اتى اڭىزعا اينالعان پارتيزان, اتاقتى بارلاۋشى, سوعىس ارداگەرى, حالىق قاھارمانى, جازۋشى قاسىم قايسەنوۆتىڭ تۋعانىنا 106 جىل تولۋىنا وراي كەڭەس وداعىنىڭ باتىرى سابىر راقىموۆ اتىنداعى شىمكەنت رەسپۋبليكالىق «جاس ۇلان» مەكتەبى كىتاپحاناسىندا 4-وقۋ روتاسى 4-ۆزۆود ۇلاندارىنىڭ قاتىسۋىمەن «اڭىز ادام قاسىم قايسەنوۆ» اتتى تانىمدىق ساعات ءوتتى. ءىس-شارانىڭ ماقساتى – ۇلاندارعا باتىردىڭ وشپەس ەرلىگىن ۇلگى ەتىپ, وتان قورعاۋدا ەرجۇرەك, باتىل, ادال بولۋعا تاربيەلەۋ.
باتىر 1918 جىلى شىعىس قازاقستان وبلىسى ۇلان اۋدانىندا تۋعان. 1934 جىلى مەكتەپ بىتىرگەننەن كەيىن وسكەمەن قالاسىنداعى ساياسي-اعارتۋ تەحنيكۋمىنا ءتۇسىپ, ونى 1938 جىلى بىتىرگەن. پاۆلودار وبلىستىق وقۋ ءبولىمىنىڭ ساياسي-اعارتۋ جونىندەگى نۇسقاۋشىسى بولىپ جۇرگەندە اسكەر قاتارىنا شاقىرىلىپ, اسكەري-بارلاۋ مەكتەبىنە جىبەرىلەدى. 1941 جىلى ماسكەۋدەگى بارلاۋشىلار مەكتەبىندە وقيدى. سول جىلى ۋكراينا جەرىندە پارتيزان جاساعىن قۇرۋ ءۇشىن جاۋ تىلىنا اتتانادى. چاپاەۆ اتىنداعى پارتيزان قۇراماسىنىڭ ءۇشىنشى جاساعىن باسقارادى. ودان كەيىن 1944 جىلدىڭ اياعىنا دەيىن مولداۆيا, ۋكراينا, چەحوسلوۆاكيا, رۋمىنيا جەرىندەگى پارتيزان قوزعالىستارىنا قاتىسادى. جاۋ تىلىندا جۇزدەگەن جورىقتى باسىنان وتكەرەدى. باتىر كيەۆ جانە پولتاۆا وبلىستارىنداعى پارتيزاندار قوزعالىسىن العاش رەت ۇيىمداستىرۋشىلاردىڭ ءبىرى رەتىندە تاريحتا قالدى. «وتان» وردەنىمەن, ءىى دارەجەلى «بوگدان حمەلنيتسكي» وردەنىمەن, ءى جانە ءىى دارەجەلى «وتان سوعىسى» وردەنىمەن, كوپتەگەن مەدالمەن, قۇرمەت گراموتالارىمەن ماراپاتتالدى.
ق.قايسەنوۆ سوعىستان سوڭ قارۋىن قالامعا ايىرباستاپ, جاۋىنگەرلىك, ەرلىك جورىعىن كوركەم سوزبەن كەستەلەدى, قازاق ادەبيەتىندەگى پارتيزان تاقىرىبىنىڭ نەگىزىن قالادى, 30-عا جۋىق كىتاپتىڭ اۆتورى. ا.فادەەۆ اتىنداعى حالىقارالىق سىيلىقتىڭ لاۋرەاتى اتاندى.
1995 جىلعى 9 مامىردا پرەزيدەنت جارلىعىمەن قاسىم قايسەنوۆكە ەلىمىزدەگى ەڭ جوعارى ناگرادا – حالىق قاھارمانى اتاعى بەرىلدى.
كەش بارىسىندا قاسىم قايسەنوۆكە ارنالعان سلايدتار, كىتاپ كورمەسى, فوتوكورمەلەر ۇيىمداستىرىلىپ, «قاسىم» اتتى كوركەم فيلمنەن ءۇزىندى كورسەتىلدى. سونداي-اق 4-روتا ۇلاندارى باتىرعا ارنالعان ولەڭ-شۋماقتارىن وقىپ, كەشتىڭ كوركىن قىزدىرىپ, ءارى قاراي كونتسەرتتىك باعدارلاماعا ۇلاستى.
باتىرلىق پەن ۇلتتىق نامىستىڭ ۇلگىسى ىسپەتتەس قاسىم قايسەنوۆتىڭ ەرلىگى جانە قالامگەرلىگى ەشقاشان ۇمىتىلمايدى.
«بۇگىنگى كۇن – ەڭ جارىق كۇن, الىپ كۇن,
كۇللى الەمگە ەرلىگىڭدى تانىتتىڭ,
قاسىم باتىر – باتىرلاردىڭ باتىرى,
قاھارمانى حالىقتىڭ!» – دەپ اقىن جىرلاعانداي, قاسىم قايسەنوۆتىڭ ەرلىگى مەن شىعارماشىلىعى ۇرپاقتان-ۇرپاققا مۇرا بولىپ, ماڭگى جاساي بەرەدى.
ايكەن وسپانقۇلوۆا,
رەسپۋبليكالىق «جاس ۇلان» مەكتەبىنىڭ قىزمەتكەرى
شىمكەنت