قازاقستاننان بارعان ءىىى ۇلتتىق ۇلان وفيتسەرىنىڭ قىراعىلىعى مەن ەپتىلىگى رەسەيدىڭ وبلىس ورتالىعىنداعى كەزەكتى قايعىلى وقيعانىڭ الدىن الدى, دەپ حابارلايدى Egemen.kz ءىىم ۇلتتىق ۇلاننىڭ ءباسپاسوز قىزمەتىنە سىلتەمە جاساپ.
وقيعا 2024 جىلدىڭ 8 ماۋسىمىندا ساعات 19.30 شاماسىندا بولدى. پودپولكوۆنيك جاندوس نۇراحمەتوۆ بالاسىمەن كاستروما قالاسىنىڭ گاليچسكايا كوشەسىندە سەرۋەندەپ جۇرگەندە, №51 ءۇيدىڭ 2 قاباتىنان 4-5 جاستاعى بالانى بايقايدى. ول اشىق تەرەزەدەن ويىنشىق, كيىم, سومكەلەردى لاقتىرىپ جىبەرگەن.
«مەن ءوتىپ بارا جاتقان تۇرعىنداردان جالعىز وتىرعان بالا مەن ونىڭ اتا-اناسى تۋرالى سۇراي باستادىم. بالاعا ىشكە قاراي كىر دەپ, قاۋىپتى تۇسىندىرمەك بولدىم. الايدا بالاقاي قۇلاق اسا قويمادى. سول ماڭدا تۇراتىن ءبىر ايەل كەلىپ, بۇل بالانىڭ تسەرەبرالدى سال اۋرۋى بار ەكەنىن ايتتى. وسى ۋاقىتتا بالا تەرەزە ارقاۋىنا اسىلىپ, سىرتقا شىعۋعا ۇمتىلدى. ونىڭ قۇلاپ كەتەتىنىن سەزىپ, بار داۋسىممەن ايقايلاي باستادىم. ءۇي ىشىندە ەرەسەك ادام بولسا, داۋىستى ەستىسىن دەپ. الايدا, ويلانىپ, بىرەۋدىڭ شىققانىن كۇتىپ تۇراتىن ارتىق ۋاقىت بولمادى. دەرەۋ قۇبىر ارقىلى 2 قاباتقا كوتەرىلىپ, بالانى اقىرىن تەرەزەگە سۇيرەپ اپاردىم. بالامەن بىرگە پاتەرگە كىرىپ, ۇيدە ەشكىم جوق ەكەنىن ءتۇسىندىم. مەن كەتسەم, تاعى قايتالاپ جۇرەر دەپ, بالاقايدى كوشەگە الىپ شىعىپ, اتا-اناسىن جاقسى تانيتىن كورشىلەرىنە تاپسىردىم», دەدى ۇلاندىق وفيتسەر.
ايتا كەتەرلىگى, پودپولكوۆنيك جاندوس نۇراحمەتوۆ بۇگىندە رەسەي فەدەراتسياسىنىڭ كوستروما قالاسىندا كەڭەس وداعىنىڭ مارشالى س.ك. تيموشەنكو اتىنداعى رادياتسيالىق-حيميالىق جانە بيولوگيالىق قورعاۋ اسكەري اكادەمياسىنىڭ تىڭداۋشىسى.
قازىرگى تاڭدا قازاقستاننان جوعارىدا اتالعان اكادەميادا التى كۋرسانت, ەكى تىڭداۋشى جانە ءبىر اديۋنكت ءبىلىم الىپ جاتىر. 2022 جىلى قر ۇلتتىق ۇلانىنىڭ الماتى وبلىسىنىڭ قاراكەمەر كەنتىندەگى 6654 اسكەري بولىمىنەن اتالعان ءبىلىم ورداسىنا وقۋعا تۇسكەن. ءبىر ايدان كەيىن وقۋدى ءتامامدايدى.
قىرمىزى جۇماعاليقىزى,
ەۇۋ ستۋدەنتى