«ءومىر وزگەرەدى... وزگەرمەيتىن – ماتەماتيكا عانا»

الماتىدا ءحى حالىقارالىق جاۋتىكوۆ وليمپياداسى وتۋدە

وڭتۇستىك استاناعا 15 ەلدىڭ ماتەماتيكاعا جۇيرىك جەتكىنشەكتەرى جينالعان بولاتىن. وسىلايشا الماتىداعى ءال-فارابي اتىنداعى قازۇۋ-دىڭ ستۋدەنتتەر سارايىندا ماتەماتيكا, فيزيكا جانە ينفورماتيكادان ءحى حالىقارالىق جاۋتىكوۆ وليمپياداسى باستالدى. ولاردىڭ اراسىندا اتالمىش وليمپيادانىڭ باس جۇلدەسىن سەگىز رەت قاتارىنان جەڭىپ العان, ماسكەۋ مەملەكەتتىك ۋنيۆەرسيتەتى جانىنداعى مامانداندىرىلعان وقۋ-عىلىمي ورتالىعىنىڭ (سۋنتس) وقۋشىلارى دا بار. وليمپيادانى ۇيىمداستىرۋشى – «دارىن» رەسپۋبليكالىق عىلىمي-پراكتيكالىق ورتالىعى جانە رمفمومي, ال قولداۋشىسى – الماتى قالاسى اكىمدىگى. بۇل كۇندە الەمنىڭ ءار شال­عايىنداعى ەسەپكە جۇيرىك بالالار اراسىندا تانىمال جاۋتىكوۆ وليمپياداسىن ءبىلىم جانە عىلىم ءمينيسترىنىڭ ورىنباسارى ەسەنعازى يماناليەۆ اشىپ بەردى. مۇنان كەيىن ءسوز العان بەلگىلى ماتەماتيك, عالىم اسقار جۇمادىلداەۆ: – جىل سايىنعى جاۋتىكوۆ وليم­پياداسى تۇراقتى داستۇرگە اي­نالعان ءبىلىم دوداسى دەۋگە بولادى. ماتەماتيكا – دۇنيەنىڭ بارلىق تۇكپىرىندە 1 سىنىپتان 11 سىنىپقا دەيىن وقىتىلاتىن بىردەن-ءبىر ءپان. ەكى جەردەگى ەكى الماتىدا دا – 4, ماسكەۋدە دە – 4. ساياسات وزگەرەدى, ءومىر وزگەرەدى, بىراق, ماتەماتيكا وزگەرمەيدى. جاستارعا تابىس تىلەيمىن, – دەدى. بيىلعى وليمپياداعا قازاق­ستان, رەسەي, ۋكراينا, بەلورۋسسيا, ازەربايجان, ارمەنيا, گرۋزيا, قىرعىزستان, تاجىكستان, تۇرىك­مەنستان, وزبەكستان, بولگاريا, رۋمىنيا, سەربيا جانە موڭعوليا سياقتى الەمنىڭ 15 ەلىنەن 58 كوماندا (391 قاتىسۋشى) قاتىسۋدا. حالىقارالىق قازىلار القاسى قۇرامىندا الەمنىڭ 9 ەلىنىڭ  عالىمدارى جۇمىس ىستەپ وتىر. قازىلار القاسىنا ءال-فارابي اتىنداعى قازۇۋ رەكتورى عا­لىمقايىر مۇتانوۆ توراعالىق ەتۋدە. حجو 11 جىل بويى ءوزىن جاقىن جانە الىس شەت ەلدەر­دىڭ مامانداندىرىلعان ءۇز­دىك مەكتەپتەرىنىڭ جەكەلەگەن رەي­تينگتەرى مەن مىقتى كومان­دالارىنىڭ رەيتينگتەرىن شىعارا­تىن الەمدە تەڭدەسى جوق بىرەگەي وليمپيادا رەتىندە تانىتا ءبىلدى. ءداستۇر بويىنشا جەڭىمپاز كوماندا گران-پري يەگەرى اتانادى. جەڭىمپاز كوماندالار مەن وليمپيادا جۇلدەگەرلەرى باعالى سىيلىقتارمەن ماراپاتتالادى. حالىقارالىق جاۋتىكوۆ وليم­پياداسىنىڭ جەڭىمپازدارىنا نازارباەۆ ۋنيۆەرسيتەتىنىڭ ءبىلىم گرانتتارى بەرىلەدى. سونىمەن قا­تار, نازارباەۆ ۋنيۆەرسيتەتىنە قا­بىلداۋ ەرەجەسى جانە اكادە­ميا­­لىق باعدارلاماسى تۋرالى, سون­داي-اق, قازاق-بريتان ۋني­ۆەر­سي­تە­تىنە قابىلداۋ ەرەجەسى تۋرالى تۇساۋكەسەر وتەدى. قالىپتاسقان ءداستۇر بويىنشا وليمپيادانى جوعارى دەڭگەيدە وتكىزۋگە وليمپيادانىڭ تۇراقتى باس سەرىكتەسى «رمفمومي تۇلەك­تەرىنىڭ قورى» قق مەن «Microsoft Kazakhstan» كومپانياسى قولداۋ كورسەتۋدە. ايناش ەسالي, «ەگەمەن قازاقستان». الماتى.