2014 جىلعى 28 شىلدە استانا قالاسى
«ۇزدىك سپورت ءجۋرناليسى» اتاعىن بەرۋ قاعيدالارىن بەكىتۋ تۋرالى
«دەنە شىنىقتىرۋ جانە سپورت تۋرالى» قازاقستان رەسپۋبليكاسى زاڭىنىڭ 7-بابىنىڭ 46) تارماقشاسىنا سايكەس بۇيىرامىن:
1. قوسا بەرىلىپ وتىرعان «ۇزدىك سپورت ءجۋرناليسى» اتاعىن بەرۋ قاعيدالارى بەكىتىلسىن.
2. ستراتەگيالىق دامۋ دەپارتامەنتى (د.ءۇ. قامزەباەۆا) زاڭنامادا بەلگىلەنگەن تارتىپپەن:
1) قازاقستان رەسپۋبليكاسى ادىلەت مينيسترلىگىنە وسى بۇيرىقتى مەملەكەتتىك تىركەۋگە ۇسىنۋدى;
2) وسى بۇيرىقتى قازاقستان رەسپۋبليكاسى ادىلەت مينيسترلىگىندە مەملەكەتتىك تىركەۋدەن وتكەننەن كەيىن بۇقارالىق اقپارات قۇرالدارىندا جانە «ادىلەت» اقپاراتتىق-قۇقىقتىق جۇيەسىندە رەسمي جاريالاۋدى قامتاماسىز ەتسىن.
3. وسى بۇيرىقتىڭ ورىندالۋىن باقىلاۋ قازاقستان رەسپۋبليكاسىنىڭ سپورت جانە دەنە شىنىقتىرۋ ىستەرى اگەنتتىگى توراعاسىنىڭ ورىنباسارى ە.ب. قاناعاتوۆقا جۇكتەلسىن.
4. وسى بۇيرىق العاش رەسمي جاريالانعان كۇنىنەن باستاپ كۇنتىزبەلىك ون كۇن وتكەن سوڭ قولدانىسقا ەنگىزىلەدى.
قازاقستان رەسپۋبليكاسى سپورت جانە دەنە شىنىقتىرۋ
ىستەرى اگەنتتىگىنىڭ توراعاسى ت.ەسەنتاەۆ.
«كەلىسىلدى»
قازاقستان رەسپۋبليكاسى بايلانىس جانە اقپارات
اگەنتتىگىنىڭ توراعاسى ____________ ا.جۇماعاليەۆ.
2014 جىلعى 29 شىلدە
قازاقستان رەسپۋبليكاسى سپورت جانە دەنە شىنىقتىرۋ ىستەرى اگەنتتىگى توراعاسىنىڭ 2014 جىلعى 28 شىلدەدەگى №291 بۇيرىعىمەن بەكىتىلدى
«ۇزدىك سپورت ءجۋرناليسى» اتاعىن بەرۋ
قاعيداسى
1. جالپى ەرەجەلەر
1. وسى «ۇزدىك سپورت ءجۋرناليسى» اتاعىن بەرۋ قاعيداسى (بۇدان ءارى – قاعيدا) «دەنە شىنىقتىرۋ جانە سپورت تۋرالى» قازاقستان رەسپۋبليكاسى زاڭىنىڭ 7-بابىنىڭ 46) تارماقشاسىنا سايكەس ازىرلەندى.
2. قاعيدا قازاقستاننىڭ بۇقارالىق اقپارات قۇرالدارىندا (بۇدان ءارى – باق) سپورتتىق وقيعالاردى جانە سپورت توڭىرەگىندەگى وقيعالاردى جاريالاۋدا ەلەۋلى ەڭبەك سىڭىرگەن بۇقارالىق اقپارات قۇرالدارى وكىلدەرىنە «ۇزدىك سپورت ءجۋرناليسى» اتاعىن بەرۋدىڭ ءتارتىبى مەن شارتتارىن انىقتايدى.
3. «ۇزدىك سپورت ءجۋرناليسى» اتاعىن بەرۋ (بۇدان ءارى – اتاق) ءۇشىن ماقساتى قازاقستاندىق سپورت جۋرناليستيكاسىنىڭ ساپاسىن جانە باق-تا سپورتتىق اقپاراتتاردى تاراتۋدىڭ مادەني دەڭگەيىن ارتتىرۋ بولىپ تابىلاتىن كونكۋرس وتكىزىلەدى.
