اتىراۋدا جولاۋشىلار اۆتوبۋسى ەكى ادامدى مەرت قىلدى

اتىراۋ. 14 قاڭتار. اتىراۋ قالاسىندا جولاۋشىلار تاسىمالدايتىن اۆتوبۋستىڭ ءبىرى ەكى ادامدى باسىپ كەتتى. ەكى جاياۋ جۇرگىنشى وقيعا ورنىندا قايتىس بولدى. بۇل تۋرالى egemen.kz ءتىلشىسى حابارلادى. وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆا حابارلاعانداي, قايعىلى وقيعا بۇگىن تاڭەرتەڭگى ساعات 08.15-تە بولعان. ناقتىلاي ايتقاندا, №12 باعىتتا جولاۋشىلار تاسىمالدايتىن اۆتوبۋس جۇرگىزۋشىسى «تاماشا» ويىن-ساۋىق ورتالىعى ماڭىندا جاياۋ جۇرگىنشى جولىندا ەكى ايەلدى باسىپ كەتكەن. اۋىر جاراقات سالدارىنان وقيعا ورنىندا كوز جۇمعان ەكى ايەلدىڭ ءبىرى 1953 جىلى, ەكىنشىسى 1954 جىلى تۋعان. قازىر اۆتوبۋس جۇرگىزۋشىسىنە قاتىستى قىلمىستىق كودەكستىڭ جاڭا رەداكتسياسىنداعى 345-باپتىڭ 4-بولىمىمەن قىلمىستىق ءىس قوزعالدى. جۇرگىزۋشى قاماۋعا الىندى. جولداسبەك شوپەعۇل. دەرەك: اتىراۋ وبلىستىق ىشكى ىستەر دەپارتامەنتى. سۋرەت: راحىم قويلىباەۆ.