جاقىندا اقىن, اۋدارماشى, ءا.بوكەيحانوۆ اتىنداعى سىيلىقتىڭ لاۋرەاتى باقىتجان توباياقوۆتىڭ «قوبىز سارىندارى» اتتى ولەڭدەر جيناعى اقش-تىڭ نيۋ-يورك شاھارىنداعى «ليبەرتي» باسپا ۇيىندە اعىلشىن جانە ورىس تىلدەرىندە باسىلىپ شىقتى (Liberty Publishing House, 2014).
كىتاپتىڭ العىسوزىن جازعان – تانىمال كوسەمسوزشى ءارى عالىم, اتالمىش باسپانىڭ ديرەكتورى, امەريكالىق باسپاگەر يليا لەۆكوۆ. كولەمى 115 بەتتىك, اسەم بەزەندىرىلگەن كىتاپ اعىلشىن تىلىنە ورىس تىلىنەن تارجىمالانعان. اقىننىڭ وسىناۋ ليريكالىق كىتابىندا وتانعا دەگەن سۇيىسپەنشىلىك ولەڭدەرى, فيلوسوفيالىق وي-تولعامدار, ماحاببات جىرلارى توپتاستىرىلعان.
تۋىندىنىڭ تۇساۋكەسەر ءراسىمىن باسپاگەرلەر ۇستىمىزدەگى جىلدىڭ ءساۋىر ايىندا نيۋ-يورك قالاسىندا وتكىزۋدى جوسپارلاۋدا. ءبىر ەسكە سالا كەتەتىن جايت, «ليبەرتي» باسپاسى 2013 جىلى قازاق ادەبيەتىنىڭ كلاسسيگى ءابدىجامىل نۇرپەيىسوۆتىڭ ەكى تومدىعىن اعىلشىن تىلىندە باسىپ شىعارعان بولاتىن.
«ەگەمەن-اقپارات».