الەمدە نەبىر ەرەكشە ماماندىقتار بار. بىراق يت نەمەسە مىسىق تاماقتارىنىڭ ءدامىن كەلتىرۋشى مامان دەگەندى ەستىگەندە, تاڭعالدىق.
جانۋارلار تاماقتارىنىڭ ءدامىن ادامدارعا ايتا المايدى. سول ءۇشىن تابيعات جاناشىرلارى ء«دام كەلتىرۋشى» دەگەن ماماندىق ويلاپ تاپقان. وسى ىسپەن اينالىساتىنداردىڭ ءبىرى – سايمون ەليسسون. وعان مىسىق پەن يتتەردىڭ تاماعىن سىناقتان وتكىزگەن ۇنايدى ەكەن. سۇيىكتى ىسىنەن اقشا دا تاۋىپ ءجۇر. سايموننىڭ پىكىرى ازىقتىڭ بازارعا شىعارىلۋى نەمەسە شىعارىلماۋىنا تىكەلەي اسەر ەتەدى.
سىناقتان وتكىزەدى
اتتراكتسيون, سۋعا شومىلاتىن ويىن الاڭدارى جاڭادان اشىلعان كەزدە سىناقتان وتۋگە ءتيىس. وسى ىستەن ادرەنالين الىپ, تەكسەرىستەن وتكىزەتىن ەرەكشە ماماندىق بار ەكەن.
جاڭادان ىسكە قوسىلعان دەمالىس ورىندارىنىڭ ەڭ ءبىرىنشى قوناعى – وسىنداي جاندار. ەگەر ءسىز مۇنداي ماماندىقتى جاقسى مەڭگەرسەڭىز, الەمنىڭ كەز كەلگەن نۇكتەسىنەن وزىڭىزگە جۇمىس تاۋىپ الاسىز. بۇل ءىس قىزىق بولىپ كورىنگەنىمەن, قاۋىپتى. سەبەبى بيىك قۇبىردان قۇلديلاۋ, ءارلى-بەرى ۇشىرا جونەلەتىن اتتراكتسيوندارعا العاش وتىرۋ ءۇشىن جۇرەك كەرەك. ەگەر كەمشىن تۇستارى بولسا, سىناقتان وتكىزەتىن ادام زارداپ شەگۋى ابدەن مۇمكىن.
كاسىبي ىسقىرعىش
كەيبىر ادامدارعا ىسقىرعاندارىنا بولا اقشا تولەيدى. سونداي جانداردىڭ ءبىرى – ستيۆ حەربست.
ول بىرنەشە مارتە كوركەم ىسقىرۋدان الەم چەمپيوناتىندا جۇلدەلى ورىنعا يە بولدى. ءستيۆتى كىشكەنتاي كەزىندە اتا-اناسى قوناققا بارعاندا بىرگە الىپ جۇرەتىن بولعان, سەبەبى ول ءوزىنىڭ ونەرىمەن جاقىن تانىستارىنىڭ كوڭىلىن كوتەرەدى ەكەن. ستيۆ – جارنامالىق فيرمانىڭ قىزمەتكەرى, ول مانحەتتەننىڭ كوشەلەرىنە دە شىعىپ ءوز ونەرىن كورسەتە الادى. ونى موتسارت نەمەسە ءليستىڭ ەرەكشە اندەرىن تىڭداۋعا جينالعان كوپتەگەن ەسىنەۋشىنىڭ اراسىنان وڭاي اجىراتۋعا بولادى.