە پاتولوگياسى بار بالالاردىڭ تۋ قاۋپىن ۋاقتىلى انىقتاۋعا مۇمكىندىك بەرەدى.
تۇرعىندارعا مامانداندىرىلعان مەديتسينالىق كومەك كورسەتۋ تاسىلدەرى قايتا قارالادى. العاشقى ءىس-شارالار قازىردىڭ وزىندە قابىلداندى. بيىل ناۋرىز ايىنان باستاپ جوسپارلى ەمدەۋگە جاتقىزۋعا ارنالعان تالداۋلاردىڭ تىزبەسى 42 زەرتتەۋگە قىسقاردى. تالداۋلاردىڭ جارامدىلىق مەرزىمى 3-6 ەسەگە ۇلعايدى. سونداي-اق پاتسيەنتتەردىڭ مارشرۋتتارىن وڭتايلاندىرۋ بويىنشا ءىس-شارالار قابىلداندى.
دەنساۋلىق ساقتاۋ جۇيەسىن ودان ءارى دامىتۋ جانە اعىمداعى جاعدايلاردا قالىپتى جۇمىس ىستەۋدى قامتاماسىز ەتۋ تەتىكتەرىن ازىرلەۋ بويىنشا جۇمىس جۇرگىزىلىپ جاتىر. حالىقارالىق وزىق تاجىريبەنى, مەديتسينالىق ۇيىمداردىڭ باسشىلارىن ىرىكتەۋ جۇيەسىن ەسكەرە وتىرىپ, اۋرۋحانالىق مەنەدجمەنتتىڭ جاڭا ستاندارتتارىن ازىرلەۋ جانە ەنگىزۋ, بولىنەتىن رەسۋرستاردى پايدالانۋ تيىمدىلىگى مەن قارجىلىق تۇراقتىلىعى ءۇشىن جەرگىلىكتى اتقارۋشى ورگانداردىڭ جاۋاپكەرشىلىگى مەن تارتىلۋىن ودان ءارى ارتتىرۋ بويىنشا جۇمىس جۇرگىزىلۋدە.
مامان ماسەلەسى وزەكتى
دارىگەرلەردىڭ تاپشىلىعى, اسىرەسە ارنايى مامانداندىرۋ تۋرالى كوپ ايتىلادى. بىراق وسى كۇنگە دەيىن سالادا مەديتسينالىق قىزمەتتەر مەن سەرۆيستەردىڭ جوعارى ساپاسىنا باعىتتالعان مەديتسينا قىزمەتكەرلەرىنە ەڭبەكاقى تولەۋدى ىنتالاندىرۋدىڭ مودەلى جاسالماعان. ءبىز كادر دايارلاۋ جانە وقىتۋ ساپاسى سالاسىنداعى ساياساتقا, ولاردىڭ ساپالى جانە ناتيجەلى قىزمەتىن قامتاماسىز ەتۋدىڭ قولدانىستاعى تەتىكتەرىن قايتا باعالاۋعا تالداۋ جۇرگىزدىك.
وكىنىشكە قاراي, مەديتسينالىق ۇيىمداردا دارىگەر تاپشىلىعى ءالى دە بار. بۇل اسىرەسە اۋىلدىق ەلدى مەكەندەردە بايقالادى. تاپشىلىقتىڭ نەگىزگى سەبەپتەرى – ەرىك-جىگەردىڭ ازدىعى, سەنىمسىزدىك, جوعارى پسيحوەموتسيونالدىق جۇكتەمەنىڭ كوبەيۋى جانە الەۋمەتتىك كەپىلدىكتەردىڭ جەتكىلىكسىزدىگى. وسىنداي سەبەپ-سالداردان كەيىن مەديتسينا ماماندارى جۇمىستان شىعىپ جاتادى.
دەنساۋلىق ساقتاۋدىڭ كادرلىق ساياساتىن دامىتۋ تۇجىرىمداماسى, ەڭ الدىمەن, كاسىپتىڭ ءيميدجى مەن بەدەلىن ارتتىرۋعا باعىتتالادى. ەسەپكە الۋ ۇدەرىسىن تسيفرلاندىرۋ جانە بىرىڭعاي جۇيەنى قۇرۋ امالدارى بۇرىن دا قولعا الىنعان ەدى. الايدا باستاعان ءىس اياقسىز قالدى. دەنساۋلىق ساقتاۋدىڭ كادر رەسۋرستارىن ەسەپكە الۋدىڭ بىرىڭعاي ۇلتتىق جۇيەسىن قۇرۋدى اياقتاۋ جوسپارلانىپ وتىر. وندا 1-كۋرس ستۋدەنتىنەن باستاپ جۇمىس ىستەيتىن دەنساۋلىق ساقتاۋ مامانىنا دەيىنگى بارلىق دەرلىك اقپارات مەملەكەتتىك تاپسىرىستى ءبولۋ, ءتۇسۋ, وقىتۋ, جۇمىسقا ورنالاستىرۋ جانە بۇكىل كاسىبي قىزمەت بويى ۇزدىكسىز دامۋ راسىمىنەن باستاپ تسيفرلاندىرىلاتىن بولادى.
