ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى قايسار سۇلتانباەۆ قازاقستاندا كولىك جۇرگىزۋ مادەنيەتىن ارتتىرۋ جانە جازادان بۇلتارتپاۋ قاعيداتىن قامتاماسىز ەتۋ ءۇشىن قولدانىلاتىن تسيفرلىق شەشىمدەر تۋرالى بايانداپ بەردى, دەپ حابارلايدى Egemen.kz.
«قازىرگى تاڭدا جولداردا جول قوزعالىسى ەرەجەلەرىن بۇزۋ فاكتىلەرىن تىركەيتىن 24 مىڭعا جۋىق اۆتوماتتى كامەرالار ورناتىلعان. ولاردىڭ كومەگىمەن بارلىق بۇزۋشىلىقتاردىڭ 50 پايىزى تىركەلەدى. استانا مەن شىمكەنتتە بۇل كورسەتكىش 70 پايىزعا دەيىن ءوستى. الايدا, ۇلتتىق اۋقىمدا ولاردىڭ سانى وتە جەتكىلىكسىز. قازىرگى ۋاقىتتا ىشكى ىستەر ورگاندارى جول قوزعالىسىن كونتاكتىسىز باقىلاۋدى بەلسەندى تۇردە قولدانىپ جاتىر. جول قوزعالىسى ەرەجەلەرىن بۇزۋدى تىركەۋدىڭ ستاتسيونارلىق اۆتوماتتى جۇيەلەرى جوعارى پروفيلاكتيكالىق اسەرگە يە. بىراق ولاردىڭ سانى ەلدى مەكەندەردىڭ جول جەلىسىن تولىق قامتۋعا مۇمكىندىك بەرمەيدى, ال اۋىلدىق جولداردا مۇلدە جوق», دەدى قايسار سۇلتانباەۆ ورتالىق كوممۋنيكاتسيالار قىزمەتىندە وتكەن بريفينگتە.
وسىعان بايلانىستى پوليتسەيلەر 2019 جىلدان باستاپ ورناتىلعان كامەرالار مەن رادارلارمەن جابدىقتالعان پاترۋلدىك كولىكتەردى پايدالانا باستادى. جۇيە مارشرۋت بويىنشا جول قوزعالىسى ەرەجەلەرىن بۇزۋدى اۆتوماتتى تۇردە تىركەپ, باس پروكۋراتۋرانىڭ ورتالىق سەرۆەرىنە جىبەرەدى. الايدا قىزمەتكەرلەردىڭ بۇل اقپاراتتى جويۋ مۇمكىندىگى جوق. قازىرگى ۋاقىتتا مۇنداي كولىكتەردىڭ 202 بىرلىگى بار. جىل سوڭىنا دەيىن تاعى 86 كولىكتى ساتىپ الۋ جوسپارلانىپ وتىر.
«ەندى كوشە كامەرالارىنان الىنعان دەرەكتەردى تالداي وتىرىپ, جۇيە ءوزى جاقىن ماڭداعى پوليتسيا قىزمەتكەرىنىڭ پلانشەتىنە قاۋىپتى جۇرگىزۋشىنىڭ جاقىن جەردە ەكەنىن بىلدىرەتىن حابارلاما جىبەرەدى. وسىلايشا, پوليتسەيلەر جول قوزعالىسى ەرەجەسىن ورەسكەل بۇزعانداردى دەرەۋ انىقتاي الادى», دەپ قوستى سپيكەر.
وسىلايشا, باعدارلامانىڭ كومەگىمەن جىل باسىنان بەرى جالعان ءنومىر قولدانۋدىڭ 100-دەن استام فاكتىسى تىركەلىپ, 700-دەن استام جۇرگىزۋشىنىڭ جۇرگىزۋشى كۋالىگىنەن ايىرىلعانى انىقتالدى. سونداي-اق 670 كولىك ءنومىرى تاركىلەنىپ, 5 مىڭنان استام كولىك ايىپ تۇراعىندا تۇرعانى بەلگىلى بولدى.
قىرمىزى جۇماعاليقىزى,
ەۇۋ ستۋدەنتى