سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ ەستونيا رەسپۋبليكاسىنىڭ قازاقستان, قىرعىزستان, تاجىكستان, تۇرىكمەنستان, وزبەكستان ەلدەرىندەگى توتەنشە جانە وكىلەتتى ەلشىسى تووماس تيرسپەن كەزدەستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كەزدەسۋگە قاتىسۋشىلار كوپتەگەن ەكىجاقتى قۇجاتتارعا قول قويىلعاننان كەيىن رەسمي سيپاتقا يە بولعان قازاق-ەستون قاتىناستارىن ودان ءارى دامىتۋدىڭ كەلەشەگىن تالقىلادى. ىنتىماقتاستىقتى تەرەڭدەتۋگە, پارلامەنتاريزمدى نىعايتۋعا جانە پارلامەنتتىك ديپلوماتيانى ورىستەتۋگە ەرەكشە نازار اۋدارىلدى.
«ەلدەرىمىز ديپلوماتيالىق قاتىناستار ورناعان كەزدەن باستاپ ىنتىماقتاستىقتىڭ قارقىندى دامۋىن كورسەتىپ كەلەدى. ءوزارا ءىس-قيمىلدىڭ وڭ كورىنىسى جانە تۇراقتى دامۋى بايقالىپ وتىر. قازىرگى ۋاقىتتا ەكى ارادا بىرقاتار ماڭىزدى مەملەكەتارالىق جانە وڭىرلىك كەلىسىمدەر جاسالدى, سونداي-اق ۇزاق مەرزىمدى ىنتىماقتاستىقتىڭ نەگىزىندە بەلسەندى ديالوگ جۇرگىزىپ كەلەمىز. ءبىز ينۆەستيتسيا, ساۋدا, عىلىمي زەرتتەۋ, تسيفرلاندىرۋ سالاسىندا, سونداي-اق مادەني-گۋمانيتارلىق سالالاردا ايتارلىقتاي دامۋدى كورىپ وتىرمىز», دەدى نۇرتورە ءجۇسىپ.
تووماس تيرس ءوز كەزەگىندە ەستونيا قازاقستانمەن ىنتىماقتاستىقتى جوعارى باعالايتىنىن, سونداي-اق ەكىجاقتى قارىم-قاتىناستاردى نىعايتۋعا بەلسەندى ىقپال ەتۋگە دايىن ەكەنىن اتاپ ءوتتى.