استانادا قازاقستان جانە كورەيا رەسپۋبليكاسىنىڭ مەملەكەتتىك ورگاندارى, ءىرى كومپانيالارىنىڭ قاتىسۋىمەن بيزنەس-فورۋم ءوتتى, دەپ حابارلايدى Egemen.kz.
ءىس-شارا كورەيا رەسپۋبليكاسىنىڭ پرەزيدەنتى يۋن سوك ءيولدىڭ قازاقستانعا العاشقى مەملەكەتتىك ساپارى اياسىندا ۇيىمداستىرىلدى.
فورۋمدا مەملەكەت باسشىسى قاسىم-جومارت توقاەۆ بيزنەس وكىلدەرىنە ريزالىعىن ءبىلدىرىپ, ەكى ەل اراسىنداعى ساۋدا-ەكونوميكالىق ىنتىماقتاستىقتىڭ ماڭىزىن اتاپ ءوتتى. بۇگىندە كورەيادان ەكونوميكامىزعا تىكەلەي تارتىلاتىن ينۆەستيتسيا كولەمى ون ميلليارد دوللارعا جۋىقتاسا, ءوزارا ساۋدا اينالىمى التى ميلليارد دوللارعا جەتكەن. قازىردىڭ وزىندە قازاقستان نارىعىندا وڭتۇستىك كورەيانىڭ 700-دەن استام كومپانياسى جۇمىس ىستەيدى. ولاردىڭ قاتارىندا Hyundai, KIA, Samsung, LG, Doosan سەكىلدى جاھاندىق كورپوراتسيالار بار. بۇل رەتتە ەلىمىز وڭتۇستىك كورەيا رەسپۋبليكاسىنىڭ ورتالىق ازيا ايماعىنداعى نەگىزگى ساۋدا-ەكونوميكالىق سەرىكتەسى رەتىندە پوزيتسياسىن نىعايتۋعا نيەتتى.
بيزنەس-فورۋم كەلىسسوز الاڭىنا اينالىپ, ءتۇرلى سالا وكىلدەرىن ءبىر ارناعا توعىستىردى. ناتيجەسىندە بيزنەس پەن مەملەكەتتىك قۇرىلىم اراسىندا ەكىجاقتى ەكونوميكالىق بايلانىستى كۇشەيتۋگە باعىتتالعان بىرقاتار كوممەرتسيالىق قۇجاتقا قول قويىلدى.
جيىندا «قازاقستاننىڭ ەكسپورتتىق-كرەديتتىك اگەنتتىگى» اق مەن كورەيانىڭ KSURE ساۋدا ساقتاندىرۋ كورپوراتسياسى اراسىندا ىنتىماقتاستىقتى كوزدەيتىن مەموراندۋم بەكىتىلدى. كەيىن قازاقستاننىڭ ەكسپورتتىق-كرەديتتىك اگەنتتىگى الاڭىندا KSURE باسشىلىعىمە نارنايى كەزدەسۋ ءوتتى, وعان «بايتەرەك» ۇلتتىق باسقارۋشى حولدينگى دە قاتىستى.
كورەيلىك ساقتاندىرۋ كورپوراتسياسىنىڭ باسشىسى يانگ دجين چجان ىنتىماقتاستىق كەلىسىمى شەڭبەرىندە بىرقاتار ۇسىنىسىن ايتتى. ماسەلەن, جىلىنا كەمىندە ءبىر رەت اگەنتتىك ساراپشىلارىنىڭ كەزدەسۋىن وتكىزۋ تۋرالى باستاما كوتەردى. ءبىرىنشى كەزەڭدە بۇل كەزدەسۋلەر قولدانىستاعى قولداۋ قۇرالدارى اياسىندا ساقتاندىرۋ ەرەجەلەرىن الماسۋدى كوزدەسە, ودان ءارى ەكسپورتتىق قاۋىپ-قاتەردى سەيىلتۋ ماقساتىنداعى جوبالار كەزەك كۇتەدى.
