قازاق ۇلتتىق اگرارلىق زەرتتەۋ ۋنيۆەرسيتەتىندە كورنەكتى مەملەكەت جانە قوعام قايراتكەرى, عالىم-ۇستاز ناريمان قىپشاقباي ۇلىنىڭ 90 جاسقا تولۋ قۇرمەتىنە وراي وقۋ ورنى ستۋدەنتتەرىنىڭ قاتىسۋىمەن «قالاي كاسىبي گيدروتەحنيك بولۋعا بولادى؟» دەگەن تاقىرىپتا دوڭگەلەك ۇستەل ءوتتى.
دوڭگەلەك ۇستەلدى جۇرگىزگەن KazNARU باسقارما توراعاسى-رەكتور, ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ رەسپۋبليكاداعى سۋ قورىن ساقتاۋدىڭ ماڭىزدىلىعىن اتاپ وتە كەلىپ, «سۋ رەسۋرستارى جانە سۋدى پايدالانۋ» كافەدراسىندا ۇزاق جىلدار ابىرويلى ەڭبەك ەتكەن عالىم-ۇستازدىڭ سۋ شارۋاشىلىعى سالاسىن دامىتۋداعى ەرەن ەڭبەگىنە توقتالدى. مەرەيتويىمەن قۇتتىقتاپ, سىي-سياپات كورسەتتى.
«ناريمان قىپشاقباي ۇلىنىڭ قازاقستاننىڭ سۋ شارۋاشىلىعىن دامىتۋعا قوسقان زور ۇلەسىن زور ىقىلاسپەن ايتىپ جۇرەمىز. ويتكەنى قايراتكەر ەڭبەك جولىن قاراپايىم مامان بولىپ باستاپ, مەليوراتسيا جانە سۋ شارۋاشىلىعى مينيسترلىگىنىڭ باسشىلىعىنا دەيىنگى ناتيجەلى جۇمىستارى ءالى كۇنگە دەيىن اۋىل شارۋاشىلىعىنىڭ دامۋىنا پايداسىن تيگىزىپ جاتىر. تاۋەلسىزدىك جىلدارىندا سۋ كودەكسىنىڭ جوباسىن ازىرلەۋگە جەتەكشىلىك ەتىپ, ورتالىق ازيا مەملەكەتتەرى, رەسەي جانە قىتاي اراسىنداعى ترانسشەكارالىق وزەندەردىڭ سۋىن پايدالانۋ جونىندەگى حالىقارالىق ۇيىمدى قۇرۋعا ۇلكەن ۇلەس قوستى. سونىمەن قاتار, حالىقارالىق ارالدى قۇتقارۋ قورىن قۇرۋعا بەلسەندىلىكپەن اتسالىسىپ, سۋ قاۋىپسىزدىگىن ساقتاۋ, سۋ نىساندارىن قورعاۋ ماسەلەلەرىندە بارلىق ارىپتەستەرىنە ۇلگى كورسەتىپ كەلەدى. توقساننىڭ تورىنە شىققان ناريمان قىپشاقباي ۇلىنا بارشا عالىم ارىپتەستەرىنىڭ اتىنان زور دەنساۋلىق, قاجىرلى كۇش-قايرات تىلەيمىز!» دەدى رەكتور ءوز سوزىندە.
«جەر مەن سۋ – قازاقستاننىڭ ەڭ ۇلكەن بايلىعى. سوندىقتان, تابيعات بايلىعىن كوزدىڭ قاراشىعىنداي ساقتاۋعا ءتيىسپىز. مەنىڭ سۋ سالاسىنىڭ ينجەنەرلىگىن تاڭداۋىم دا جايدان-جاي ەمەس. حالقىمىز جاقسى ءومىر ءسۇرۋىن قامتاماسىز ەتە وتىرىپ, وسى تابيعاتتىڭ بەرگەن سىيىن رەسۋرسقا ءتيىمدى اينالدىرا وتىرىپ, كوزدىڭ قاراشىعىنداي ساقتاۋعا مىندەتتى ەكەنىمىزدى ەستە ۇستاۋىمىز قاجەت» دەپ اتاپ ءوتتى ناريمان قىپشاقباي ۇلى.
ەڭبەك جولىن تاۋ تۇرگەن باسسەينىندە قاتارداعى گيدروتەحنيك بولىپ باستاپ, رەسپۋبليكاداعى ەلدى مەكەندەردى اۋىز سۋمەن قامتيتىن مەملەكەتتىك دەڭگەيدەگى جوبالارعا جەتەكشىلىك ەتكەن ناريمان قىپشاقباي ۇلى وسى سالادا مينيستر دارەجەسىنە دەيىن كوتەرىلىپ, ابىروي بيىگىنەن كورىندى. ۇزاق جىلدارداعى ەڭبەگى ءۇشىن «قۇرمەت» جانە II دارەجەلى «بارىس», «وتان» وردەندەرىمەن, كوپتەگەن ۇكىمەتتىك مەدالدارمەن ماراپاتتالدى.
دوڭگەلەك ۇستەل بارىسىندا «Water HUB» حالىقارالىق زەرتتەۋ ورتالىعىنىڭ ديرەكتورى ا.ريابتسەۆ, گەوگرافيا ينستيتۋتىنىڭ ديرەكتورى ا.مەدەۋ, احمەتسافين اتىنداعى گيدروگەولوگيا ينستيتۋتىنىڭ ديرەكتورى م.ابسامەتوۆ, حالىقارالىق ارالدى قۇتقارۋ قورىنىڭ قازاقستانداعى اتقارۋشى ديرەكتسياسىنىڭ ديرەكتورى س.مۇقاتاەۆ, قوناەۆ اتىنداعى ۇاك فيليالىنىڭ ديرەكتورى م. ارىستانوۆ, «كازگيپروۆودحوز» پك ديرەكتورى ر.فايزۋلدين جانە تاعى دا باسقا عالىمدار, ماماندار ارداگەر عالىمدى مەرەيتويىمەن قۇتتىقتاپ, ەلىمىزدەگى سۋ سالاسىندا تۋىنداپ وتىرعان وزەكتى ماسەلەلەردى, ولاردى شەشۋ جولدارىن تالقىلادى.
الماتى