4. وسى قاعيدادا مىناداي ۇعىمدار پايدالانىلادى:
1) سىياقى - «ۇزدىك سپورت ءجۋرناليسى» كونكۋرسىندا (بۇدان ءار – كونكۋرس) جەڭىمپاز بولعان بۇقارالىق اقپارات قۇرالدارىنىڭ وكىلىنە قايتارىمسىز بەرىلەتىن اقشا;
2) اتاق بەرۋ جونىندەگى كونكۋرستىق كوميسسيا – دەنە شىنىقتىرۋ جانە سپورت سالاسىنداعى ۋاكىلەتتى ورگان (بۇدان ءارى – ۋاكىلەتتى ورگان) كونكۋرس جەڭىمپازىن انىقتاۋ جانە وعان اتاق بەرۋ ءۇشىن قۇراتىن كوميسسيا;
3) كونكۋرسقا قاتىسۋشى – وسى قاعيداعا سايكەس قۇجاتتارى مەن جۇمىستارىن كونكۋرسقا قاتىسۋ ءۇشىن بەرەتىن بۇقارالىق اقپارات قۇرالدارىنىڭ وكىلى.
2. اتاق بەرۋدىڭ ءتارتىبى مەن شارتتارى
5. اتاق جىل سايىن جەلتوقسان ايىنىڭ ەكىنشى جارتىسىندا كونكۋرستىق نەگىزدە بەرىلەدى.
6. كونكۋرس وتكىزۋ تۋرالى حابارلاندىرۋدى ۋاكىلەتتى ورگان قۇجاتتاردى قابىلداۋ باستالعانعا دەيىن وتىز كۇنتىزبەلىك كۇن بۇرىن قازاقستان رەسپۋبليكاسىنىڭ بارلىق اۋماعىنا تارالاتىن باق-تا جاريالايدى, سونداي-اق ۋاكىلەتتى ورگاننىڭ ينتەرنەت-رەسۋرسىندا ورنالاستىرادى.
7. اتاق بەرۋ جونىندەگى كونكۋرس ءۇش نوميناتسيا بويىنشا وتكىزىلەدى:
1) «ۇزدىك تەلەۆيزيالىق رەپورتاج (فيلم, سيۋجەت)»;
2) «ۇزدىك جاريالانىم (باسپا, ينتەرنەت باق)»;
3) «ۇزدىك فوتورەپورتاج (فوتوجۇمىس)».
8. كونكۋرسقا سپورتشىعا نەمەسە سپورتتىق وقيعاعا ارنالعان, ەفيرگە شىققان جانە/نەمەسە باسپا نەمەسە ەلەكتروندى باق-تا اعىمداعى جىل ىشىندە جارىق كورگەن جۇمىستار قابىلدانادى.
9. بارلىق نوميناتسيالار ءۇشىن, ەڭ الدىمەن, ماتەريالدى بەرۋدىڭ قىزىقتى نىسانى, ورىن العان وقيعانىڭ ديناميكالىلىعى مەن كورنەكىلىگى, ءجۋرناليستىڭ ءسوز ساپتاۋىنىڭ دۇرىستىعى مەن ناقتىلىعى باعالانادى.
1) «ۇزدىك سپورتتىق تەلەۆيزيالىق رەپورتاج (فيلم, سيۋجەت)» نوميناتسياسى
ۆيدەوماتەريالدى باعالاۋ كريتەريلەرى – ءجۋرناليستىڭ ساۋاتتى اۋىزشا سويلەگەن ءسوزى, سيۋجەتتىڭ دراماتۋرگياسى, ۆيدەوقاتاردىڭ ساپاسى, ستەنداپتىڭ, كادردان تىس ءماتىننىڭ ورىندىلىعى.
2) «ۇزدىك سپورتتىق جاريالانىم (باسپا/ينتەرنەت باق)»
جاريالانىمدى باعالاۋ كريتەريلەرى – ءتىلدىڭ ساۋاتتىلىعى, ناقتىلىعى, ءسوز ساپتاۋدىڭ تۇپنۇسقالىعى, اۆتورلىق بەرۋ, سيۋجەتتىڭ دراماتۋرگياسى.
3) «ۇزدىك سپورتتىق فوتورەپورتاج (فوتوجۇمىس)» نوميناتسياسى
فوتورەپورتاجدى باعالاۋ كريتەريلەرى – ديناميكالىلىعى, ستاندارتتى ەمەس كوركەم شەشىمى, ونەرتاپقىشتىلىعى مەن كرەاتيۆتىلىگى, بەينەسىنىڭ ساپاسى.
10. ءاربىر اۆتور ءارتۇرلى نوميناتسيالارعا ءتۇرلى جۇمىستاردى, بىراق ءاربىر نوميناتسياعا كەمىندە ءبىر جۇمىستان ۇسىنا الادى.
11. كونكۋرسقا قاتىسۋ ءۇشىن ۋاكىلەتتى ورگانعا مىنالاردى ۇسىنۋ قاجەت:
1) كونكۋرسقا قاتىسۋ ءۇشىن ەركىن ناسىنداعى ءوتىنىش;
2) قاتىسۋشىنىڭ شىعارماشىلىق قىزمەتىنىڭ قىسقاشا سيپاتتاماسى;
3) كونكۋرستىق جۇمىس – ۆيدەوماتەريالدار, اۋديوماتەريالدار, جاريالانىمدار (باسپا/ينتەرنەت باق), فوتوجۇمىستار (فوتورەپورتاجدار).
