سۋ باسقان ايماقتاعى اعايىنعا الاقانداعىسىمەن ءبولىسىپ, جومارتتىق جاساپ جاتقانداردىڭ قاتارىندا قاراساي اۋدانىنا قاراستى قىرعاۋىل ەلدى مەكەنىنىڭ تۇرعىندارى دا بار, دەپ حابارلايدى Egemen.kz.
ايرانداي ۇيىپ وتىرعان اۋىل تۇرعىندارى سۋ تاسقىنىنان زارداپ شەككەن وڭىرگە گۋمانيتارلىق كومەك كورسەتۋگە اسىقتى. وسى ماقساتپەن قىرعاۋىل اۋىلىنىڭ ورتاسىنا قويىلعان جۇك كولىگىن قاراپايىم حالىق از ۋاقىتتىڭ ىشىندە-اق كيىم-كەشەك, كورپە-جاستىق, تۇرمىسقا قاجەت زاتتارمەن, ازىق-ت ۇلىكپەن تولتىرىپ تاستاعان. بۇل ىستە كاسىپكەرلەر دە كوش باسىنان كورىنگەن. جۇرەك جىلىتار يگى ىسكە اۋىل يمامى تۇرار ۇسەنوۆتىڭ ۇيىتقى بولعانىن اتاۋ ءلازىم.
«سۋ باسقان وڭىرلەردەگى باۋىرلارىمىزدىڭ باسىنا تۇسكەن قيىن-قىستاۋ شاقتا شاما-شارقىنشا كومەك كورسەتۋگە اۋىلىمىزدىڭ ۇلكەن-كىشىسى نيەت ەتىپ, ءبىر ءۇيدىڭ بالاسىنداي اتسالىستى. سونىڭ ىشىندە تۇرعىندارعا قىزمەت كورسەتىپ وتىرعان «ماrMاrا» دۇكەنىنىڭ يەلەرى ءبىر ميلليون تەڭگەنىڭ كولەمىندە كيىم-كەشەك الىپ بەردى. بۇل – ءبىزدىڭ ىنتىماعىمىزدىڭ, بىرلىگىمىزدىڭ بەلگىسى. ەندىگى ماقساتىمىز – اۋىل ازاماتتارىنىڭ اماناتىن ءتيىستى جەرگە جەتكىزۋ», دەيدى اۋىل يمامى.
جينالعان زاتتار پويىزعا تيەلىپ, سولتۇستىك قازاقستان وبلىسىنا جونەلتىلدى.
«ايتىپ كەلمەيتىن اپاتتان زارداپ شەككەن ازاماتتارعا از دا بولسا كومەگىمىز بولسىن دەگەن نيەتپەن اۋىلداستار تۇگەلگە جۋىق قولىمىزدان كەلگەن ۇلەسىمىزدى قوستىق. تاسقىننىڭ بەتى قايتىپ, ەل-جۇرت قالىپتى تىرشىلىككە ورالسا ەكەن دەگەن تىلەگىمىز بار», دەيدى اۋىل تۇرعىنى عاليا ەستاەۆا.
الماتى وبلىسى