بۇگىن سۋدىڭ مولدىعى مەن قاتتى جەلدىڭ سالدارىنان سوكولوك كانالى بويىنداعى بوگەت بۇزىلدى, دەپ حابارلايدى Egemen.kz.
اتىراۋ وبلىسىنىڭ توتەنشە جاعدايلار جونىندەگى جەدەل شتابى حابارلاعانداي, «سوكولوك» كانالى اتىراۋ قالاسىنا باعىتتالعان مول سۋ ءنوپىرىن جايىق وزەنى ارقىلى رەتتەۋدىڭ نەگىزگى ەلەمەنتتەرىنىڭ ءبىرى بولىپ سانالادى. وسىعان بايلانىستى, كانال بويىنداعى العاشقى قورعانىس نىسانىنا قوسىمشا, قالانى تاسقىن سۋدان قورعاۋعا ارنالعان ەكىنشى قورعانىس نىسانى سالىنعان. ەكىنشى قورعانىس بوگەتىنىڭ بەرىكتىگىن قامتاماسىز ەتۋ ماقساتىندا, قوسىمشا نىعايتۋ جۇمىستارى جۇرگىزىلدى. حابارلامادا: «بوگەتتىڭ بيىكتىگى بالتىق بيىكتىك جۇيەسىنىڭ دەڭگەيىنە سايكەس ۇلعايتىلدى. اتالعان ۋچاسكەدە تاۋلىك بويى كەزەكشىلىك ۇيىمداستىرىلىپ وتىر. قازىرگى ۋاقىتتا جاعدايدىڭ وزگەرۋىنە بايلانىستى قاجەتتى شەشىمدەر الۋ ءۇشىن قوسىمشا تەحنيكالار جىبەرىلدى», دەلىنگەن.