بۇگىن كونستيتۋتسيالىق سوت العاش رەت برايل شريفتىمەن مەملەكەتتىك جانە ورىس تىلدەرىندە باسىلىپ شىققان قازاقستان رەسپۋبليكاسىنىڭ كونستيتۋتسياسىنىڭ تۇساۋكەسەرىن وتكىزدى, دەپ حابارلايدى Egemen.kz كونستيتۋتسيالىق سوتتىڭ ءباسپاسوز قىزمەتىنە سىلتەمە جاساپ.
كونستيتۋتسيالىق سوتتىڭ قازاقستاننىڭ اتا زاڭىنىڭ ءماتىنىن كورۋ قابىلەتى ناشار نەمەسە زاعيپ ازاماتتار ءۇشىن برايل شريفتىنە (بەدەرلى-نۇكتەلى تاكتيلدى شريفت) اۋدارۋ جوباسىن ەقىۇ-نىڭ استاناداعى باعدارلامالار كەڭسەسى جانە مادەنيەت جانە اقپارات مينيسترلىگىنىڭ قولداۋىمەن جارىق كوردى.
تۇساۋكەسەرگە قازاقستاندا اككرەديتتەلگەن شەت مەملەكەتتەر مەن حالىقارالىق ۇيىمداردىڭ ەلشىلەرى, پارلامەنت دەپۋتاتتارى مەن مەملەكەتتىك ورگانداردىڭ, قازاقستاننىڭ ۇكىمەتتىك ەمەس ۇيىمدارى مەن عىلىمي قوعامداستىق وكىلدەرى قاتىستى.
كونستيتۋتسيالىق سوتتىڭ توراعاسى ەلۆيرا ازيموۆا: «ادىلەتتى قازاقستان» ساياساتى مەملەكەتتىڭ ادام قۇقىقتارى مەن بوستاندىعىن قامتاماسىز ەتۋگە جانە كەمسىتپەۋگە بەيىلدىلىگىن راستايدى. كونستيتۋتسيالىق سوت كونستيتۋتسياعا جانە ادام قۇقىقتارىنىڭ جالپىعا بىردەي دەكلاراتسياسىنا سايكەس ءاربىر ادام ءۇشىن تەڭدىك, قادىر-قاسيەت جانە ادىلدىك قاعيداتىن ىلگەرىلەتۋدى جالعاستىرىپ جاتىر. كونستيتۋتسيا ءماتىنىن برايل شريفتىمەن باسىپ شىعارۋ – بۇل ءبىزدىڭ وسى ساياساتتى ىلگەرىلەتۋگە قوسقان ۇلەسىمىز», دەپ اتاپ ءوتتى.
ءوز كەزەگىندە, ەقىۇ-نىڭ استاناداعى باعدارلامالار كەڭسەسىنىڭ باسشىسى فولكەر فروبارت قازاقستان كونستيتۋتسياسىنىڭ ءماتىنىن برايل شريفتىمەن باسىپ شىعارۋ كونستيتۋتسيالىق باقىلاۋ ورگانىنىڭ قۇقىق قورعاۋ قۇندىلىقتارىنا جانە اقپاراتقا تەڭ قولجەتىمدىلىكتى قامتاماسىز ەتۋگە ينكليۋزيۆتى كوزقاراسقا بەيىلدىلىگىن كورسەتەتىنىن اتاپ ءوتتى.
قازاقستان بۇۇ-نىڭ مۇگەدەكتەردىڭ قۇقىقتارى تۋرالى كونۆەنتسياسىنىڭ قاتىسۋشىسى بولىپ تابىلادى, ول قاتىسۋشى مەملەكەتتەردى مۇگەدەكتىگى بار ادامدارعا اقپاراتقا, بىلىمگە قول جەتكىزۋدى, زاڭ الدىنداعى تەڭدىكتى جانە تەڭ قۇقىقتىق قورعاۋدى, سونداي-اق سوت تورەلىگىنە قول جەتكىزۋدى قامتاماسىز ەتۋ ارقىلى ادام ءومىرىنىڭ بارلىق اسپەكتىلەرىنە جان-جاقتى قاتىسۋى ماقساتىندا ءتيىستى شارالار قابىلداۋعا شاقىرادى.
برايل قارپىمەن شىعارىلعان كونستيتۋتسيا ءماتىنىنىڭ باسىلىمدارى 56 مەكەمەگە, سونىڭ ىشىندە رەسپۋبليكالىق, ايماقتىق كىتاپحانالارعا, وقۋ ورتالىقتارىنا, مامانداندىرىلعان مەكتەپتەرگە بەرىلەدى.
دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سايكەس قازاقستاندا كورۋ قابىلەتى بۇزىلىسقا ۇشىراعان 160 مىڭ ادام تۇرادى. ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرى بويىنشا قازاقستاندا 85 مىڭ زاعيپ ادام, 4000 – نان استام كوزى ناشار كورەتىن بالالار, ولاردىڭ 350-گە جۋىعى زاعيپ بالالار.