«قازگيدرومەت» رمك مالىمەتىنشە, بۇگىن ءتورت وبلىستا ۇسىك جۇرەدى, دەپ حابارلايدى Egemen.kz.
وڭتۇستىك تسيكلونى مەن اتموسفەرالىق فرونتالدى بولىكتەر ەلىمىزدىڭ باسىم بولىگىندە ءوز اسەرىن ساقتايدى. نايزاعاي ويناپ, جاڭبىر جاۋادى, شىعىس پەن ورتالىقتا قاتتى جاڭبىر, بۇرشاق جاۋىپ, داۋىل سوعادى. تەك ەلىمىزدىڭ سولتۇستىگى, سولتۇستىك-باتىسى مەن وڭتۇستىك-شىعىسىندا جاۋىن-شاشىنسىز اۋا رايى بولادى. رەسپۋبليكا بويىنشا جەلدىڭ كۇشەيۋى, تۇنگى جانە تاڭەرتەڭگى ساعاتتاردا سولتۇستىگى, سولتۇستىك-باتىسى مەن ورتالىعىندا تۇمان كۇتىلەدى.
«تۇندە قوستاناي, اقتوبە وبلىستارىنىڭ سولتۇستىگىندە, سولتۇستىك قازاقستان وبلىسىنىڭ باتىسىندا, اقمولا وبلىسىنىڭ باتىسى مەن سولتۇستىگىندە توپىراق بەتىندە 2-3 گرادۋس ۇسىك جۇرەدى», دەلىنگەن سينوپتيكتەردىڭ حابارلاماسىندا.
قاراعاندى وبلىسىنىڭ باتىسىندا, وڭتۇستىگىندە, ۇلىتاۋ وبلىسىنىڭ ورتالىعىندا, اباي, قوستاناي وبلىستارىنىڭ وڭتۇستىگىندە, اتىراۋ وبلىسىنىڭ سولتۇستىك-باتىسىندا, شىعىس قازاقستان وبلىسىنىڭ وڭتۇستىك-شىعىسىندا, قىزىلوردا وبلىسىنىڭ باتىسىندا, باتىس قازاقستان وبلىسىنىڭ باتىسىندا, سولتۇستىك-باتىسىندا, وڭتۇستىك-باتىسىندا جوعارى ءورت قاۋپى ساقتالادى.
قىزىلوردا وبلىسىنىڭ قازالى اۋدانىندا, تۇركىستان وبلىسىنىڭ ءشولدى اۋداندارىندا, اباي وبلىسىنىڭ ءۇرجار اۋدانىندا توتەنشە ءورت قاۋپى كۇتىلەدى.