باتىس قازاقستان وبلىسىنىڭ تۇرعىنى كىشكەنتاي بالاسىنا دەنە جاراقاتىن كەلتىرگەنى ءۇشىن جاۋاپكەرشىلىككە تارتىلدى, دەپ حابارلايدى Egemen.kz وبلىستىق سوتتىڭ ءباسپاسوز قىزمەتىنە سىلتەمە جاساپ.
بايتەرەك اۋدانىنىڭ №2 سوتىندا باتىس قازاقستان وبلىسىنىڭ تۇرعىنىنا قاتىستى قر اكىمشىلىك قۇقىق بۇزۋشىلىق تۋرالى كودەكسىنىڭ 73-1-بابىنىڭ 1-1-بولىگىمەن قاراستىرىلعان اكىمشىلىك قۇقىق بۇزۋشىلىق تۋرالى ءىس قارالدى.
«قۇقىق بۇزۋشى 2019 جىلى تۋعان كىشكەنتاي ۇلىنا بەلبەۋىمەن قاساقانا دەنە جاراقاتىن كەلتىرىپ, سول ارقىلى ونىڭ دەنساۋلىعىنا زيان كەلتىرگەن. سوت وتىرىسىندا قۇقىق بۇزۋشى ءوز كىناسىن تولىق مويىنداپ, كەشكى ۋاقىتتا كىشكەنتاي ۇلىنىڭ ويناپ جۇرگەنىن, وزىنە باعىنباعانىن, سوندىقتان ونى بەلبەۋمەن جازالاعانىن ءتۇسىندىردى. ول ەكى كىشكەنتاي بالانى جالعىز تاربيەلەپ وتىر. اناسى اتا-انا قۇقىعىنان ايىرىلعان جانە ولارمەن بىرگە تۇرمايدى. جابىرلەنۋشىنىڭ زاڭدى وكىلى – بايتەرەك اۋداندىق ءبىلىم ءبولىمىنىڭ قورعانشىلىق جانە قامقورشىلىق ورگانىنىڭ وكىلى سوت وتىرىسىندا ءىستىڭ ءمان-جايىن راستاپ, بالانىڭ سوزىنەن اكەسىنىڭ ۇرىپ-سوققانى بەلگىلى بولعانىن ءتۇسىندىردى», دەلىنگەن سوت حابارلاماسىندا.
سوت قاۋلىسىمەن بالانىڭ اكەسى اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ, وعان ەسكەرتۋ تۇرىندەگى اكىمشىلىك جازا قولدانىلدى.
قاۋلى زاڭدى كۇشىنە ەنگەن جوق.