ەشقاشان سارقىلمايتىن كۇش-قۋات

ءار جىلدىڭ 4 ماۋسىم كۇنىن مەملە­كەتتىك رامىزدەر كۇنى دەپ اتاپ ءوتۋى­مىزدىڭ ۇلكەن تاريحي ءمانىن ۇلتتىق قۇندىلىق رەتىندە ۇستانىپ كەلە جاتقان ۇلتتىق ءبىتىم-بولمىسىمىزعا دا تىعىز بايلانىستى.

پرەزيدەنت قاسىم-جومارت توقاەۆ اتى­راۋدا وتكەن ۇلتتىق قۇ­رىل­­­تاي­دىڭ ءۇشىنشى وتىرىسىندا: «ۇلتتىق بىرەگەيلىگىمىز مەملەكەتتىك رامىزدەردە ايقىن كورىنىس تاپقان. ءبىز­دىڭ كوك تۋى­مىزدا ءمىن جوق. وندا ەلىمىزدىڭ بىرە­گەي بولمىسى ناقتى بەينەلەنگەن. ءان­ۇرا­نىمىز دا ناعىز ۇلت­تىق رۋحتى پاش ەتەدى. قا­زاقتىڭ ءانۇرانى الەمنىڭ ءار تۇك­پىرىندە شىرقالىپ ءجۇر. جاڭا جىلدى جاقىندارىمىزدىڭ ورتا­سىن­دا ان­ۇرانمەن قارسى الۋ جاقسى داس­­تۇرگە اي­نالدى. ءبىر سوزبەن ايتساق, ءانۇرانىمىزدىڭ ءسوزى دە, اۋەنى دە حالىقتىڭ جۇرەگىنە ابدەن ورنىققان», دەگەنى دە وسى ۇلتتىق بول­مى­سىمىزدىڭ بىرەگەيلىگىن كور­سەتەدى.

مەملەكەتتىك رامىزدەرگە دەگەن قۇرمەت – ەلگە, مەملەكەتكە دەگەن قۇر­­­مەت. ءبىز ەلىمىزدىڭ تۋى, ەل­­تاڭ­باسى, ءانۇرانىنا دەگەن قۇر­مەت­تى جانە سۇيىس­پەن­شىلىكتى ءوز ۇر­پاقتارىمىزدىڭ بويىنا بالا كۇنى­نەن ءسىڭىرۋىمىز قاجەت. بۇل ورايدا كەيىنگى جىل­دارى مەملەكەتتىك رامىز­دەر­دى كەڭى­نەن ناسيحاتتاۋ شارالارى جۇيەلى جۇر­گىزىلە باستادى, تۋدى ءىلۋدىڭ جاڭا قاعي­دالارى ورنىقتى. قازىر ءانۇران وي­نالسا بولدى, ءتىپتى اياعىن جاڭا باس­قان بالدىرعاننىڭ ءوزى ءسابي قولىن جۇرە­گىنىڭ تۇسىنا قويىپ, تۇرا قالا­تى­نىنا قالاي سۇي­سىن­­بەيسىڭ؟

بيىلعى جاڭا جىل كەشىندە الەمگە ايگىلى ءانشى ديماش قۇدايبەرگەن مەملەكەتتىك ءانۇراندى ورىنداعاندا تولقىماعان, تەبىرەنبەگەن ادام جوق, ءسىرا! سونىڭ ارقاسىندا ەلىمىزدىڭ ءان­ۇرانىن الەمنىڭ تۇكپىر-تۇكپىرىندەگى حالىقتار شىرقاي باستادى. بۇعان قالاي قۋانباسقا!

ءبىز – الەم ءسۇيسىنىپ وتىرعان تاڭبالى ەلمىز, تانىمال ەلمىز. ەلدىڭ بىرلىگىن, حالقىمىزدىڭ ىنتىماعىن نىعايتا تۇسەر مەم­لەكەتتىك رامىزدەرىمىزدىڭ كۇش-قۋاتى دا ەشقاشان سارقىلماسى انىق.

جابال ەرعاليەۆ,

قازاقستاننىڭ ەڭبەك سىڭىرگەن قايراتكەرى,

سەناتورلار كەڭەسىنىڭ مۇشەسى