«مۇگەدەكتەر ماسىل بولمايدى»

– دەيدى «ءۇمىت-نادەجدا» قوعامدىق بىرلەستىگىنىڭ توراعاسى دۇيسەنعالي وسپانوۆ

قوستاناي قالاسىنىڭ شەت شاعىن اۋدانىنداعى عيماراتتىڭ تومەنگى قاباتىنىڭ ءبىر جاعىن تۇگەلدەي الىپ, سوندا «ءۇمىت-نادەجدا» قوعامدىق بىرلەستىگى يگىلىكتى ىستەر اتقارىپ وتىر. بۇل مۇگەدەك جانداردىڭ ىزدەپ كەلىپ, جان شۋاعىن سەزىنەر, كوڭىلىنە رۋحاني مەدەت تابار ورنى. جاقىندا وسى قوعامدىق بىرلەستىكتىڭ توراعاسى دۇيسەنعالي وسپانوۆ پەن قولونەر شەبەرى الينا لامپارتەر «نۇر وتان» پارتياسىنىڭ قولداۋىمەن 7-ءشى رەت بەرىلگەن «جانشۋاق» قوعامدىق سىيلىعىنا يە بولدى. ءبىزدىڭ ءتىلشىمىز «ءۇمىت-نادەجدا» قوعامدىق بىرلەستىگىندە بولىپ, دۇيسەنعالي وسپانوۆپەن اڭگىمەلەسكەن ەدى. – دۇيسەنعالي, سىيلىعىڭىز قۇتتى بولسىن! – راحمەت. ەڭبەگىمىزدى ساتپايمىز, تەك مۇنداي ماراپات ارقىلى مۇمكىندىگى شەكتەۋلى جانداردىڭ دا ماسىل ەمەس, قوعامعا پايدالى ءىس تىندىرا الاتىنىن جۇرت بىلسە بولدى. – سىيلىقتىڭ اتالىمى «مۇگە­دەك جانداردىڭ ءومىر ساپاسىن جاق­سارتقانى ءۇشىن» دەپ اتالادى. وسى اتالىم, راسىندا, ءسىز باس­قارا­تىن «ءۇمىت-نادەجدا» قوعامدىق بىرلەستىگىنىڭ اتقارعان ىستەرىنە ءدال كەلىپ تۇرعان جوق پا؟! – ايتقانىڭىز ورىندى. جۇبايىم ارۋنا جاقسىعۇلوۆا ەكەۋمىز وسىدان ون جىل بۇرىن «ءۇمىت-نادەجدا» قوعامدىق بىرلەستىگىن قۇرعان بولاتىنبىز. اتقارعان ءىسىمىزدىڭ بارلىعى دا قوستانايلىقتاردىڭ كوز الدىندا. ءوزىمىز ءتۇرلى جوبالار جاساپ, سول ارقىلى ءتۇرلى قورلاردىڭ بولگەن قارجىسىن ۇتىپ الىپ, جۇمىس ىستەپ كەلەمىز. سوڭعى رەت ءبىزدىڭ جوبالارىمىز «سوروس-قازاقستان», تۇڭعىش پرەزيدەنت قورلارىنىڭ گرانتتارىن ۇتىپ الدى. العاشقى كەزدەن باستاپ, قوستاناي قالاسىنداعى, ودان قالدى, اۋداندارداعى اربادا وتىرىپ قالعان جاندارعا ءمۇ­گەدەكتەر ارباسىن جەتكىزىپ بەرىپ جۇردىك. بۇرىن كەڭەس وداعى كەزىندە مۇگەدەكتەرگە ىڭعايلانىپ جاسالعان جەڭىل ماشينالار بولاتىن. كەيىنگى كەزدە سونداي ماشينالار جاسالمايدى. ءبىز وسى ماسەلەنى كوتەرىپ, بىرنەشە رەت اۆتوشەرۋ وتكىزدىك. الدىمەن قازاقستاندى ارالاپ شىقتىق. 