ەۆگەنيا پۋتيلوۆامەن پۋشكين كىتاپحاناسىندا ونلاين-كەزدەسۋ ءوتتى
شىعىس وڭىرىندە «قازاقستان-رەسەي: شەكاراسىز اشىق وقۋلار» حالىقارالىق جوباسى اياسىندا رەسەيلىكتەرمەن كەزدەسۋلەر جالعاسۋدا. تاياۋدا وبلىس ورتالىعىنداعى ا.پۋشكين اتىنداعى كىتاپحانادا ا.گەرتسەن اتىنداعى رەسەي مەملەكەتتىك پەداگوگيكالىق ۋنيۆەرسيتەتىنىڭ قۇرمەتتى پروفەسسورى, سانكت-پەتەربۋرگ قالاسى جازۋشىلار وداعىنىڭ مۇشەسى, «چەتىرە ۆەكا رۋسسكوي پوەزي دەتيام» اتتى ءۇش تومدىق كىتاپتىڭ اۆتورى ەۆگەنيا پۋتيلوۆامەن ونلاين-كەزدەسۋ ۇيىمداستىرىلدى.
جاقىندا جارىق كورگەن ءۇش تومدىق باسىلىم اۆتورىنىڭ ايتۋىنشا, اتالعان كىتاپ ورىس ادەبيەتىنىڭ فولكلوردان باستاپ قازىرگى كەزەڭگە دەيىنگى پوەزيالىق دامۋ ەنتسيكلوپەدياسى ىسپەتتى.
ونلاين-كەزدەسۋگە وڭىردەگى فيلولوگيا ماماندارى, بالاباقشا تاربيەشىلەرى جانە كىتاپحاناشىلار قاتىستى. جازۋشى ەۆگەنيا وسكاروۆنا شىعارماشىلىعى ءجونىندە لەنينگراد وبلىستىق بالالار كىتاپحاناسىنىڭ ديرەكتورى م.كۋراكينا اڭگىمەلەپ, تانىستىردى. جازۋشىمەن كەزدەسۋ ادەتتەن تىس ونلاين-جۇيەدە وتكىزىلسە دە, قوس تاراپتاعىلار كەڭىستىك ايىرماسىن سەزىنگەن جوق. جازۋشى ىلكىدە كۇيەۋىنىڭ قىزمەتىنە بايلانىستى قازاقستاندى ارالاپ, قازاق حالقىنىڭ سالت-ءداستۇرى مەن مەملەكەتتىڭ بۇگىنگى دامۋ كەلبەتىنە قانىققانىن ەرەكشە اتاپ ءوتتى.
ەۆگەنيا پۋتيلوۆانى قالامگەر-ارىپتەستەرى «ورىس بالالار ادەبيەتىنىڭ اجەسى» دەپ اتايدى. ول – بالالار ادەبيەتىن فيلولوگيالىق زەرتتەۋلەردىڭ نەگىزگى نىسانىنا اينالدىرعان قالامگەر. كوپتەگەن جىلدار بويى ەل اراسىندا ساقتالعان, حالىق اۋزىندا جاتتالعان تۋىندىلاردى زەرتتەۋدە ەلەۋلى ەڭبەك ەتتى. جازۋشى ىزدەنىسىنىڭ ناتيجەسىندە ورىس پوەزياسى بالالارعا ارنالعان تۋىندىلارىنىڭ بىرقاتارى ءوز اۆتورلارىن تاپتى.
وسكەمەندىك وقىرماندار ساۋالىنا وراي ە.پۋتيلوۆا ءوزى رەداكتورلىق ەتكەن «دەتسكايا ليتەراتۋرا» وقۋلىعىنىڭ تولىعىمەن جاپون تىلىنە اۋدارىلعانىن جانە جۋىردا جارىق كورەتىنىن جەتكىزدى. بۇگىندە اتالعان ەڭبەكتەن الىنعان ۇزىندىلەر جاپوندىق جۋرنالدارعا جاريالانىپ ۇلگەرگەن.
كەزدەسۋ سوڭىندا ورىس بالالار ادەبيەتىنىڭ وكىلى الداعى ۋاقىتتا تاعى دا قازاقستانعا كەلۋدى جوسپارلاپ وتىرعانىن جەتكىزدى.
دۋمان اناش,
«ەگەمەن قازاقستان».
وسكەمەن.