سەنات توراعاسى ماۋلەن اشىمباەۆ فرانتسيا رەسپۋبليكاسى سەناتىنىڭ سىرتقى ىستەر, قورعانىس جانە قارۋلى كۇشتەر جونىندەگى كوميسسياسى دەلەگاتسياسىنىڭ باسشىسى ۆالەري بۋايەمەن كەزدەستى. ولار ىنتىماقتاستىقتى نىعايتۋ ماسەلەلەرىن تالقىلاپ, پارلامەنتارالىق ءوزارا ءىس-قيمىلدىڭ كەلەشەگى مەن جاڭا بىرلەسكەن جوبالاردىڭ باسىم باعىتتارىنا توقتالدى.
كەزدەسۋدە پالاتا سپيكەرى مەيماندارعا ءىلتيپات ءبىلدىرىپ, قازاقستان مەن فرانتسيا اراسىنداعى سىندارلى ءارى ستراتەگيالىق بايلانىسقا جوعارى باعا بەردى. سونداي-اق ول فرانتسيا ەلىمىزدىڭ ەۋروپالىق وداقتاعى ماڭىزدى ءارى سەنىمدى سەرىكتەسى ەكەنىن ايتتى. م.اشىمباەۆ ەكى مەملەكەت اراسىندا, ەڭ الدىمەن, جوعارى دەڭگەيدە تۇراقتى ساياسي ديالوگ جولعا قويىلعانىن دا ەرەكشە اتاپ ءوتتى.
«قازاقستان مەن فرانتسيا ەكىجاقتى ىنتىماقتاستىقتىڭ بارلىق باعىتىندا بەرىك بايلانىس ورناتىپ, ناقتى ناتيجەلەرگە قول جەتكىزىپ كەلەدى. بۇل – ەڭ الدىمەن, جوعارى دەڭگەيدەگى سىندارلى ساياسي ديالوگتىڭ ناتيجەسى. كەيىنگى ءۇش جىلدا جوعارى دەڭگەيدە ماڭىزدى ساپارلار ۇيىمداستىرىلدى. پرەزيدەنت قاسىم-جومارت توقاەۆ فرانتسياعا رەسمي جانە مەملەكەتتىك ساپارمەن ەكى رەت باردى. فرانتسيا پرەزيدەنتى ەممانيۋەل ماكرون 2023 جىلى ەلىمىزگە رەسمي ساپارمەن كەلدى. سول كەزدەسۋلەردىڭ ناتيجەسىندە ەكىجاقتى قاتىناستار بەرىك ستراتەگيالىق سەرىكتەستىك دەڭگەيىنە كوتەرىلدى. وسى ورايدا ءسىزدىڭ بۇل ساپارىڭىزدىڭ دا ماڭىزى جوعارى. ءبىز ەكى ەل اراسىنداعى پارلامەنتارالىق بايلانىستى ودان ءارى كەڭەيتۋگە مۇددەلىمىز», دەپ سەنات توراعاسى زاڭ شىعارۋشى ورگاندار اراسىنداعى بايلانىستى جانداندىرۋ ماسەلەسى جونىندە ءسوز قوزعادى.
سونىمەن قاتار م.اشىمباەۆ ەلىمىزدەگى الەۋمەتتىك-ەكونوميكالىق, ساياسي جاڭعىرۋ ۇدەرىستەرىن, رەسپۋبليكالىق رەفەرەندۋمنىڭ قورىتىندىسىن ءسوز ەتتى. سونىڭ اياسىندا جاڭا كونستيتۋتسيانىڭ قابىلدانۋى ساياسي جۇيەنى جاڭعىرتۋدىڭ, سونداي-اق قۇقىقتىق مەملەكەتتى نىعايتۋدىڭ ماڭىزدى كەزەڭى ەكەنىن باسا ايتتى.
ءوز كەزەگىندە ۆالەري بۋايە پارلامەنتارالىق ىقپالداستىقتى ارتتىرۋدىڭ ماڭىزى جونىندە ايتا كەلە, قازاقستان مەن فرانتسيا اراسىنداعى ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.
سۇحبات بارىسىندا ەكىجاقتى پارلامەنتارالىق بايلانىستاردى دامىتۋ پەرسپەكتيۆالارى دا تالقىلاندى. اتاپ ايتقاندا, دوستىق توپتارى جانە ەۋروپا كەڭەسىنىڭ پارلامەنتتىك اسسامبلەياسى مەن ەقىۇ پارلامەنتتىك اسسامبلەياسى اياسىنداعى ءوزارا ءىس-قيمىل ماسەلەلەرى ءسوز بولدى. سونداي-اق ساۋدا-ەكونوميكالىق, ينۆەستيتسيالىق سەرىكتەستىكتى, ءبىلىم بەرۋ, ونەركاسىپ, دەنساۋلىق ساقتاۋ, اۋىل شارۋاشىلىعى سياقتى سالالارداعى ىنتىماقتاستىقتى كەڭەيتۋ تەتىكتەرى دە نازاردان تىس قالمادى. بۇعان قوسا سەنات توراعاسى كليمات, سۋ ماسەلەلەرىنە قاتىستى كۇن ءتارتىبى اياسىنداعى ىنتىماقتاستىقتىڭ, سونداي-اق جاسىل ەكونوميكا مەن اتوم ەنەرگەتيكاسى سالالارىنداعى سەرىكتەستىكتىڭ ماڭىزى تۋرالى پىكىرىن ءبىلدىردى.