2013 جىلى اۆتوشەرۋمەن قازاقستان مەن رەسەيدى ارالادىق. بىراق ءالى دە بۇل ماسەلە شەشىمىن تاپقان جوق. ءۇش جىلدان بەرى «ءۇمىت-نادەجدا» قوعامدىق بىرلەستىگى عيماراتتىڭ تومەنگى قاباتىن جالعا الىپ, وندا مۇگەدەك جاندار ءۇشىن كوپتەگەن جۇمىستار جۇرگىزەمىز. قازىر ورتالىققا وتىزشاقتى ادام كەلەدى. ولار كەشكە دەيىن وسىندا وزدەرىنىڭ سۇيىكتى ىسىمەن اينالىسادى. كۇنىنە ءبىر مەزگىل ىستىق تاماق بەرەمىز. ورتالىقتا بىرنەشە كابينەت بار. ينتەرنەتكە قوسىلعان كومپيۋتەر كلاسى, سپورت-جاتتىعۋ زالى, مەديتسينا كابينەتى, مۋزىكا كابينەتى, قولونەر زالى جۇمىس ىستەيدى. باعاسى ءبىر ميلليون تەڭگەدەي تۇراتىن مۋزىكالىق اپپارات-جابدىق ساتىپ العانبىز. ەكى تىگىن ماشيناسى تاعى بار. اربادا وتىرعان كىسىلەردىڭ كوپشىلىگى ماسساجدى قاجەت ەتەدى. سوندىقتان ونىڭ جابدىعى دا وسىدان تابىلادى. «ءۇمىت-نادەجدا» قوعامدىق بىرلەستىگىنىڭ ءانسامبلى جۇمىس ىستەي باستادى. ول قوعامدىق ورىنداردا, «سوسنوۆىي بور» ءساناتوريىنىڭ دەمالۋشىلارى الدىندا ءجيى كونتسەرت بەرەدى. كاسىبي مۋزىكالىق ءبىلىمى بار, بەلگىلى ءانشى كۇنسۇلۋ جاقاەۆا ءبىزدىڭ بىرلەستىكتەگى ءان ايتاتىن كىسىلەردىڭ داۋىسىن قويادى, اندەر ۇيرەتەدى, جالپى, وسى انسامبلگە جەتەكشىلىك ەتەدى. جۇرتشىلىق الدىندا باتىل كونتسەرت بەرە باستاعانىمىز دا وسى كاسىبي دايىندىقتىڭ ارقاسى. ارامىزدا ونەرلى جاندار جەتكىلىكتى. – بۇل ورتالىقتا تەك كاسىبي مۋزىكا مامانى عانا ەمەس, پسيحولوگ, مەديتسينا قىزمەتكەرى, كاسىبي سپورت مامانى قىزمەت ىستەيتىنىنەن حاباردارمىز. بۇل سىزدەردەگى جۇمىس دەڭگەيىنىڭ بيىكتىگىن كورسەتەتىنى راس. تاراتىپ ايتىپ كەتسەڭىز. – مۇنداي قوعامدىق بىرلەستىكتەردە كاسىبي مامانداردىڭ قىزمەت ىستەۋى ءجيى كەزدەسە بەرمەيدى. ءبىز وتكەن جىلدارى سەگىز كومپيۋتەر الىپ, وندا مۇگەدەكتەردى وقىتتىق. ولارمەن مامان مۇعالىم جۇمىس ىستەدى. كومپيۋتەردى مەڭگەرگەندەرگە سەرتيفيكات بەردىك. ءبىزدىڭ بىرلەستىكتە «پرەودولەنيە» دەگەن ورتالىق جۇمىس ىستەيدى. وندا ءىس قاعازدارىن جۇرگىزۋدى, پوليگرافيالىق ديزايندى, فوتو ءىسىن وقىتىپ جاتىرمىز. دەمەك, ءبىزدىڭ سەرتيفيكاتتى العان سوڭ, مۇمكىندىگى شەكتەۋلى جاندار جۇمىس ىزدەۋگە تالپىنادى. جاقىندا ولاردىڭ العاشقى توبى ءبىتىردى, قالا ورتالىعىنداعى مادەنيەت سارايىندا كونتسەرت قويىپ, ولارعا سەرتيفيكاتتارىن تاپسىردىق. ءبىزدىڭ سپورت-جاتتىعۋ زالىندا مۇگەدەكتەر اربادا بيلەۋمەن, جەڭىل اتلەتيكامەن جانە ۇستەل تەننيسىمەن اينالىسادى. «ءۇمىت-نادەجدا» بىرلەستىگىنىڭ تاعى ءبىر ماقتانارلىق ءىسى بار. مىسالى, بيىل ينچحوندا وتكەن پاراليمپيالىق ازيا ويىندارىنا قازاقستاننان 86 سپورتشى قاتىسقانى بەلگىلى. سو­لاردىڭ اراسىندا اربادا بيلەۋدەن قازاقستاندىق سپورتشىلار ءبىر كۇمىس, ءبىر قولا مەدال الىپ قايتتى. مەن ماقتانىپ-اق ايتايىن, اربادا وتىرىپ بيلەۋ سپورتىمەن العاش قوستانايلىق مۇگەدەك جاندار اينالىسا باستاعان ەدى. ونىڭ نەگىزىن ەلىمىزدە «ءۇمىت-نادەجدا» بىرلەستىگى قالادى. وسى بەدەلدى جارىسقا قوستانايدان ءۇش پاراليمپيالىق سپورتشى جەڭىل اتلەتيكا مەن مىلتىق اتۋدان بارىپ كەلدى. رەسپۋبليكاداعى ۇلتتىق پاراليمپيالىق كوميتەتتىڭ ءبىزدىڭ وبلىستا فيليالىن اشىپ, ونى باسقارۋدى ماعان جۇكتەدى. ءبىز مۇمكىندىگى شەكتەۋلى جاندار اراسىندا تالانتتى سپورتشىلاردى تاۋىپ, ولاردى دايىنداۋ جۇمىستارىن باستاپ كەتتىك. بىراق مۇگەدەكتەر ءۇشىن مامانداندىرىلعان, ارنايى جابدىقتالعان سپورت زالى جوق. رەسپۋبليكادا وسى ماسەلە ەسكەرىلمەگەن ءۇش وبلىس بولسا, سونىڭ ءبىرى – قوستاناي. جاقىندا وبلىس اكىمى نۇرالى سادۋاقاسوۆ مۇمكىندىگى شەكتەۋلى جانداردىڭ تالاپ-تىلەكتەرىن تىڭداعان بولاتىن. سوندا ءبىز قوستانايدا سپورت كلۋبىن, ارنايى سپورت زالىن اشۋ تۋرالى تىلەگىمىزدى ايتتىق. تاعدىردىڭ تالايىندا قالعان جاندار ءۇشىن سپورت الدىمەن دەنساۋلىق, ەكىنشىدەن ولاردىڭ ومىرگە دەگەن قۇلشىنىسىن وياتادى. – قوستانايداعى مۇمكىندىگى شەك­تەۋلى جاندار ءۇشىن وزەكتى ماسەلە تەك سپورت زال بولسا, ونىڭ جاراسى جەڭىل بولار؟.. – وسى سۇراعىڭىز مەنىڭ ەسىمە كەرەمەت ءبىر ماسەلەنى سالىپ وتىر. ول ءبىزدىڭ قوعامداعى مۇگەدەكتەرگە دەگەن كوزقاراستىڭ وزگەرۋى دەر ەدىم. بۇرىن ونسىز دا تاعدىردىڭ اۋىرتپالىعىن كوتەرىپ جۇرگەن مۇگەدەك جاندار كوشەگە شىعا المايتىن. ولارعا ادامدار تىكسىنە نەمەسە مۇسىركەي قارايتىن. مۇگەدەك جاندار دا وسىنداي سۇق كوزدەردەن جاسقانىپ, وزدەرىن قوعامنىڭ تولىققاندى مۇشەسى سەزىنە الماس ەدى. قازىر ولاي ەمەس. قوستانايدا وسىدان ءبىراز جىل بۇرىن مۇگەدەك جاستار ۇكىمەتتىك ەمەس ۇيىمداردىڭ قوزعاۋىمەن تەگىن جوعارى ءبىلىم الا باستادى. ولاردى جۇمىسقا