اتالعان اگەنتتىكتىڭ توراعاسى اسحات جۇماعالي جەمقورلىققا قارسى كۇرەسۋ ءۇشىن قابىلدانىپ جاتقان شارالار تۋرالى باياندادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
اگەنتتىك توراعاسىنىڭ مالىمەتى بويىنشا جىل باسىنان بەرى ەلىمىزدە 947 جەمقورلىققا قاتىستى قىلمىس تىركەلىپ, 660 ادام اشكەرەلەندى. ونىڭ 104-ءى – ءارتۇرلى دەڭگەيدەگى باسشىلار. تەرگەۋ امالدارى اياقتالعان قىلمىستىق ىستەر اياسىندا 193,5 ميلليارد تەڭگە وتەلدى. جالپى, 2022 جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1,03 تريلليون تەڭگە كولەمىندە م ۇلىكتىك اكتيۆتەر مەن قارجى قايتارىلدى.
بيىل ءبىلىم, عىلىم, سپورت, ءدارى-دارمەك ساتىپ الۋ, قۇرىلىس, جەر تەلىمدەرىن ءبولۋ سالالارىنا جۇرگىزىلگەن تالداۋ جانە مونيتورينگ جۇمىستارىنىڭ قورىتىندىسى بويىنشا 113 ەسەپ ازىرلەندى. مەملەكەتتىك ورگاندارعا جەمقورلىق تاۋەكەلدەرىن جويۋعا باعىتتالعان مىڭنان استام ۇسىنىس بەرىلدى.
الدىن الۋ شارالارى اياسىندا, سونىڭ ىشىندە «بىرىڭعاي ساتىپ الۋ تەرەزەسى» پورتالىنا مونيتورينگ جۇرگىزۋ ارقىلى 31 ميلليارد تەڭگەدەن استام بيۋدجەت قاراجاتىنىڭ ءتيىمسىز جۇمسالۋىنا جول بەرىلمەدى. «بيزنەسكە جول» جوباسىن جۇزەگە اسىرۋ كەزىندە 7,5 مىڭعا جۋىق كاسىپكەردىڭ قۇقىعى قورعالىپ, 67 تۇيتكىلدى كەيس شەشىمىن تاپتى.
سونىمەن قاتار قاسىم-جومارت توقاەۆقا جول سالاسىنداعى جەمقورلىق ارەكەتتەردى جويۋعا قاتىستى تاپسىرماسىنىڭ ورىندالۋ بارىسى جونىندە باياندالدى. اگەنتتىك توراعاسى «اقشانى بوياۋ» پيلوتتىق جوباسىن الەۋمەتتىك ماڭىزى بار سالالاردا, سونىڭ ىشىندە جول قۇرىلىسىندا ىسكە اسىرۋ جوسپارلانىپ وتىرعانىن ايتتى.
بۇدان بولەك, مەملەكەت باسشىسىنا جىل باسىنان بەرى قاتار, گونكونگ, ازەربايجان جانە رەسەي فەدەراتسياسىنىڭ سىبايلاس جەمقورلىققا قارسى ۆەدومستۆولارىمەن ىنتىماقتاستىق تۋرالى 4 مەموراندۋمعا قول قويىلعانى جايىندا مالىمەت بەرىلدى. اتالعان قۇجاتتار قۇقىقتىق كومەك كورسەتۋ, اكتيۆتەردى قايتارۋ, ادامداردى ىزدەستىرۋ, بيۋدجەت قاراجاتىنىڭ ماقساتتى جۇمسالۋىنا جانە ساتىپ الۋ ۇدەرىسىنە مونيتورينگ جۇرگىزۋ ماسەلەلەرى بويىنشا سەرىكتەستىكتى نىعايتۋعا باعىتتالعان.
كەزدەسۋ سوڭىندا قاسىم-جومارت توقاەۆ بىرقاتار ناقتى تاپسىرما بەردى.