قازاقستان حالقىنىڭ بىرلىگى كۇنى – ەلىمىزدە عانا ەمەس, سونىمەن قاتار ءتۇرلى مادەنيەتتەر مەن ۇلتتار اراسىنداعى بەيبىتشىلىك پەن ۇيلەسىمدى ەسكە سالاتىن كۇن. بۇل كۇن بىزگە الۋانتۇرلىلىك كۇشتىڭ جانە شابىت كوزى بولا الاتىنىن, ءبولىنۋدىڭ ەمەس, بىرىگۋدىڭ ۇلگى-ونەگەسىن كورسەتەدى. مەرەكەنىڭ ماڭىزى ۇلتتىق شەكارالاردان اسىپ, دۇنيەجۇزىندەگى قازاقتاردىڭ دا جۇرەگىنە جەتەتىنى ءسوزسىز.
باسقاشا ايتقاندا, بۇل كۇنى ەرەكشە نازار اۋدارىلاتىن نارسە – تاريحي وتانىنا ورالعان ەتنوستىق قازاقتاردى جانە شەتەلدەگى قازاق دياسپوراسىن تارتۋ. قازاقستاندا جانە بۇكىل الەمدە تۇراتىن قازاقتار اراسىنداعى بايلانىس مادەني الماسۋلار, ءبىلىم باعدارلامالارى جانە قوعامدىق باستامالار ارقىلى نىعايا تۇسەدى. بۇل مادەنيەتىمىزدى گەوگرافيالىق ورنالاسۋىنا قاراماستان ساقتاۋعا جانە دامىتۋعا مۇمكىندىك بەرەدى.
بۇگىندە الەمنىڭ 40-قا جۋىق ەلىندە 5 ميلليونداي قازاق تۇرادى. ونىڭ ىشىندە, رەسمي دەرەكتەرگە سايكەس قىتايدا – 1,6 ميلليون, وزبەكستاندا – 821 مىڭ, رەسەيدە – 592 مىڭ, موڭعوليادا – 120 مىڭ, قىرعىزستاندا – 30 مىڭ, تۇرىكمەنستاندا – 15 مىڭ, تاجىكستاندا 2 مىڭعا جۋىق.
شەتەلدە قازاقتار مەن قازاقستاندىقتاردىڭ 250-دەن اسا ۇيىمى جۇمىس ىستەيدى. قازىرگى تاڭدا سىرتقى ىستەر مينيسترلىگىنە قاراستى «وتانداستار قورى» قوعامى ولاردىڭ كوپشىلىگىمەن تىعىز بايلانىس ورناتقان. اتالعان ۇيىمداردان ءتىل ۇيرەنۋ, مادەنيەت پەن ءداستۇردى ساقتاۋ بويىنشا ءتۇرلى تالاپ-تىلەك ءتۇسىپ تۇرادى.
قور 2019 جىلدان باستاپ شەتەلدەگى قانداستارىمىزعا قازاق ءتىلىن ونلاين جانە وفلاين فورماتتاردا تەگىن ۇيرەتىپ كەلەدى. وتكەن جىلدان بەرى بىرقاتار ەلدە ۇلتتىق قۇندىلىقتاردى دارىپتەيتىن ۇيىرمەلەر اشىلدى (دومبىرا, بي, قولونەر, ۇلتتىق سپورت تۇرلەرى). سونىمەن قاتار قازاق ورتالىقتارىنا «قورجىن» جوباسى اياسىندا مەملەكەتتىك تۋ, ۇلتتىق كيىمدەر, دومبىرا جانە قولونەر بۇيىمدارى تابىس ەتىلدى. بالالارعا ونداعان شىعارماشىلىق بايقاۋ ۇيىمداستىرىلىپ, جەڭىمپازدارى ەلىمىزدەگى جازعى لاگەرلەرگە تەگىن جولدانادى. مەكتەپ تۇلەكتەرى قازاقستان رەسپۋبليكاسىنداعى جوعارى وقۋ ورىندارىندا ۇسىنىلعان دايىندىق ءبولىمى, ستيپەنديالىق باعدارلاما جانە ءبىلىم گرانتتارىن يەلەنە الادى.
بىرلىگىمىز بەن ىنتىماعىمىزدىڭ شىنايى كۇشى – ونىڭ شەكارالاردان تىس جالعاسۋىندا. شەتەلدەگى وتانداستارىمىزدىڭ قازاقستان توڭىرەگىندە ۇيىسىپ, بىرىگۋى وتە ماڭىزدى, ويتكەنى ولاردى جۇمىلدىرۋ ارقىلى ءبىز مادەني بايلىعىمىز بەن داستۇرلەرىمىزدىڭ جالعاسىن قامتاماسىز ەتە الامىز.
شەتەلدە تۇراتىن وتانداستارىمىز ەلىمىزدىڭ قيىن كەزەڭدەرىندە ءوز بىرلىگىن ايقىن كورسەتتى. سۋ تاسقىنىنان زارداپ شەككەن ايماقتارعا ولار گۋمانيتارلىق كومەك پەن قارجىلاي قولداۋ جىبەردى. بۇل ءىس-ارەكەتتەر قازاق حالقىنىڭ جەر شارىنىڭ قاي بۇرىشىندا بولماسىن ءاردايىم ءبىرتۇتاس ەكەنىن دالەلدەيدى.
شەتەلدەگى قازاقتاردىڭ تاريحي وتانىنا دەگەن سەزىمدەرىن وياتۋ جانە ولاردى قازاقستاننىڭ وركەندەۋىنە, گۇلدەنۋىنە بەلسەندى ۇلەس قوسۋعا ۇندەۋ ارقىلى ۇلتتىق سانا-سەزىمدى كۇشەيتىپ, ەلدىك مۇددەمىزدى جاھاندىق دەڭگەيدە ىلگەرىلەتە الاتىنىمىز ءسوزسىز.
ەرجان مۇقاش,
«وتانداستار قورى» كەاق كوممۋنيكاتسيا جانە حالىقارالىق ىنتىماقتاستىق دەپارتامەنتىنىڭ ديرەكتورى