مەديتسينالىق-سانيتاريالىق العاشقى كومەك جۇيەسىن جەتىلدىرۋ ماقساتىندا ەمحانا دارىگەرلەرى مەن مەيىرگەرلەردىڭ بىلىكتىلىگىن ارتتىرۋعا باعىتتالعان ءىس-شارالار كەشەنى ىسكە اسىپ كەلەدى. ماماندىقتىڭ بەدەلىن ارتتىرۋعا نەگىز بولاتىن شارۋالار پىسىقتالۋدا (جالاقىنى كوتەرۋ, تولەمدەردى ىنتالاندىرۋ, كاسىبي ءوسۋ, ەڭبەك جانە الەۋمەتتىك جەڭىلدىكتەر, قولايلى ەڭبەك جاعدايلارىن جاساۋ).
قورىتا كەلە سالا الدىنا قويىلعان مىندەتتەردى شەشۋ ءۇشىن دەنساۋلىق ساقتاۋ مينيسترلىگى ساقتاندىرۋ جۇيەسىن جاڭعىرتۋعا, مەديتسينالىق كومەكتى ۇيىمداستىرۋعا, بيزنەس-ۇدەرىستەردى قايتا قۇرۋعا, اشىقتىقتى, تيىمدىلىكتى, بولىنەتىن قارجىلىق جانە ماتەريالدىق رەسۋرستاردى قامتاماسىز ەتۋگە باسىمدىق بەرىلگەنىن اتاپ وتكىم كەلەدى. سونداي-اق تۇرعىندار مەن پاتسيەنتتەردىڭ قاجەتتىلىگىنە باسا نازار اۋدارا وتىرىپ, سالا كادرلارىن سالا الدىندا تۇرعان سىن-قاتەرلەردى شەشۋدى باعدارلاۋعا كىرىسكەنىن حابارلايمىن. مەديتسينا قىزمەتكەرلەرىمەن بىرگە ءبىز العا قويعان بارلىق ماقسات-مىندەتكە قول جەتكىزەمىز دەپ ويلايمىن.
ناتيجەسىندە, ءبىز حالىققا پاتسيەنتتەردىڭ سۇرانىسىنا باعدارلانعان مەديتسينالىق كومەك كورسەتۋدىڭ جەتىلدىرىلگەن مودەلىن ۇسىنامىز. دارىگەرلەرگە نەگىزسىز بارۋ مەن زەرتتەۋلەردى بارىنشا الىپ تاستايمىز. پاتسيەنتتەردىڭ مارشرۋتتارى قايتا قۇرىلادى. مەديتسينالىق كومەك كورسەتۋدىڭ بارلىق بۋىنىنىڭ جۇمىسى ۇيلەسىپ, ءوزارا ينتەگراتسيالانادى. مەملەكەتتىڭ مىندەتتەمەلەرى تەڭگەرىمدىلىككە قول جەتكىزۋ ءۇشىن سالانىڭ قولدا بار رەسۋرستارىنا سايكەس كەلتىرىلەدى.
تەگىن مەديتسينالىق كومەكتىڭ كەپىلدىك بەرىلگەن كولەمى شىنايىلىق قاعيداتتارىنا نەگىزدەلەدى. مەديتسينالىق ۇيىمدار قىزمەتىنىڭ تۇراقتىلىعى قامتاماسىز ەتىلەدى. مەديتسينالىق تەحنولوگيالار مەن دارىلىك فورمۋليار دالەلدەنگەن تيىمدىلىككە نەگىزدەلەدى. مىندەتتى الەۋمەتتىك مەديتسينالىق ساقتاندىرۋ مەن تەگىن مەديتسينالىق كومەكتىڭ كەپىلدىك بەرىلگەن كولەمىنىڭ پاكەتى بويىنشا اقىلى قىزمەتتەردىڭ كومەگىنە قولجەتىمدىلىكتى ارتتىرۋ ەسەبىنەن ازاماتتاردىڭ قالتاسىنا جۇكتەمەنى ءبىر مەزگىلدە تومەندەتە وتىرىپ, بىرقاتار دارىلىك زات پەن مەديتسينالىق قىزمەت بويىنشا قوسىمشا تولەم ەنگىزۋ جايى پىسىقتالادى.
ءيا, مەديتسينانىڭ بارلىق دەرلىك باعىتتارى بويىنشا الدا ءالى اسا ماڭىزدى مىندەتتەر مەن جوسپارلار بار. ماماندارعا ارتىلعان جاۋاپكەرشىلىك جۇگى جەڭىل ەمەس. ارىپتەستەرىمدى كاسىبي مەرەكەمەن, مەديتسينا قىزمەتكەرى كۇنىمەن شىن جۇرەكتەن قۇتتىقتاي وتىرىپ, ەڭبەكتەرىنە تابىس تىلەيمىن. ءتۇرلى قيىندىقپەن بەتپە-بەت كەلىپ, ادام جانىن اراشالاعان قىزمەتتەرىڭىز ەلدىڭ بەرەكە-بىرلىگىن ارتتىرا بەرسىن.
اقمارال ءالنازاروۆا,
دەنساۋلىق ساقتاۋ ءمينيسترى