پاۆلوداردا ايگىلى گەولوگ-عالىم قانىش ساتباەۆتىڭ 125 جىلدىعىنا ارنالعان « ۇلى دالا جورىعى» رەسپۋبليكالىق مارافون-بايگەنىڭ ءۇشىنشى ماۋسىمى باستالدى. اشىلۋ سالتاناتىنا «AMANAT» پارتياسىنىڭ اتقارۋشى حاتشىسى داۋلەت كارىبەك, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, پاۆلودار وبلىسىنىڭ اكىمى اسايىن بايحانوۆ, مارافون-بايگەنىڭ تەڭ ۇيىمداستىرۋشىسى الىبەك الدەنەي, «JORYQ» ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ قاتىستى, دەپ حابارلايدى Egemen.kz.
«ۇلتتىق قۇرىلتايدا پرەزيدەنت قازاقستان ۇلى دالا كوشپەلى وركەنيەتىنىڭ تىكەلەي مۇراگەرى سانالاتىنىن جانە ءبىز ءوزىمىزدىڭ مادەني مۇرامىزدى قورعاپ, ىلگەرىلەتۋىمىز كەرەك ەكەنىن اتاپ ءوتتى. « ۇلى دالا جورىعى» بايگەسى «AMANAT» پارتياسىنىڭ قولداۋىمەن ءۇشىنشى جىل قاتارىنان وتكەلى وتىر. مارافون-بايگە وتانداستارىمىزدى بىرىكتىرەتىن, ۇلتتىق رۋحتى نىعايتاتىن جوباعا اينالدى», دەدى AMANAT»-تىڭ اتقارۋشى حاتشىسى داۋلەت كارىبەك.
وسى جىلعى 500 شاقىرىمدىق مارافون-بايگە پاۆلودار – استانا باعىتى بويىنشا وتەدى. وعان ەلىمىزدىڭ ءار وڭىرىنەن 19 كوماندا قاتىسىپ جاتىر.
« ۇلى دالا جورىعى» مارافون-بايگەسىن ءۇشىنشى رەت وتكىزىپ وتىرمىز. بۇل – ازاماتتار مەن ارعىماقتاردىڭ ءتوزىمى مەن ەرىك-جىگەرى سىنعا تۇسەتىن دودا. بارلىق سپورتشىلارىمىز وسى كۇردەلى سىناقتان سۇرىنبەي ءوتىپ, جورىتقاندا جولدارى بولسىن!», دەدى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
كوماندالار بەس كۇن بويى كۇنىنە 100 شاقىرىم جول ءجۇرىپ ءوتۋى ءتيىس. ءار 50 شاقىرىم سايىن كوماندالارعا دەمالۋعا مۇمكىندىك بەرىلەدى. اتتاردى تاجىريبەلى ۆەتەرينارلار باقىلايدى. ايتا كەتەيىك, ءار كوماندانىڭ جولعا شىعۋ ۋاقىتى ءارتۇرلى. ءبىرىنشى كوماندا ساعات 07.00-دە, كەلەسىسى ەكى مينۋت ارالىقتان سوڭ جولعا شىعادى. ناتيجەسىندە سوڭعى كوماندانىڭ ساپارى 07.36-دا باستالادى. كوماندالار قانداي ءنومىر تاعاتىنى جەرەبە تارتۋ بارىسىندا انىقتالدى.
قوزعالىس ۋاقىتى ءارتۇرلى بولعاندىقتان كوماندالار ءبىر-بىرىمەن جارىسپايدى. بارلىق قاشىقتىقتى ەڭ قىسقا ۋاقىتتا ەڭسەرگەن كوماندا جەڭىمپاز اتانادى.
ەسكە سالايىق, «JORYQ» رەسپۋبليكالىق فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە بايگە, كوكپار, اۋدارىسپاق, اسىق اتۋ, ساداق اتۋ, جامبى اتۋ, تەڭگە ءىلۋ, قۇسبەگىلىك جانە تاعى باسقا فەدەراتسيالار بار. ۇلتتىق سپورت قاۋىمداستىعىن بەلگىلى كاسىپكەر, مەتسەنات, «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.