سۋ تاسقىنىنان زارداپ شەككەن وڭىرلەردە تۇراتىن 3,5 مىڭنان استام وقۋشى بيىل ارالىق جانە قورىتىندى ەمتيحان تاپسىرمايدى. اتىراۋ, اقتوبە جانە سولتۇستىك قازاقستان وبلىستارىندا وقۋشىلاردىڭ قورىتىندى باعاسى جىلدىق باعالارى نەگىزىندە شىعارىلادى. بۇل تۋرالى Qazaqstan ۇلتتىق ارناسى حابار تاراتتى.
ايتا كەتسەك, بيىلعى وقۋ جىلىن 3 ملن 800 مىڭ وقۋشى اياقتاعالى وتىر. وسى تۇستا وقۋ-اعارتۋ ءمينيسترى عاني بەيسەمباەۆ سۋ تاسقىنىنان زارداپ شەككەن وڭىرلەردە 3800-دەن استام بالا ساۋىقتىرۋ ورتالىقتارىنا جىبەرىلەتىنىن ايتتى.
قازىردىڭ وزىندە 628 بالا دەمالىپ جاتىر. ودان بولەك «قازاقستان حالقىنا» قورىنىڭ قولداۋىمەن 20 مىڭ بالا تەگىن دەمالۋعا مۇمكىندىك الادى. ونىڭ ىشىندە سۋ تاسقىنىنان زارداپ شەككەن وڭىرلەردىڭ وقۋشىلارىنا, حالىقتىڭ الەۋمەتتىك وسال توپتارىنان شىققان اۋىل بالالارىنا باسىمدىق بەرىلەدى.
«بيىل ەلىمىزدە 10 مىڭنان استام دەمالىس ورنىندا 3 ميلليونعا جۋىق بالا جازعى دەمالىسىن وتكىزەدى», دەدى مينيستر.