قر پارلامەنتى سەناتىندا ساتىپ الىناتىن تاۋارلاردىڭ, جۇمىستاردىڭ, كورسەتىلەتىن قىزمەتتەردىڭ ساپاسىن ارتتىرۋ, مەملەكەتتىك ساتىپ الۋ راسىمدەرىن وڭايلاتۋ جانە بيۋروكراتيادان ارىلتۋ, راسىمدەردى ودان ءارى اۆتوماتتاندىرۋ, قۇرىلىس نارىعىن مونوپولياسىزداندىرۋ, سونداي-اق ساتىپ الۋدىڭ بىرىڭعاي تۇعىرناماسىن جاساۋ ماقساتىندا ازىرلەنگەن «مەملەكەتتىك ساتىپ الۋ تۋرالى» زاڭ دەپۋتاتتارعا تانىستىرىلدى, دەپ جازادى Egemen.kz.
زاڭدا ساتىپ الىناتىن تاۋارلاردىڭ, جۇمىستار مەن كورسەتىلەتىن قىزمەتتەردىڭ ساپاسىن ارتتىرۋ ءۇشىن مەملەكەتتىك ورگانداردىڭ وسى اقپاراتتىق جۇيەسىن كەڭىنەن پايدالانۋ جانە قوعامدىق باقىلاۋدى ەنگىزۋ ارقىلى ءونىم بەرۋشىنى تاڭداۋدا باعادان تىس ولشەمشارتتاردى دامىتۋ ۇسىنىلادى. ساتىپ الۋ جانە بيۋروكراتيزاتسيا پروتسەسىن وڭايلاتۋ ماقساتىندا شاعىمداردى قاراۋدىڭ جاڭا تەتىگىن ەنگىزۋ, سونداي-اق باقىلاۋشى ورگان – ىشكى مەملەكەتتىك اۋديت كوميتەتىنىڭ ءرولىن قايتا قاراۋ جوسپارلانىپ وتىر.
بۇگىنگى تاڭدا جەكەلەگەن ءىرى كومپانيالاردىڭ مونوپوليالىق جاعدايى مەن ولاردىڭ قۇرىلىس جۇمىستارىن قوسالقى مەردىگەرلىككە بەرۋىنە نەگىزدى سىن دا بار. وسىعان بايلانىستى شارتتى جەڭىلدىكتەردى ەسەپتەۋ كەزىندە اۋماقتىق بەلگى مەن تەرىس ءمان تۇرىندەگى باعا شارتتارىن قولدانۋ جالعاساتىن بولادى. جۇمىستاردى ورىنداۋ ورنىندا تىركەلگەن ءونىم بەرۋشىلەرگە 1% مولشەرىندە شارتتى جەڭىلدىك بەرىلەدى. بۇل ولشەم شاعىن جانە ورتا بيزنەستى دامىتۋعا جانە قولداۋعا, سونداي-اق ءتيىستى وڭىردە سالىق تۇسىمدەرىن ۇلعايتۋعا ىقپال ەتەدى.
ودان باسقا, مەملەكەتتىك ساتىپ الۋدىڭ بىرىڭعاي وپەراتورى – «ەلەكتروندىق قارجى ورتالىعى» اق بازاسىندا ساتىپ الۋ بويىنشا بىرىڭعاي تۇعىرناما قۇرىلاتىن بولادى. ءبىرىنشى كەزەڭدە اعىمداعى ساتىپ الۋ الاڭدارى ساقتالادى جانە ساتىپ الۋ بويىنشا ەگجەي-تەگجەيلى اقپارات جيناۋ جانە كورسەتۋ ءۇشىن ينتەگراتسيا جۇرگىزىلەدى. بۇل قولدا بار ساتىپ الۋ الاڭدارىن ءبىر مەزگىلدە اجىراتا وتىرىپ, بىرىڭعاي ساتىپ الۋ پورتالىنا كەزەڭ-كەزەڭىمەن كوشۋگە مۇمكىندىك بەرەدى.