مەنىڭ اكەم...

اكە-شەشەسىنەن التى ايلىق ءسابي كەزىندە ايىرىلعان اكەم مەكتەپ دۇيسەمبيەۆ تە تاعدىر تارتقان سىناقتان سىرت اينالىپ وتكەن جوق. پەرىشتە كەزىندە جەتىم قالعان اكەمدى تۋىس جەڭگەسى باۋىرىنا باستى, باقتى-قاقتى. ەشكىمنەن كەم قىلماي ءوسىردى.

19 جاسقا تاياعان شاعىندا اكەم تاشكەنت شاھارى ارقى­لى مايدان دالاسىنا شاقىرتۋ الدى. ول كىسى ون ءۇشىنشى مە­حا­ني­كالاندىرىلعان تانك دي­ۆيزياسىنىڭ ساپەر ۆزۆودى­نىڭ قۇرامىندا كوماندير بولدى. قارت قۇرلىقتى جاياۋ ءجۇرىپ, وتان قورعادى. بايىرعى لەنينگرادتى, نوۆگورود ماڭى مەن ۆىرۋ قالاسىن جانە ەستونيا اۋماعىن جاۋ تاستاعان مينادان تازارتۋعا كۇش سالدى. ول تۋعان توپىراعىنا 1954 جىلى اۋستريادان ورالدى.

قاتال تاعدىردىڭ ءتۇرلى سىنا­عىنا مويىماعان ارداقتى اكەم ءوزى كورگەن قيىندىقتار تۋرالى ءلام-ميم دەپ جاق اشقان ەمەس. تىرىسىندە تولعانىپ تۇرىپ: «سەندەر باقىتتىسىڭدار, اتا-انالارىڭدى كوردىڭدەر. مەن اكە-شەشەمنىڭ ءتۇرىن دە بىلمەيمىن» دەپ سىر شەرتكەندە, جانارىندا الدەبىر وكىنىش پەن ساعىنىشتىڭ تابى تۇراتىن. اسقار تاۋىمنىڭ كوزىن كورگەندەر ونىڭ ادال ازامات بولعانىن تامسانىپ ايتىپ جاتاتىن.

اكەم مايدان دالاسىنان امان ورالعانىمەن, سوعىس سال­عان جۇرەكتەگى جارانىڭ ءىزى قايت­قان ەمەس. ول جاستىق شا­عى مەن دەنساۋلىعىن مايدان شە­بىندە قالدىردى. جانا­رى­نان مەيىرىم نۇرى سەبەزگىلەپ تۇرا­تىن اكەمىزدىڭ مەيىربان بەي­نەسى ماڭگى جادىمىزدا قالا­تىنى انىق.

وتان ءۇشىن وت كەشكەن مەكتەپ دۇيسەمبيەۆتىڭ سوعىستاعى ەرلىكتەرى ەلەۋسىز قالعان جوق. كوپتەگەن وردەن-مەدال ومىراۋىندا جارقىرادى. ول كىسىنىڭ جانكەشتى ەرلىكتەرى رەسەيدىڭ «سوعىس باتىرلارى» سايتىندا تايعا تاڭبا باسقانداي انىق ساقتالعان. اسقار تاۋىمىزدىڭ اتى-ءجونى تاراز قالاسىندا تۇرعان «جەڭىس» ساياباعىنداعى مەموريالدىق تاقتا مەن سارى­سۋ جەرىندەگى تاقتاعا جازىلعان.

ارداقتى اكەم ءتىرى بولعاندا 9 مامىر كۇنى 100 جاسقا تولار ەدى. امال نەشىك, جۇرەگىنە سوعىس تۇسىرگەن سىزات جانىن اۋىرت­پاي قويسىن با؟ ءبىراز جىل بۇرىن ءفاني جالعانمەن قوش ايتىستى. الايدا ونىڭ بەينەسى ماڭگى جادىمىزدا قالادى.

التىنكۇل دۇيسەمبيەۆا,

ەڭبەك ارداگەرى

جامبىل وبلىسى