بيىلعى الاپات سۋ تاسقىنى كەزىندە جۇرتتان جىلۋ جيناعان قايىرىمدىلىق قورلارى از بولعان جوق. بىراق ولاردىڭ كوبى جينالعان قاراجات قانشا ەكەنى, قانداي ماقساتقا جۇمسالعانى تۋرالى ەسەپ بەرگەن ەمەس. ال الەۋمەتتىك جەلىدە ءارتۇرلى سەبەپپەن اقشالاي جاردەم سۇراۋشىلار كوبەيىپ تۇر. الايدا ولاردىڭ قايسىسى شىن مۇقتاج ەكەنىن انىقتاۋ وڭاي ەمەس.
جۋىردا قارجىلىق مونيتورينگ اگەنتتىگىنىڭ ءباسپاسوز قىزمەتى ەلىمىزدە جوبالاردى, باستامالاردى جانە ستارتاپتاردى قارجىلاندىرۋعا اقشا جيناۋدىڭ يننوۆاتسيالىق ءتاسىلى بولىپ سانالاتىن كراۋدفاندينگتى وڭاي جولمەن بايۋ ماقساتىندا پايدالانۋ وقيعالارى جيىلەپ كەتكەندىگىن مالىمدەدى. ناقتى ايتقاندا, ءتۇرلى كۇماندى ماقساتقا قاراجات جيناۋعا 138 بانكتىك كارتا تارتىلعان. جالعان كومەك سۇراۋشىلارعا 660 مىڭنان استام وتانداسىمىز اقشا جىبەرگەن. جينالعان قارجىنىڭ جالپى سوماسى 6 ملرد تەڭگەنى قۇراعان. ونىڭ ىشىندە 2 ملرد تەڭگە بويىنشا الاياقتىق جاساۋ بەلگىلەرى بايقالعان.
الەۋمەتتىك جەلىدە الاياقتار «ەمدەلۋ» جانە «مۇقتاج جاندارعا كومەك كورسەتۋ» دەگەن جەلەۋمەن اقشا جيناۋدى ەش كەدەرگىسىز جانە باقىلاۋسىز ىسكە اسىرىپ ءجۇر. شىنتۋايتىندا, ولار جينالعان مول قاراجاتتى جىلجىمالى جانە جىلجىمايتىن م ۇلىكتەردى ساتىپ الۋعا, تۇرمىستىق شىعىنعا, بۋكمەكەرلىك كەڭسەلەردە ءباس تىگۋگە, شەتەلدەگى قىمبات پاتەرلەردى جالعا الۋعا جۇمسايتىن كورىنەدى. دەمەك الەۋمەتتىك جەلىدە اۋىر سىرقاتى نەمەسە مۇشكىل حال-جاعدايىن ايتىپ زار يلەپ تۇرعان ادامداردىڭ سوزدەرىنىڭ شىندىعىنا كوز جەتكىزبەي, ولارعا بىردەن كومەك قولىن سوزۋ الاياقتاردىڭ ارباۋىنا ءتۇسىپ, بوسقا شىعىندانۋ مۇمكىن ەكەنىن ەستەن شىعارماعان ءجون.
جاقىندا جوعارعى سوتتىڭ ءباسپاسوز قىزمەتى الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن وسى مەگاپوليستەگى «جىبەك جولى» قايىرىمدىلىق مەكەمەلەرى قاۋىمداستىعىنىڭ قۇرامىنا كىرگەن, ءبىلىم سالاسىنداعى 26 قايىرىمدىلىق مەكەمەسىنىڭ مەملەكەتتىك تىركەۋى جويىلىپ, قىزمەتى توقتاتىلعاندىعىن حابارلادى. ۋاكىلەتتى ورگان جۇرگىزگەن تەكسەرىستىڭ قورىتىندىسى بويىنشا ولاردىڭ تەك 11-ءى ناقتى جۇمىس ىستەگەن, ال 15-ءى تىركەلگەن جەرىندە جوق بولىپ شىققان.
«وڭتۇستىك استاناداعى» قىزمەتى توقتاتىلعان قايىرىمدىلىق مەكەمەلەرىندە بالالاردىڭ ءومىرى مەن دەنساۋلىعىنا تىكەلەي بايلانىستى, سونىڭ ىشىندە كوشى-قون, ەڭبەك, جەر, ەكولوگيا جانە تۇرعىن ءۇي ماسەلەلەرىنە قاتىستى ورەسكەل زاڭ بۇزۋشىلىققا جول بەرىلگەن. سونداي-اق ساۋلەت, قالا قۇرىلىسى جانە قۇرىلىس قىزمەتى, ءورت قاۋىپسىزدىگى تالاپتارى, سانيتارلىق-ەپيدەميولوگيالىق نورمالار, ءدىني, قايىرىمدىلىق جانە قارجىلىق-شارۋاشىلىق قىزمەت سالالارىندا زاڭ بۇزۋشىلىق اشكەرەلەنگەن. ءىس جۇزىندە بۇل مەكەمەلەردىڭ اتقارعان جۇمىستارى ولاردىڭ جارعىلىق ماقساتتارىنا قايشى كەلەتىندىگى انىقتالعان. ونىڭ ۇستىنە, كەيبىرەۋلەرى ءبىلىم بەرۋ قىزمەتىمەن ءتيىستى ليتسەنزياسىز اينالىسقان. بالالاردىڭ ءتيىستى ءبىلىم, تاربيە جانە مەديتسينالىق كومەك الۋ قۇقىقتارى ايتارلىقتاي بۇزىلعان.
اتالعان قايىرىمدىلىق مەكەمەلەرىنىڭ ءدىني بەيىمدەلگەندىگى دالەلدەنگەن, ال قازاقستان مۇسىلماندارى ءدىني باسقارماسى «جىبەك جولى» مەكەمەسىمەن جاسالعان مەموراندۋمنىڭ كۇشىن بىرجاقتى تارتىپپەن جويعان.
زاڭنامانى بۇزعان قايىرىمدىلىق مەكەمەلەرىنىڭ بىرقاتارىنا جانە ولاردىڭ باسشىلارىنا قاتىستى قىلمىستىق ءىس قوزعالعان. ولار كامەلەتكە تولماعان بالانىڭ وزىنە قول جۇمساۋىنا, الەۋمەتتىك, ۇلتتىق, ناسىلدىك, ءدىني ارازدىقتى قوزدىرۋعا, سوت ەكسترەميستىك جانە تەرروريستىك دەپ تانىعان ادەبيەتتەر تابىلۋىنا بايلانىستى.
قوي تەرىسىن جامىلعان قاسقىرلار سياقتى «قايىرىمدىلىق مەكەمەسى» مارتەبەسىن پايدالانىپ, زاڭسىز ءىس-ارەكەتپەن اينالىسقان ۇيىمدار جابىلىپ, باسشىلارى تەرگەۋگە الىنعانىمەن, وسى وقيعا ەلىمىزدەگى قايىرىمدىلىق سالاسىنا دەگەن سەنىمگە سەلكەۋ تۇسىرگەنى انىق. سوندىقتان مۇددەلى مەملەكەتتىك ورگاندار الەۋمەتتىك جەلىدە جۇرتتان جالعان جاردەم سۇراۋ ارقىلى الاياقتىق جاساۋشىلاردى اشكەرەلەۋ, قايىرىمدىلىق مەكەمەلەرى مەن قورلارىنىڭ جۇمىسىنىڭ اشىقتىعى مەن ەسەپتىلىگىن قامتاماسىز ەتۋ شارالارىن قولعا السا, يگى.