3. اتاق بەرۋ جونىندەگى كونكۋرستىق كوميسسيا
12. اتاقتى بەرۋ ءۇشىن ۋاكىلەتتى ورگان كونكۋرستى وتكىزۋ جونىندەگى كوميسسيانى قۇرادى. كونكۋرستى وتكىزۋ جونىندەگى كوميسسيا قۇرۋ جانە كونكۋرستى وتكىزۋ جونىندەگى كوميسسيانىڭ حاتشىسىن انىقتاۋ تۋرالى شەشىمدى ۋاكىلەتتى ورگاننىڭ باسشىسى قابىلدايدى.
13. كونكۋرس وتكىزۋ جونىندەگى كوميسسيا مۇشەلەرىنىڭ جالپى سانى كەمىندە 11 ادام بولۋى ءتيىس. كونكۋرستىق كوميسسيانىڭ توراعاسى, توراعانىڭ ورىنباسارى مەن باسقا دا مۇشەلەرى كونكۋرس وتكىزۋ جونىندەگى كوميسسيانىڭ مۇشەلەرى بولىپ تابىلادى. توراعا بولماعان ۋاقىتتا ونىڭ فۋنكتسياسىن ونى اۋىستىراتىن ادام اتقارادى.
14. كوميسسيانىڭ وتىرىسى ەگەر وندا كوميسسيا مۇشەلەرىنىڭ جالپى سانىنىڭ كەمىندە 2/3 قاتىسسا زاڭدى دەپ سانالادى.
15. كوميسسيانىڭ شەشىمى كوميسسيانىڭ قاتىسۋشى مۇشەلەرىنىڭ كوپ داۋسىمەن قابىلدانادى. داۋىستار تەڭ بولعان جاعدايدا, توراعالىق ەتۋشىنىڭ داۋسى شەشۋشى بولىپ تابىلادى. كوميسسيانىڭ شەشىمى حاتتامامەن رەسىمدەلەدى.
16. كوميسسيانىڭ قانداي دا ءبىر مۇشەسى بولماعان جاعدايدا كوميسسيا وتىرىسىنىڭ حاتتاماسىندا ونىڭ قاتىسپاعان سەبەبى كورسەتىلەدى. كوميسسيانىڭ جوق مۇشەلەرىن اۋىستىرۋعا جول بەرىلمەيدى.
17. ۋاكىلەتتى ورگان كوميسسيا شەشىم شىعارعان ساتتەن باستاپ ون كۇنتىزبەلىك كۇن ىشىندە اتاق بەرۋ تۋرالى بۇيرىق شىعارادى.
4. قورىتىندى ەرەجە
18. ءاربىر نوميناتسيا بويىنشا جەڭىمپازدارعا «ۇزدىك سپورت ءجۋرناليسى» اتاعى جانە «جازۋشى سەيداحمەت بەردىقۇلوۆتى ماڭگى ەستە قالدىرۋ تۋرالى» قازاقستان رەسپۋبليكاسى مينيسترلەر كابينەتىنىڭ 1994 جىلعى
2 جەلتوقسانداعى № 1363 قاۋلىسىنا سايكەس سەيداحمەت بەردىقۇلوۆ اتىنداعى سىيلىق تاپسىرىلادى.
19. كونكۋرس جەڭىمپازدارىن ماراپاتتاۋ ءۇشىن قاجەتتى قاراجات رەسپۋبليكالىق بيۋدجەت ەسەبىنەن سەيداحمەت بەردىقۇلوۆ اتىنداعى جۇلدەنى تولەۋگە بولىنگەن 50 ايلىق ەسەپتىك كورسەتكىش مولشەرىندەگى قاراجات شەڭبەرىندە جۇزەگە اسىرىلادى.
20. كونكۋرستىڭ ناتيجەلەرى مۇددەلى مەملەكەتتىك ورگاندار مەن ۇيىمداردىڭ ينتەرنەت-رەسۋرستارىندا ورنالاستىرىلادى جانە بۇقارالىق اقپارات قۇرالدارىندا كونكۋرس وتكىزىلگەننەن كەيىن 10 كۇنتىزبەلىك كۇن ىشىندە جاريالانادى.
بۇيرىق قازاقستان رەسپۋبليكاسىنىڭ ادىلەت مينيسترلىگىندە 2014 جىلعى 5 تامىزدا نورماتيۆتىك قۇقىقتىق كەسىمدەردى مەملەكەتتىك تىركەۋدىڭ تىزىلىمىنە №9678 بولىپ ەنگىزىلدى.