اۋدان ورتالىعى – تەرەڭكولدە جاڭا بالاباقشا اشىلدى. كوپتەن كۇتكەن قۋانىشتى بالالار مەن اتا-انالار ءۇشىن «نۆس سترويتەل» سەرىكتەستىگى سىيعا تارتتى. قۇرىلىسشىلار بۇرىنعى ينتەرنات ءۇيىن كۇردەلى جوندەۋدەن وتكىزىپ, قايتا جاڭارتتى. بالاباقشانىڭ ەرەكشەلىگى سول, مۇندا كىشكەنتايلار 1,5 جاستان 3 جاسقا دەيىن قابىلدانادى. ءتاربيەشىلەر بوبەكجاي دەپ اتايدى.
قازىر اۋدان ورتالىعىنىڭ 33 تۇرعىنى ءۇشىن جاڭا جۇمىس ورىندارى اشىلدى. ياعني بالاباقشادا ءبىلىمدى, بىلىكتى تاربيەشىلەر قىزمەت ەتە باستادى. تاعى ءبىر قۋانتارلىعى سول, قازاق تىلىندە تاربيە بەرەتىن بالاباقشاعا بالالارىن جەتەكتەپ وزگە ۇلت وكىلدەرىنىڭ اتا-انالارى دا كەلدى. وسى جەردە تۋىپ-وسكەن ولار مەملەكەتتىك ءتىل – قازاق ءتىلى دەپ سانالى تۇردە تۇسىنەدى.
ءسويتىپ, 90 بالانىڭ 27-ءسىن وزگە ۇلت وكىلدەرىنىڭ بالالارى قۇراپ وتىر. مىسالى, سلاۆا رىبالكونىڭ شەشەسى ەلەنا كاسىپكەر, نيكيتا ديدەنكونىڭ اناسى ۆالەنتينا بولسا ءبىزدىڭ ارىپتەسىمىز, اۋداندىق «زاريا» گازەتىنىڭ رەداكتورى, كسەنيا بۋروشكينا مەن بوگدان ەفيمەنكونىڭ انالارى ناتاليا مەن تاتيانا اۋداندىق اۋرۋحانادا مەدبيكەلەر, ەليزاۆەتا كۋليستىڭ اناسى ناتاليا اۋداندىق پوشتا بولىمىندە, كيريل دۋدارەۆتىڭ اناسى وكسانا كاسىپكەرلىك سالاسىندا جۇمىس ىستەيدى ەكەن.
– بۇل – اتا-انالاردىڭ وتباسىلىق شەشىمدەرى. مۇنى كىشكەنتاي بالالارىمىزدىڭ اكە-شەشەلەرىنىڭ وزدەرى تۇرىپ جاتقان تۋعان وتاندارىنا, اۋىلدارىنا دەگەن قۇرمەتى دەپ تۇسىنەمىز. ەلىمىزدىڭ بولاشاعى – قازاق تىلىندە, بالالارىمىزدى بالاباقشادان باستاپ قازاقستاندىق پاتريوتيزم رۋحىندا تاربيەلەيتىن بولامىز. ەلباسىنىڭ ساياساتىن قولدايتىن تاتۋ تىرلىكتە ءومىر ءسۇرىپ جاتقان ءبىزدىڭ اۋدانىمىزداعى وزگە ۇلت وكىلدەرىنىڭ ءبىر ەل, ءبىر تاعدىر دەيتىن نيەت-پەيىلدەرى ۇزاعىنان بولسىن, – دەيدى «تالبەسىكتىڭ» مەڭگەرۋشىسى گۇلبارشىن باقىتقىزى.
كىشكەنتايلار ەندى «كەلەشەك» باعدارلاماسى ارقىلى تاربيەلەنەدى. اۋدان ورتالىعىندا «تالبەسىكتەن» باسقا, «اقبوتا», «بالداۋرەن» بالاباقشالارى دا بار. ەلىمىز تاۋەلسىزدىگىن العان جىلداردان بەرى اۋدان ورتالىعىنىڭ اتاۋى وزگەرىپ, تەرەڭكول اتالدى, جاڭا زامانعا ساي سالىنعان قازاق مەكتەبى بوي كوتەردى.
فاريدا بىقاي,
«ەگەمەن قازاقستان».
پاۆلودار وبلىسى,
قاشىر اۋدانى.