كوركەم گيمناستيكادان قازاقستان قۇراماسىنىڭ ۇزدىگى ەلجانا تانيەۆا تاشكەنت تورىندە ءوتىپ جاتقان ازيا چەمپيوناتىندا ۇزدىك اتانىپ, پاريج وليمپياداسىنىڭ جولداماسىن جەڭىپ الدى, دەپ جازادى Egemen.kz ۇلتتىق وليمپيادالىق كوميتەتكە سىلتەمە جاساپ.
وسىلايشا كوركەم گيمناستشى قازاقستان قورجىنىنا 50-ءشى جولدامانى سالدى.
ەلجانا تانيەۆا كوپسايىس قورىتىندىسى بويىنشا ءبىرىنشى ورىن يەلەندى. ال جارىس ەرەجەسى بويىنشا, كۆوتا تەك التىن مەدال العان سپورتشىعا بەرىلەدى.
«كوپسايىس قورىتىندىسى بويىنشا ەلجانا تانيەۆا 133.40 ۇپاي جينادى. ول ازيا چەمپيوناتىنىڭ التىن مەدالىمەن بىرگە, وليمپيادا ويىندارىنىڭ جولداماسىنا قول جەتكىزىپ وتىر», دەپ حابارلادى ۇوك.
تاعى ءبىر قازاقستان سپورتشىسى ايبوتا ەرتايقىزى جارىستى بەسىنشى ورىنمەن اياقتادى.