كەشەگى كەڭەس وداعى كەزىندە مال شارۋاشىلىعىنداعى تاماشا تابىسىمەن اتى دۇرىلدەپ شىققان, جەمىستى دە جەڭىستى ىستەرىنە ەل سۇيسىنگەن ەكى مارتە ەڭبەك ەرى جازىلبەك قۋانىشباەۆ بارشا قازاق ايرىقشا ماقتان تۇتقان تۇلعانىڭ ءبىرى. شۋ وزەنىنىڭ جاعاسىنا دەيىن جايىلىپ جاتقان مويىنقۇمنىڭ قۇمدى بەل-بەلەستەرى مەن حانتاۋىنىڭ وتى مول كوك شالعىن, كوكوراي بوكتەرىندە مىڭعىرتىپ قاراكول قويىن وسىرگەن شوپان اتانىڭ سوڭىنان ەرگەن شاكىرتتەرى, جۇمىسىن جاقسى جالعاستىرعان ءىزباسارلارى دا كوپ بولعان.
سولاردىڭ ءبىرى – «ايدارلى» كەڭشارىنىڭ اعا شوپانى رەتىندە ارقاشان كوزگە ءتۇسىپ, تەك بيىكتەن عانا كورىنگەن ەڭبەك ەرى, مارقۇم ءدىلداش اپا يتباسوۆا. ءيا, ول شىن ەڭبەك باقىتىن قوي باعۋدان جاڭىلماي تاپقان جان ەدى. سونىڭ ارقاسىندا قازاق كسر جوعارعى كەڭەسىنە ەكى رەت دەپۋتات بولىپ سايلاندى, «قازاق كسر-ءنىڭ مال شارۋاشىلىعىنا ەڭبەگى سىڭگەن شەبەر» اتاندى.
1983 جىلى مويىنقۇمنىڭ ايگىلى «تۇلپارساز» جايلاۋىندا اتالعان ەر-انامىزدىڭ 70 جاستىق مەرەيتويى ۇلكەن سالتاناتپەن مەرەكەلەندى. بۇل قاتىسۋشىلاردىڭ بارلىعىنىڭ جانىنا, جۇرەگىنە شۋاق-نۇر قۇيعان باسقوسۋعا مويىنقۇمدىقتارمەن قاتار, جان-جاقتان جۇزدەگەن قادىرلى قوناق جينالىپ, توي يەسىنە اق نيەتتەرىمەن اقجارما تىلەكتەرىن ارناعان بولاتىن. ولاردىڭ ىشىندە ءدىلداش اپانىڭ قاناتتاس, قاتارلاستارى, ەڭبەك ەرلەرى, جامبىل (قازىرگى تاراز) قالاسى تۇبىندەگى اۋدانداردا تۇراتىن سىندىبالا وڭعارباەۆا, داريعا جانتوقوۆا انالارىمىز دا جۇرگەن-ءدى.
مىنا سۋرەتتە سول مەرەيتويدىڭ ءبىر ءساتى بەينەلەنگەن. اتاپ ايتقاندا, ءدۇيىم جۇرتتىڭ اراسىندا اۋداندىق پارتيا كوميتەتىنىڭ ءبىرىنشى حاتشىسى, وسى قۇمدى ءوڭىردى ۇزاق ۋاقىت باسقارىپ, ونىڭ ءوسىپ-وركەندەۋىنە, ارشىنداپ العا باسۋىنا ۇلكەن ۇلەسىن قوسقان ايتەكەڭ, ايتباي نازاربەكوۆ ءدىلداش اپامىزدى ماراپاتتاپ تۇر. جانىندا – كەڭ-مول پىشىلگەن دەنەسىن بۇرىپ, جارقىن جۇزىمەن قارىنداسىنا مەيىرىممەن قاراعان, تەرشىگەن ماڭدايىن ەندى-ەندى عانا اق بەتورامالىمەن سۇرتكەن, كەۋدەسىندە قوس جۇلدىزى جارقىراعان جارىقتىق جاز-اتا, جازىلبەك قۋانىشباەۆ.
كەزىندە «ەڭبەك ەر اتاندىرادى» دەگەن ماعىناسى زور ءسوز كوپ ايتىلاتىن. راسىندا, ءىسىن وتە ادال, جۇمىسىن ۇنەمى ۇزدىك اتقارعانداردى ءاردايىم توبەمىزگە كوتەرىپ, تورگە شىعاراتىنبىز. ءبىراز ۋاقىت, نەگىزىنەن نارىقتىق ەكونوميكانىڭ اسەرى بولار, بۇل ماسەلەنىڭ ءمانى سولعىن تارتىپ قالعانداي ەدى...
بۇگىندە ەڭبەكتىڭ جاسامپازدىق كۇش-قۋاتىنا جاڭاشا سيپات بەرىلىپ, ەڭبەك ادامىنىڭ مارتەبەسىن بيىكتەتىپ, مەرەيىن وسىرۋگە ايرىقشا كوڭىل ءبولىنىپ وتىرعانى قۋانتادى.
بەرىكباي قادىقوۆ,
جۋرناليست