جاڭادان تىركەلگەن اۆتوكولىكتەرگە سالىناتىن ۋتيليزاتسيالىق الىم سالىعىن كۇشىندە قالدىرۋ نەمەسە الىپ تاستاۋ ماسەلەسى 5 شىلدەگە دەيىن تولىق شەشىمىن تاپپاق, دەپ حابارلايدى Egemen.kz.
inbusiness.kz سايتىنىڭ جازۋىنشا الەۋمەتتىڭ وزەكتى پروبلەماسىنا اينالعان ۋتيليزاتسيالىق الىم سالىعىنا نارازى ازاماتتار ارنايى پەتيتسيا جاريالاپ, جۋىردا سالىققا قارسىلار سانى 50 مىڭ ادامنان استى. زاڭ بويىنشا قارسى قول قويۋشىلار سانى بەلگىلى ءبىر مەجەگە جەتكەندە, مىندەتتى تۇردە قايتا قارالاتىن بۇل پروتسەسس تۋرالى سەنات مىنبەرىنەن دە ايتىلدى.
پارلامەنت وتىرىسىندا سەنات توراعاسى ماۋلەن اشىمباەۆ ۋتيليزاتسيالىق سالىقتان جينالعان قاراجات جونىندە اقپاراتتىڭ جەتىسپەۋشىلىگىن سىنعا العان ەدى.
«حالىق وزدەرىنەن جينالاتىن قاراجاتتىڭ قايدا جانە قالاي جۇمسالاتىنىن بىلگىسى كەلەدى. جينالعان قاراجاتتى كومپانيالار قانداي ماقساتتا پايدالانىپ جاتقانىن بىلۋگە ءتيىس, اشىقتىق پەن جاريالىلىق كەرەك, بارلىق ماسەلە وسىدان تۋىنداپ وتىر. بولاشاقتا جاۋاپتى مەملەكەتتىك قۇرىلىمدار مەن بۇل قاراجاتتى جۇمساپ جاتقان كومپانيالار تولىق اشىقتىقتى قامتاماسىز ەتەدى دەپ سەنەمىز», دەدى سەنات توراعاسى.
حالىقتىڭ سۇراۋى مەن بيلىكتىڭ سىنىنا جەدەل جاۋاپ قاتقان ونەركاسىپ جانە قۇرىلىس ءمينيسترى قانات شارلاپاەۆتىڭ ءۋاجى قوعامدى قاناعاتتاندىرمادى.
«ۋتيلالىمنان تۇسكەن قاراجاتتان اۆتوموبيلگە ارنالعان دوڭگەلەكتەر مەن شينالار, پلاستيكالىق اۆتوبولشەكتەر شىعارىلادى. كاسىپورىنداردىڭ مۇددەسىن قورعاۋ – مەنىڭ تىكەلەي مىندەتىم. لوببيزم جاسادى دەۋ ورىنسىز. وتاندىق ونەركاسىپتىڭ دامۋىنا جاعداي جاساۋىمىز كەرەك», دەگەن ەدى مينيستر.
الايدا قازاقستاندا جاسالعان اۆتودوڭگەلەكتەر مەن پلاستيكالىق اۆتوبولشەكتەردى ەلىمىزدىڭ بازارلارى مەن اۆتودۇكەندەرىنەن كەزدەستىرۋ نەعايبىل. بازارلار مەن دۇكەندەردەن ساپاسى ناشار قىتاي ونىمدەرى الىنىپ تاستالۋى كەرەك ەدى عوي؟!
سونىمەن, 24 مامىر مەن 5 شىلدە ارالىعىن قامتيتىن ۋتيل الىم تاعدىرىن شەشەتىن پروتسەس كەزىندە ارنايى جۇمىس توبى قۇرىلادى. ونىڭ قۇرامىنا مەملەكەتتىك ءتيىستى ورگانداردىڭ مۇشەلەرى, قوعامدىق ىنتالى توپ وكىلدەرى كىرگىزىلەدى. جۇمىس توبى وڭىرلەرگە شىعىپ, حالىقپەن كەڭەس وتكىزۋدى جوسپارلاپ وتىر. قاجەت بولسا زاۋىتتار مەن كاسىپورىنداردا بولىپ, ۋتيل الىمنان تۇسكەن قاراجاتتىڭ جۇمسالىپ جاتقان جەرىن دە كورسەتپەك. كوميسسيا جۇمىسى قورىتىندىلانعان كەزدە مينيسترلىك قوعامدىق تالقىلاۋ وتكىزەدى.