كوركەم گيمناستيكادان استانادا وتكەن ەل چەمپيوناتىندا ەلجانا تانيەۆاعا تەڭ كەلەر ەشكىم تابىلمادى. كوپسايىستىڭ قورىتىندىسى بويىنشا ول الدىنا جان سالعان جوق.
ەلىمىزدىڭ ەڭ ۇزدىك گيمناسشىسى, بىرقاتار حالىقارالىق جارىستىڭ جەڭىمپازى جانە جۇلدەگەرى, ازيانىڭ ءابسوليۋتتى چەمپيونى دەگەن اتاعى بار 18 جاستاعى شىمكەنتتىك سپورتشى ەلوردادا جالاۋى جەلبىرەگەن جارىستىڭ قورىتىندىسى بويىنشا 133.150 ۇپاي جيدى. بۇل ناتيجە ەلجانا تانيەۆاعا كەزەكتى رەت قازاقستان چەمپيونى اتانۋ ءۇشىن جەتكىلىكتى بولدى. كۇمىس مەدالدى استانالىق ميلانا پارفيلوۆا (131.850 ۇپاي) يەلەنسە, قولا جۇلدەنى تاعى ءبىر ەلوردالىق ايبوتا ەرتايقىزى (127.900 ۇپاي) ەنشىلەدى. تاعى ءبىر تانىمال گيمناسشى ەريكا جايلاۋوۆا (127.800) ءتورتىنشى ورىندا قالىپ قويدى.
– جۋىردا عانا تاشكەنتتە وتكەن ازيا چەمپيوناتى فيزيكالىق تۇرعىدان عانا ەمەس, پسيحولوگيا جاعىنان دا وتە اۋىر بولدى. سەبەبى كەز كەلگەن باپكەر ءوز شاكىرتىنىڭ وليمپيا ويىندارىنا قاتىسقانىن قالايدى. بۇل جولى ليتسەنزيانى جەڭىپ الۋدىڭ ءوزى وڭاي بولعان جوق. ازيا چەمپيوناتى مەن قازاقستان چەمپيوناتىنىڭ اراسى جاقىن بولعانىمەن, بۇل جارىستان باس تارتا المايمىز. ويتكەنى بۇل – ەلىمىزدەگى ەڭ باستى دودا. قيىن بولسا دا, ەلجانا سوڭىنا دەيىن كۇرەسىپ, باس جۇلدەنى ولجالادى. جەڭىس تۇعىرىنا كوتەرىلگەن وزگە ارۋلاردىڭ دا ونەرىنە ريزامىن, – دەيدى ۇلتتىق كوماندانىڭ باس باپكەرى ءاليا يۋسۋپوۆا.
كوماندالىق سايىستا شىمكەنت شاھارىنىڭ سپورتشىلارى (60.550 ۇپاي) ءبىرىنشى ورىندى يەلەنسە, استانا قالاسى (54.600 ۇپاي), شىعىس قازاقستان وبلىسىنىڭ (46.550 ۇپاي) وكىلدەرى ەكىنشى جانە ءۇشىنشى ساتىلارعا جايعاستى.