الماتى وبلىسى اكىمىنىڭ ءباسپاسوز قىزمەتى انكارا قالاسىندا كورنەكتى جازۋشى, بالالار ادەبيەتىنىڭ بايتەرەگى بەردىبەك سوقپاقباەۆتىڭ 100 جىلدىق مەرەيتويى شىمىلدىق اشقانى تۋرالى حابارلادى, دەپ جازادى Egemen.kz.
«تۇركسوي» حالىقارالىق ۇيىمىنىڭ باس حاتشىسى سۇلتان راەۆتىڭ قولداۋىمەن وتكەن اۋقىمدى ءىس-شارا كونفەرەنتسيادان باستاۋ الدى. كونفەرەنتسيا بارىسىندا قازاقستاننىڭ تۇركياداعى ەلشىسى ەركەبۇلان وڭالبەك ۇلى ەكى ەلدىڭ مادەني قارىم-قاتىناسىن دامىتۋ دەڭگەيى ارتقانىن ايتتى. سونداي-اق قازاقستان جازۋشىلار وداعىنىڭ توراعاسى مەرەكە قۇلكەنوۆ ادەبي مۇرانى باۋىرلاس مەملەكەتتەردە دارىپتەۋدىڭ ماڭىزىنا توقتالدى.
ءىس-شارادا ءسوز العان الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم ۇيىمداستىرۋشىلارعا العىس ايتىپ, ءوڭىر باسشىسى مارات ەلەۋسىز ۇلىنىڭ جىلى لەبىزىن جەتكىزدى.
«ەكى ەلدىڭ اراسىندا مادەني ىنتىماقتاستىقتى دامىتۋ ماقساتىندا «تۇركسوي» حالىقارالىق ۇيىمىمەن بىرلەسكەن جۇمىس جوسپارى جاسالعان. سونىڭ اياسىندا قازاق ادەبيەتىنىڭ كلاسسيگى بەردىبەك سوقپاقباەۆتىڭ 100 جىلدىق مەرەيتويى حالىقارالىق دەڭگەيدە اتاپ ءوتىلدى. اتالعان ۇيىمنىڭ قولداۋىمەن ماڭىزدى حالىقارالىق جوبا قولعا الىنىپ وتىر. ول – بەردىبەك سوقپاقباەۆتىڭ «ولگەندەر قايتىپ كەلمەيدى» رومانىنىڭ جازىلعانىنا 40 جىل تولۋىنا بايلانىستى, تاماشا تۋىندى تۇرىك تىلىنە اۋدارىلدى. وسى ىسپەتتەس يگى شارالاردىڭ باسىنان تابىلعان ءاربىر ازاماتقا العىس بىلدىرەمىن», دەدى وبلىس اكىمىنىڭ ءبىرىنشى ورىنباسارى نۇرلان ەرعالي ۇلى.
مەرەيتوي اياسىندا حالقىمىزدىڭ رۋحانياتىنا وشپەس مۇرا قالدىرعان جازۋشىنىڭ جەكە زاتتارى, كىتاپتارى جانە ەكسپوناتتار قويىلعان كوشپەلى كورمە ۇيىمداستىرىلدى. كورمەدە كەگەن اۋداندىق تاريحي-ولكەتانۋ مۋزەيىنىڭ نەگىزگى قورىندا ساقتالعان بەردىبەك سوقپاقباەۆتىڭ قولشاتىرى, ساعاتى, وتباسىلىق سۋرەتتەرى جانە تاعى باسقا دا زاتتارى كوپشىلىك نازارىنا ۇسىنىلدى.
تۇركيانىڭ تورىندە وتكەن مادەني-ادەبي ءىس-شارادا قر ەڭبەك سىڭىرگەن ءارتىسى, داۋلەسكەر كۇيشى-كومپوزيتور سەكەن تۇرىسبەكتىڭ جەتەكشىلىگىمەن «اقجاۋىن» كامەرالىق وركەسترى ونەر كورسەتتى. كونتسەرتتە قازاق كومپوزيتورلارىنىڭ تۋىندىلارىمەن قاتار تۇرىك ەلىنىڭ اۋەزدى اۋەندەرى مەن اندەرى ورىندالدى.
تۇرىك جۇرتى قارىمدى قالامگەردىڭ شىعارمالارىمەن تانىسىپ, ءتاتتى كۇي تىڭداپ, قازاقتىڭ مۋزىكا ونەرىن تاماشالادى.
الماتى وبلىسى