قازاقستاندا تۇرمىستىق زورلىق-زومبىلىق ازايىپ كەلەدى - ءىىم

ماسەلەن, تۇرمىستىق زورلىق-زومبىلىق فاكتىلەرى بويىنشا پوليتسياعا تۇسكەن شاقىرتۋلار:

2020 جىلى – 179 096

2021 جىلى – 155 177

2022 جىلى  – 115 526

2023 جىلى – 99 026

2024 جىلدىڭ 4 ايىندا – 28 189 شاعىم تۇسكەن.

تۇرمىستىق سالاداعى قىلمىستىق قۇقىق بۇزۋشىلىقتار, سونىڭ ىشىندە, دەنساۋلىققا اۋىر زيان كەلتىرۋ جانە كىسى ءولتىرۋ دەرەكتەرى بويىنشا كورسەتكىشتەر: 

2020 جىلى – 1071

2021 جىلى – 1022

2022 جىلى – 935

2023 جىلى – 923.

بۇعان دەيىن جابىرلەنۋشىلەردىڭ كوپ جاعدايدا ارىز جازۋدان باس تارتۋىنا بايلانىستى ءۇي تيراندارىنا قاتىستى شارا قولدانۋ پروتسەسى توقتاتىلاتىن ەدى. زاڭعا ەنگىزىلگەن تۇزەتۋلەردەن كەيىن, پوليتسيا زورلىق-زومبىلىق فاكتىسىن تىركەۋدىڭ انىقتاۋ سيپاتىنا كوشتى. ياعني, اگرەسسوردى جابىرلەنۋشىنىڭ ارىزىنسىز-اق جاۋاپقا تارتۋ مۇمكىندىگى پايدا بولدى.«كىسى ءولتىرۋ بابىندا بالانى ولتىرگەن جاعدايدا ءومىر بويىنا باس بوستاندىعىنان ايىرۋ دەگەن جازا قوسىلدى. دەنساۋلىققا اۋىر زيان كەلتىرۋ مەن ورتاشا اۋىرلىقتا زيان كەلتىرۋدىڭ جازالارىنان ءبىز بوستاندىقتى شەكتەۋ جازاسىن الىپ تاستادىق. الداعى ۋاقىتتا ولار تەك قانا باس بوستاندىعىنان ايىرىلاتىن بولادى.

ۇرىپ-سوعۋ مەن دەنساۋلىققا جەڭىل زيان كەلتىرۋ باپتارى وسى جاڭا زاڭمەن قىلمىستىق جاۋاپكەرشىلىككە تارتىلادى. سونداي-اق تاعى دا ايتا كەتەيىن, قيناۋ دەگەن باپ بار. سول قيناۋ بابى بويىنشا دا باس بوستاندىعىن شەكتەۋ جازاسى الىنىپ تاستالدى. جازا تەك باس بوستاندىعىنان ايىرۋ.

تاعى دا قىلمىستىق كودەكسكە بۇرىن بولماعان جاۋاپكەرشىلىك ەنگىزىلدى. ول 16 جاسقا تولماعان جاسوسپىرىمدەرگە قاتىستى جىنىستىق قولسۇعۋشىلىق جاساعان تۇلعالار قىلمىستىق جاۋاپكەرشىلىككە تارتىلاتىن بولادى», دەدى ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقمارال سەرىكباەۆا.

زاڭ «ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ» دەپ اتالعانىمەن, ول بارىنە ورتاق بولادى. ياعني, زورلىق-زومبىلىق كورگەن ايەل, جاسوسپىرىمدەرمەن بىرگە ەر ازاماتتار دا شاعىمدانۋعا قۇقىلى.