«قازاق گازەتتەرى» سەرىكتەستىگىنىڭ باسشىلىعى يران پرەزيدەنتى يبراحيم ءرايسيدىڭ قازا تابۋىنا بايلانىستى اتالعان ەلدىڭ قازاقستانداعى ەلشىلىگى مادەني وكىلدىگىنە بارىپ, يران حالقىنا كوڭىل ايتتى, دەپ حابارلايدى Egemen.kz.
سەرىكتەستىك باسشىسى ديحان قامزابەك ۇلى يبراحيم رايسي سىندى تۇلعانىڭ جانە ۇكىمەت دەلەگاتسياسى مۇشەلەرىنىڭ مەزگىلسىز قازاسىنا وراي بارشا قازاق حالقىمەن بىرگە «قازاق گازەتتەرى» ۇجىمى دا قايعىرىپ كوڭىل ايتاتىنىن جەتكىزدى. سونىمەن قاتار ول يران پرەزيدەنتى ەلىنىڭ وركەندەۋىنە ولشەۋسىز ەڭبەك ءسىڭىرىپ, حالقىنا قالتقىسىز قىزمەت ەتكەنىن, ونىڭ ءىزىن باساتىن ەلشىل ازاماتتاردىڭ يران حالقىنان كوپتەپ شىعۋىنا تىلەكتەس ەكەنىن ءبىلدىرىپ, كوڭىل ايتۋ كىتابىنا جازبا قالدىردى.
يراننىڭ قازاقستانداعى ەلشىلىگىنىڭ مادەني كەڭەسشىسى ءالي اكبار تالەبي ماتين مارقۇم يبراحيم ءرايسيدىڭ قاشاندا حالقىنىڭ ورتاسىنان تابىلاتىن پاراساتتى باسشى بولعانىنا, ونىڭ جەتەكشىلىگى كەزەڭىندە يران مەن قازاقستان اراسىنداعى ارىپتەستىك بايلانىستار نىعايا تۇسكەنىنە توقتالدى. وسىناۋ ورنى تولماس قازاعا وراي قايعىرىپ كوڭىل ايتقان ەل باسشىلىعىنا, بارشا قازاق حالقىنا ريزاشىلىعىن ءبىلدىردى.