قازاقستاننڭ مادەنيەت جانە اقپارات مينيسترلىگى batyrlargatagzym.kz پورتالىن ىسكە قوستى, دەپ حابارلايدىEgemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
جوبانىڭ نەگىزگى ماقساتى – ءار باتىردىڭ تاريحتا لايىقتى تانىلۋىن قامتاماسىز ەتۋ دەيدى مينيسترلىكتەگىلەر.
– مەملەكەت باسشىسى ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى III وتىرىسىندا اتاپ وتكەندەي, مەملەكەت سوعىس جىلدارىندا تەڭدەسى جوق جاۋىنگەرلىك جانە ەڭبەك ەرلىكتەرىن جاساعان وتانداستارىمىزدى ەل جادىندا ساقتاۋ بويىنشا جۇيەلى جۇمىس جۇرگىزۋدە. سايت ءارتۇرلى اقپارات كوزدەرىنەن جيناقتالعان جانە قازاقستان حالقىنىڭ ەرلىگىنىڭ ماڭگىلىك ەسكەرتكىشى بولىپ تابىلادى. پيلوتتىق جوبا 2023 جىلى ىسكە قوسىلىپ, ازاماتتىق قوعام مەن ەرىكتىلەردىڭ ۇلكەن قىزىعۋشىلىعىنا يە بولدى. سايتتىڭ فۋنكتسيونالدىق مۇمكىندىكتەرى كەڭەيتىلىپ, دەرەكتەر تولىققاندى پورتالعا جۇيەلەندى, – دەلىنگەن حابارلامادا.
بۇگىنگى تاڭدا پورتالدا 100 مىڭنان استام قازاقستاندىق ارداگەر تۋرالى اقپارات بار. ەكىنشى دۇنيەجۇزىلىك سوعىستىڭ 80 جىلدىعىنا وراي پورتال بارلىق ارداگەرلەر تۋرالى دەرەكتەردى بىرىكتىرۋگە تىرىسادى.
– ءبىز ءاربىر قازاقستاندىقتى ۇوس ارداگەرلەرى تۋرالى قوسىمشا اقپارات بەرۋ ارقىلى بۇل جوباعا ءوز ۇلەسىن قوسۋعا شاقىرامىز. كەز كەلگەن ادام جەكە وتباسىلىق مۇراعاتتاردا ساقتالعان قۇجاتتارمەن سايتتى تولىقتىرۋعا كومەكتەسە الادى. بۇل فوتوسۋرەتتەر, قۇجاتتار, مايداننان كەلگەن حاتتار جانە باسقا ماتەريالدار بولۋى مۇمكىن, – دەلىنگەن حابارلامادا.
بۇل پورتال – مادەنيەت جانە اقپارات مينيسترلىگىنىڭ, مەملەكەتتىك ارحيۆتەردىڭ, قورعانىس مينيسترلىگىنىڭ, ەرىكتىلەر مەن ازاماتتىق قوعامنىڭ بىرلەسكەن جۇمىسىنىڭ ناتيجەسى بولىپ وتىر.