سارىاعاش اۋدانىنىڭ پروكۋراتۋراسى اۋدان اۋماعىندا كوممۋنالدىق قىزمەت كورسەتەتىن «سارىاعاش تۇرمىس» مكك قىزمەتىنە تالداۋ جۇرگىزدى. ناتيجەسىندە كاسىپورىن 24 076 تۇتىنۋشىنىڭ قۇقىعىن بۇزعانى انىقتالدى, دەپ جازادى Egemen.kz.
تالداۋ بارىسىندا كاسىپورىن ۋاكىلەتتى ورگاننىڭ ءتاريفتى بەكىتۋ تۋرالى كۇشىن جويعان بۇيرىعىن قولدانىپ, 2022-2023 جىلدارى 51 كاسىپكەر سارقىندى سۋلاردى قابىلداۋ قىزمەتى ءۇشىن ارتىق 38 ملن تەڭگەدەن استام قارجى تولەگەنى انىقتالدى.
سونداي-اق كاسىپورىننىڭ ۋاقىتشا ەنگىزىلگەن وتەمدىك ءتاريفتى قولدانباۋى جانە اۋىز سۋمەن قامتاماسىز ەتۋ قىزمەتتەرى ءۇشىن تاريف مولشەرىن ءوز بەتىنشە اسىرا بەلگىلەۋى سالدارىنان 2022-2023 جىلدارى 14 ەلدى مەكەننىڭ 24 025 ابونەنتى جالپى 8 708 289 تەڭگە قاراجاتتى نەگىزسىز تولەگەن.
«اتالعان بۇزۋشىلىقتار بويىنشا اۋدان پروكۋراتۋراسى اۋدان اكىمىنە جانە تابيعي مونوپوليالاردى رەتتەۋ كوميتەتىنىڭ تۇركىستان وبلىسى بويىنشا دەپارتامەنتىنە پروكۋرورلىق قاداعالاۋ اكتىلەرىن ەنگىزدى. كاسىپورىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 164-بابىنىڭ 5-بولىگى بويىنشا اكىمشىلىك جاۋاپكەرشىلىككە تارتىلىپ, 4,7 ملن تەڭگە ايىپپۇل سالىندى, 2 لاۋازىمدى ادام تارتىپتىك جاۋاپتىلىققا تارتىلدى», دەلىنگەن باس پروكۋراتۋرا حابارلاماسىندا.
تۇتىنۋشىلارعا كەلتىرىلگەن زالال ۋاقىتشا وتەم ءتاريفىن ەنگىزۋ ارقىلى وتەلەدى.
ەرلان كيىكباي,
ل.ن.گۋميلەۆ اتىنداعى ەۇۋ ستۋدەنتى