قازاقستاننىڭ ەكسپورتتىق-كرەديتتىك اگەنتتىگى باسقارما توراعاسى اسلان كاليگازين مەموراندۋم ەكى تاراپ اراسىنداعى ىنتىماقتاستىق سينەرگياسىن كۇشەيتۋ ءۇشىن نەگىز بولادى دەپ سەنىم ءبىلدىردى.
«بۇگىنگى كەزدەسۋدىڭ ماقساتى – قوس اگەنتتىكتى تابىسقا جەتەلەيتىن ىنتىماقتاستىقتىڭ بەرىك نەگىزىن قالاۋ. ءبىز قازاقستاندا ەكسپورتقا باعدارلانعان جوبالاردى دامىتۋدىڭ كاتاليزاتورى بولۋدى كوزدەيمىز. كورەيلىك ارىپتەستەرىمىزبەن ءوزارا ساۋدانى دامىتۋ جانە ەكسپورتتىق ساقتاندىرۋ سالاسىندا وزىق تاجىريبەنى الماسۋ ءۇشىن ءوز مانداتتارىمىز شەڭبەرىندە كۇش-جىگەرىمىزدى بىرىكتىرەمىز», دەپ اتاپ ءوتتى ا. كاليگازين.
وڭتۇستىك كورەيا باسشىلىعى قازاقستانعا ءىس-ساپارى اياسىندا ورتالىق ازيا ەلدەرى اراسىنداعى ىنتىماقتاستىقتىڭ جاڭا باستاماسىن ۇسىندى. باستاماعا «K-Silk Road» دەگەن اتاۋ بەرىلدى. ونىڭ اياسىندا ستراتەگيالىق ماڭىزدى رەسۋرستاردى ءوندىرۋ جانە قايتا وڭدەۋ, اتوم ەلەكتر ستانتسياسىن سالۋ, سونداي-اق جەل جانە كۇن ەنەرگەتيكاسىن دامىتۋ ماسەلەلەرى قامتىلادى. ەكى ەلدىڭ ەكسپورتتىق-كرەديتتىك اگەنتتىكتەرى اراسىنداعى كەلىسىم «K-Silk Road» ماقساتىنا سايكەس كەلەدى. «قازاقستاننىڭ ەكسپورتتىق-كرەديتتىك اگەنتتىگى» اق حالىقارالىق ىنتىماقتاستىق دەپارتامەنتى ديرەكتورى ارمانا بەكباسوۆا الەمدىك جەتەكشى ەكسپورتتىق-كرەديتتىك اگەنتتىكتەر قازىر قولداۋ قۇرالدارىن كۇشەيتىپ جاتقانىن ايتتى. بۇل يمپورتتىڭ باسىم باعىتتارى بويىنشا بالامالى جەتكىزۋ تىزبەگىن قۇرۋعا مۇمكىندىك بەرسە, ونەركاسىپ كاسىپورىندارى قاجەتتى رەسۋرستارمەن قامتاماسىز ەتىلەدى.
اككۋمۋلياتور ۇلگىسىندەگى نيكەل جانە باسقا دا مەتالل وڭدەۋ ونىمدەرىن بىرلەسىپ ازىرلەۋ, ءوندىرۋ جانە ەكسپورتتاۋ قازاقستانعا تابىستى اسەر ەتەدى. اتاپ ايتقاندا, تۇراقتى دامۋ قاعيداتتارىن ساقتاي وتىرىپ, وڭتۇستىك كورەيا ينۆەستيتسيالارىن, تەحنولوگيالارى مەن جابدىقتارىن تارتا وتىرىپ, وسى كەن ورىندارىن يگەرۋ ەلىمىزگە دايىن ءونىمنىڭ الەمدىك نارىعىندا كوشباسشى بولۋعا مۇمكىندىك بەرەدى.