پوليتسيا قىزمەتكەرىنىڭ فورماسىن كيگەن ەر ادامنىڭ كۇدىكتى ارەكەتتەرى جەلى قولدانۋشىلارىنىڭ نارازىلىعىن تۋدىردى. كوپ ۇزاماي ءتارتىپ ساقشىلارى تالعار اۋدانىنىڭ 31 جاستاعى تۇرعىنىن ۇستادى, دەپ حابارلايدى Egemen.kz.
Polisia.kz ءمالىم ەتكەندەي, جانارماي قۇيۋ بەكەتىنە پوليتسيا فورماسىن كيىپ بارعان ەر ادام شىن مانىندە پوليتسيادا جۇمىس ىستەمەيتىنىن مويىندادى. انىقتالعانداي, ول قالاداعى اسكەري كيىم دۇكەنىنەن ارنايى فورما ساتىپ العان.
«جالعان پوليتسەي قولدانىستاعى زاڭناماعا سايكەس جاۋاپقا تارتىلادى. اتالعان ارەكەتتەر ءوز مىندەتتەرىن ادال اتقاراتىن ىشكى ىستەر ورگاندارى قىزمەتكەرلەرىنىڭ بەدەلىنە نۇقسان كەلتىرەتىندىكتەن, ولارعا قاتاڭ تۇردە توسقاۋىل قويىلادى», دەلىنگەن حابارلامادا.