مەملەكەت باسشىسى قاسىم-جومارت توقاەۆ قازاقستان-سينگاپۋر بيزنەس فورۋمىنىڭ جابىلۋ سالتاناتىنا قاتىستى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنىڭ ايتۋىنشا, ۇزاق ۋاقىت بويى گەوگرافيالىق شالعايلىق پەن بايلانىستاردىڭ جەتكىلىكسىزدىگى ەكونوميكالىق ءوزارا ءىس-قيمىلعا كەدەرگى كەلتىردى. بۇگىندە جاھاندانۋ مەن ينفراقۇرىلىمنىڭ دامۋىنىڭ ارقاسىندا ەلدەر بۇرىنعىدان دا ءبىر-بىرىمەن بايلانىستى.
قاسىم-جومارت توقاەۆ قازاقستاندىق قتج كومپانياسى مەن سينگاپۋرلىق PSA International كومپانياسى اراسىنداعى ترانسكاسپي حالىقارالىق كولىك باعىتىنىڭ الەۋەتىن كەڭەيتۋگە باعىتتالعان سينەرگەتيكالىق سەرىكتەستىكتىڭ مىسالىن كەلتىردى.
«بۇل باعىت ەۋرازيالىق ىنتىماقتاستىق دەڭگەيىن تۇبەگەيلى وزگەرتۋى مۇمكىن. بۇل ورتالىق جانە شىعىس ازيادان ەۋروپاعا دەيىنگى ەڭ قىسقا جانە تۇراقتى جول. ءبىز سينگاپۋرلىق كومپانيالار مەن قارجى ينستيتۋتتارى وسى سالاداعى ىسكەرلىك جانە ينۆەستيتسيالىق مۇمكىندىكتەردى زەرتتەۋ ارقىلى ۇلكەن پايدا تابا الادى دەپ سەنەمىز. مەن سونداي-اق Qazaq Air اۋە كومپانياسىن ۆەتنامدىق SOVICO Group كومپانياسىنىڭ جەكەشەلەندىرۋىن قۇپتايمىن, بۇل قازاقستان مەن اسەان ەلدەرى اراسىنداعى اۋە قاتىناسىن ارتتىرادى», دەدى ەل پرەزيدەنتى.