ورنالاستىرۋ ءۇشىن بوس ورىن جارمەڭكەلەرى ءوتىپ تۇرادى. «كەدەرگىسىز كەلەشەك» جوباسى اياسىندا قوعامدىق ورىندارعا پاندۋستار جاسالۋدا, ونىڭ ساپاسىنا «نۇر وتان» پارتياسىنىڭ وبلىستىق فيليالى دا ىقپال ەتىپ وتىرادى. بارلىق جەردە وسىنداي جۇمىستار ءجۇرىپ جاتىر. مۇمكىندىگى شەكتەۋلى جاندار جۇمىس ىستەپ, جۇرت قاتارلى ءوزىنىڭ ناپاقاسىن تاۋىپ, ودان قالدى, ءوزىنىڭ قولىنان كەلگەن ىسىمەن قوعامعا پايدا كەلتىرۋگە ۇمتىلادى. ونداي جان ءوزىن ماسىل سەزىنبەيدى. مۇگەدەكتەرگە قوعامدا مۇنداي جىلى كوزقاراستىڭ قالىپتاسۋىنا ولاردىڭ وزدەرىنىڭ تالپىنۋى دا كومەك بولدى. مىسالى, ءبىزدىڭ «ءۇمىت-نادەجدا» بىرلەستىگى ون جىلدان بەرى قانداي شارا وتكىزبەدى دەسەڭشى. ورتالىققا كەلگەن مۇگەدەك جاستار العاشقىدا ءبىر-بىرىنە توسىرقاي قارايتىن. قازىر ولار ارالاسىپ-قۇرالاسىپ كەتتى. مەن ولارعا «مەن دە سەندەر سەكىلدى جاس كەزىمدە ومىردەن جەڭىلمەۋ ءۇشىن العا تالپىنا بەردىم. ادامدارمەن ارالاستىم, ارۋنا ەكەۋمىز تابىسىپ, وتاۋ قۇردىق. سولاي ءبىر بىرىڭمەن تانىسىڭدار, تابىسىڭدار, ومىردەن قالماڭدار. سوندا عانا اينالاڭداعىلار سەندەرگە تەڭ كوزقاراسپەن قارايدى», دەپ اقىلىمدى ايتىپ وتىرامىن. ەندى وزەكتى ماسەلەگە كەلەيىن. بىزدەر ۇتىپ العان گرانتتاردا مۇگەدەكتەردىڭ قوعامدىق ۇيىمدارىنا ارنالعان باس­پانا ماسەلەسى قامتىلمايدى. ءبىز 170 شارشى مەتر بولاتىن بولمەلەردى جالعا الامىز, ايىنا 85 مىڭ تەڭگە تولەيمىز, قالتامىزدان قارجى شىعاراتىن كەزى­مىز از بولمايدى. بۇل بىزگە وتە اۋىر تيەدى. كوشىپ-قونا بەرۋگە شاما كەلمەيدى. تەك ءبىز عانا ەمەس, قالادا مۇگەدەكتەردىڭ باسقا دا ۇكىمەتتىك ەمەس ۇيىمدارى بار. بارلىعىنا ورتاق قيىندىق بۇل. وسى ماسەلەنى كوپتەن كوتەرىپ كەلەمىز, بىراق شەشىمىن تاپقان ەمەس. مۇگەدەك جانداردىڭ قوعامدىق ۇيىمدارى تابىس تاباتىن كاسىپورىن ەمەس, سوندىقتان جەرگىلىكتى بيۋدجەتتەن ورتاق قارجىلاندىرىلسا, ول عيماراتتى جالعا الۋ اقىسىنا جۇمسالسا دەگەن تىلەك بار. قامقورلىق بولىپ, قولتىقتان دەمەپ جىبەرسە, مۇمكىندىگى شەكتەۋلى جانداردىڭ ىشكى رۋحىنىڭ مىقتىلىعىمەن تالاي شەپتى الىپ جۇرگەنىنە جۇرت كۋا. – اڭگىمەڭىزگە راحمەت. اڭگىمەلەسكەن ءنازيرا جارىمبەتوۆا, «ەگەمەن قازاقستان». قوستاناي.