10 ماۋسىمدا قىتايدىڭ شىعىس جاعالاۋىنداعى ءىرى ليانيۋنگان پورتىنان اتىراۋعا گۋمانيتارلىق جۇك كەلدى, دەپ حابارلايدى Egemen.kz.
توتەنشە جاعدايلاردى جويۋ جونىندەگى ايماقتىق شتابتىڭ حابارلاۋىنشا, ليانيۋنگان پورتىنىڭ ورتالىق ازياداعى وكىلدىگىنىڭ ديرەكتورى چجاو ۆەي قىتاي مەن قازاقستاننىڭ ۇزاق دوستىق تاريحى بار وركەنيەتتى مەملەكەتتەر ەكەنىن اتاپ ءوتتى.
«ليانيۋنگان مەن اتىراۋ ءبىر-بىرىنەن الشاق بولعانىمەن, بۇل حالىقتار اراسىنداعى بايلانىسقا كەدەرگى كەلتىرمەيدى. بەلگىلى ءبىر سەبەپتەرمەن گۋمانيتارلىق كومەگىمىز ءسال كەشىگىپ كەلدى. بىراق بۇل ءبىزدىڭ ەلگە دەگەن قامقورلىق كورسەتۋىمىزگە كەدەرگى بولمادى. بۇگىن مەن ليانيۋنگان پورتى اتىنان گۋمانيتارلىق كومەكتى اتىراۋ قالاسىنىڭ الەۋمەتتىك دامۋ قورىنا اۋدارىپ جاتىرمىن», دەپ جەدەل شتاب قىتاي وكىلىنىڭ ءسوزىن كەلتىرەدى.
سۋ تاسقىنىنان زارداپ شەككەن اتىراۋ وبلىسىنا ليانيۋنگان قالاسىنان شاتىرلار, توسەك-ورىن جابدىقتارى, قولعاپتار, رەزەڭكە ەتىكتەر, كۇرەكتەر مەن ىلعال سىڭىرەتىن قۇرالدار جەتكىزىلدى.
شتاب ليانيۋنگانداعى قىتاي-قازاقستاندىق لوگيستيكالىق بازا قىتاي مەن ورتالىق ازيا اراسىنداعى تاۋار اينالىمىن بەلسەندى تۇردە ارتتىرىپ وتىرعانىن, بۇل ەكى حالىق اراسىنداعى ىنتىماقتاستىق پەن ءوزارا كومەكتى نىعايتۋعا ىقپال ەتەتىنىن ەسكە سالدى.