2024 جىلعى 1 مامىرداعى جاعداي بويىنشا جۇمىسپەن قامتۋعا جاردەمدەسۋ شارالارىنا 195,9 مىڭ قازاقستان ازاماتى قاتىستى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىك مالىمەتىنشە, 154,2 مىڭ ادام جۇمىسپەن قامتىلدى, ونىڭ 50,3 مىڭى تۇراقتى جۇمىسقا ورنالاسقان.
سۋبسيديالاناتىن جۇمىس ورىندارىنا 103,9 مىڭ ادام ورنالاستىرىلدى. ونىڭ ىشىندە الەۋمەتتىك جۇمىس ورىندارىندا 9,5 مىڭ ادام, جاستار پراكتيكاسىندا 6,3 مىڭ ادام, قوعامدىق جۇمىستاردا 72,9 مىڭ ادام, «العاشقى جۇمىس ورنى» جوباسى اياسىندا 3,4 مىڭ ادام, «ۇرپاقتار كەلىسىمشارتى» جوباسى اياسىندا 90 ادام, «كۇمىس جاس» جوباسى اياسىندا 11,8 مىڭ ادام جۇمىسپەن قامتىلدى.
ەڭبەك نارىعىندا سۇرانىسقا يە داعدىلار بويىنشا ونلاين وقىتۋمەن 24,4 مىڭ جۇمىسسىز قامتىلدى, ونىڭ ىشىندە 21,9 مىڭى وقۋدى اياقتادى.
سونداي-اق «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋمەن 21,6 مىڭ ادام قامتىلدى, ونىڭ ىشىندە 13,1 مىڭ ادام وقۋدى اياقتاپ, سەرتيفيكاتتار الدى.
قىزمەت سالاسىن تاڭداۋ ماقساتىندا 73,4 مىڭ ادام الەۋمەتتىك كاسىپتىك باعدارلاۋدان ءوتتى.
بۇدان باسقا, جاڭا بيزنەس-باستامالاردى ىسكە اسىرۋ ءۇشىن 2024 جىلى حالىقتىڭ الەۋمەتتىك وسال ساناتتارىنا 400 اەك (1 476 800 تەڭگە) مولشەرىندە 9 مىڭ گرانت جانە جاستارعا جىلدىق مولشەرلەمەسى 2,5%-دىق, سوماسى 5 ملن تەڭگەگە دەيىنگى 5 796 جەڭىلدەتىلگەن ميكروكرەديت بەرۋ كوزدەلگەن.